Փաստ ինֆո

Քննչական կոմիտեի քննության տվյալներով՝ «Վանոյի Արտակ» մականունով հայտնի Արտակ Գալստյանը Վարդան Ղուկասյանի՝ «Դոգ»-ի, և նրանց հանցակիցների հետ քաղաքացիներից շորթմամբ ստացել են առանձնապես խոշոր չափերի գումար, ապա՝ ստացված գումարի ծագումը խեղաթյուրել ՝ «փողեր լվացել»։ Արտակ Գալստյանի և մյուսների գործողություններից տուժածների շրջանակը միայն Տիգրան Արզաքանցյանով չի սահմանափակվում։ «Փաստինֆո»-ին հայտնի դարձավ, որ «Հանրային Ձայն» կուսակցության համանախագահ Արտակ Գալստյանի՝ «Վանոյի Արտակի», գործով նախաքննությունն ավարտվել է, այն արդեն ուղարկվել է Հակակոռուպցիոն դատարան։

Հիշեցնենք, որ Արտակ Գալստյանը ձերբակալվել, ապա՝ կալանավորվել է 2023թ. ապրիլի 17-ին՝ առանձնապես խոշոր չափերով շորթում կատարելու մեղադրանքով։ Նախաքննական մարմինը պաշտոնապես հայտնեց, որ 2022թ. մարտի 23-ին Ա. Գալստյանը հեռախոսակապ է հաստատել Տիգրան Արզաքանցյանի հետ և պահանջել 110.000 ԱՄՆ դոլար գումար՝ զգուշացնելով, որ հակառակ դեպքում նրա և նրա կնոջ վերաբերյալ Վ. Ղուկասյանի կողմից վարվող «Հանրային ձայն» հաղորդաշարի ընթացքում կհրապարակվեն նրանց պատիվն ու արժանապատվությունը նվաստացնող, բարի համբավն արատավորող տեղեկություններ։ Տ.Ա.-ն չի կատարել նրանց պահանջը, որի 2022թ. հոկտեմբերից մինչև 2023թ. փետրվարն ընկած ժամանակահատվածում մի քանի անգամ հրապարակվել են նման տեղեկություններ։ Քրեական վարույթով պարզվել է նաև Վարդան Ղուկասյանի կողմից քաղաքացիներից սպառնալիքով գումար շորթելու ևս շուրջ 46 դրվագ։
Ընդ որում, մնացած դեպքերում եւս մեծամասամբ մասնակից է եղել Արտակ Գալստյանը։ Մասնավորապես՝ Կարեն Առուստամյանի և Հայկ Խաչատրյանի նկատմամբ 34.000 ԱՄՆ դոլար վճարելու պարտավորությունն ստանձնելուն Արսեն Հարությունյանին հարկադրելու դիտավորությամբ որպես հանցավոր գործողությունների պատվերի կատարման համար 8.000.000 ՀՀ դրամ վճարելու դիմաց, պլանավորել են համացանցում հանրայնացնել, որ Արսեն Հարությունյանը չի վերադարձնում Հրազդան քաղաքում պիցցերիա հիմնելու համար Կարեն Առուստամյանի ներդրած 34.000 ԱՄՆ դոլլար գումարը, նրա և նրա մերձավորների մասին արատավորող տեղեկություններ տարածելու եղանակով հարկադրել Արսեն Հարությունյանին Կարեն Առուստամյանին և Հայկ Խաչատրյանին վերադարձնել գումարը:

Այնուհետև, Կարեն Առուստամյանն այդ մասին տեղեկացրել է իր մտերիմ Շահեն Ադյանին ու վերջինիս ծանոթացրել Հայկ Խաչատրյանի հետ: Արտակ Գալստյանը Հայկ Խաչատրյանի, Վարդան Ղուկասյանի, Կարեն Առուստամյանի հետ, շարունակելով հանցավոր կազմակերպության առջև դրված մտադրությունների իրականացումը, 2022 թվականի հունիսի 23-ին Հ.Խաչատրյանը Շ.Ադյանի հետ կնքել է 8.000.000 ՀՀ դրամ երկու ամսից վերադարձնելու մասին փոխառության պայմանագիր՝ հետագայում հիշյալ գումարի ծագման աղբյուրը թաքցնելու նպատակով: Հաջորդ օրը՝ 2022 թվականի հունիսի 24-ին Հայկ Խաչատրյանը Շահեն Ադյանից առձեռն ստանալով 8.000.000 ՀՀ դրամը, Կարեն Առուստամյանի հետ գնացել են «Հանրային ձայն» կուսակցության գրասենյակ, որտեղ Արտակ Գալստյանի ցուցումով Հայկ Խաչատրյանը հանցավոր ճանապարհով ստացված 8.000.000 ՀՀ դրամ գումարի մի մասը՝ 6.000.000 ՀՀ դրամը, հանձնել է գրասենյակում փաստաբանական գործունեությամբ զբաղվող հանցավոր կազմակերպության մասնակից Սուսաննա Սարգսյանին, իսկ մյուս մասը պահել իր մոտ: Նշված գումարի հանցավոր ծագումը թաքցնելու և խեղաթյուրելու դիտավորությամբ, հանցավոր կազմակերպության մասնակից Ս.Սարգսյանը ՀՀ քննչական կոմիտեի Կենտրոն և Նորք-Մարաշ վարչական շրջանների քննչական բաժնում քննվող թիվ 13122120 քրեական վարույթով մեղադրյալ, հանցավոր կազմակերպության մասնակից Հայկ Խաչատրյանի պաշտպանությունն իրականացնելու պատրվակով 2022թ.հունիսի 23-ին վերջինիս հետ կնքել է ծառայությունների վճարովի մատուցման մասին ձևական պայմանագիր՝ այդպիսով թաքցնելով և խեղաթյուրելով հանցավոր ճանապարհով ստացված գույքի իրական բնույթը և ծագման աղբյուրը:

Արդյունքում՝ Վարդան Ղուկասյանը 2022 թվականի օգոստոսի 18-ին և 19-ին իր համացանցային ելույթներում անդրադարձել է ներդրողների կողմից Արսեն Հարությունյանի պիցցերիայում 34.000 ԱՄՆ դոլարի ներդրում կատարելու և վերջինիս կողմից պիցցերիան ներդրողների ձեռքից վերցնելու առերևույթ դեպքին։

Մյուս դրվագը վերաբերում է փաստաբանի միջոցով երեխային ՌԴ վերադարձնելու հարցով՝ ամուսնուց բաժանված կնոջից խարդախությամբ 2.693.120 ՀՀ դրամ հափշտակելուն։ Մասնավորապես, կինը դիմել էր Վարդան Ղուկասյանին՝ խնդրելով վստահելի փաստաբան գտնելու հարցում օգնություն և «ընկել ծուղակը», Ղուկասյանը առաջարկել է դիմել Արտակ Գալստյանին, վերջինս էլ՝ կնոջ ծնողներին փոխանցել է Սուսաննա Սարգսյանի տվյալները, որն, ըստ քրեական գործի՝ հանցավոր կազմակերպության մաս է։ Կինը հարցումների միջոցով պարզել էր, որ դուստրը տեղափոխվել է Վրաստան, ապա՝ ԱՄԷ Շարժա, այնտեղից Դուբայ քաղաք, ինչի մասին տեղեկացրել է Սուսաննա Սարգսյանին:

Վերջինս էլ կնոջն ասել է, թե իբրև կան մարդիկ, ովքեր շեյխերի մակարդակով կարող են գտնել երեխային և կարգավորել վերջինիս վերադարձի խնդիրը, ինչի համար Էլիզա Բայրամյանից պահանջել է 2.000.000 ՀՀ դրամ՝ վստահեցնելով, թե ինքը գումարի չափը հնարավորինս նվազեցրել է՝ հաշվի առնելով երեխայի առողջական վիճակը և նրա ֆինանսական դրությունը, իսկ որոշ ժամանակ անց Էլիզա Բայրամյանին տեղեկացրել է, թե պետք է գնան Դուբայ քաղաք, սակայն Դուբայի իրենց գործընկերները նպատակահարմար են գտնում այնտեղ մեկնել տոներից հետո՝ 2023 թվականի հունվարին, իսկ մինչ այդ 2.000.000 ՀՀ դրամը պետք է փոխանցվի իրենց գործընկերներին: Իբր Դուբայի գործընկերների հետ կապի մեջ գտնվելու հանգամանքը հիմնավորելու նպատակով Սուսաննա Սարգսյանը Էլիզա Բայրամյանին ցույց է տվել հաղորդագրություններ և դրանց պատասխանները, այդ թվում՝ արաբական ազգային հագուստով լուսանկար, որոնք Հայկ Խաչատրյանը, Արտակ Գալստյանի և Սուսաննա Սարգսյանի հետ նախապես պայմանավորվածության արդյունքում, ուղարկել էր Սուսաննա Սարգսյանին:

Էլիզա Բայրամյանը, վստահելով Սուսաննա Սարգսյանին, համաձայնել է վերջինիս առաջարկին և 2022 թվականի դեկտեմբերի 23-ին, 26-ին և 29-ին բանկային փոխանցմամբ Սուսաննա Սարգսյանին է փոխանցել համապատասխանաբար 143.000 ՌԴ ռուբլուն համարժեք 787.620 ՀՀ դրամ, 150.000 ՌԴ ռուբլուն համարժեք 864.000 ՀՀ դրամ, 70.000 ՌԴ ռուբլուն համարժեք 381.500 ՀՀ դրամ /ընդհանուր՝ 2.033.120 ՀՀ դրամ/, ընդ որում՝ վերջին 70.000 ՌԴ ռուբլին Էլիզա Բայրամյանը փոխանցել է Սուսաննա Սարգսյանի դստեր՝ Անուշ Ղազարյանի անվամբ: Սուսաննա Սարգսյանը Էլիզա Բայրամյանին տեղեկացրել է նաև, թե իբրև ամբողջ գումարը չփոխանցելու դեպքում երեխայի ելքը Դուբայ քաղաքից չի արգելափակվի ու հնարավոր է նրան տեղափոխեն այլ երկիր, այդպիսով՝ Էլիզա Բայրամյանին հարկադրելով իրեն փոխանցել ամբողջ գումարը, ինչը վերջինս փաստացի կատարել է:

Այնուհետև, 2023 թվականի մարտի 7-ին Սուսաննա Սարգսյանը հաղորդագրությունների միջոցով Էլիզա Բայրամյանին տեղեկացրել է, որ Դուբայ մեկնելու տոմսերի, հյուրանոցի և վիզայի համար անհրաժեշտ է վճարել 2500 ԱՄՆ դոլար: Էլիզա Բայրամյանն իր կողմից օգտագործվող, սակայն եղբոր՝ Էդվարդ Բայրամյանի անվամբ հաշվառված բանկային քարտից Սուսաննա Սարգսյանի բանկային քարտին 2500 ԱՄՆ դոլարին համարժեք 990.000 ՀՀ դրամ գումար փոխանցելուց հետո, ստացել է Սուսաննա Սարգսյանի կողմից ուղարկված երեք անձի համար՝ այդ թվում Հայկ Խաչատրյանի անվամբ լրացված ավիատոմսերը, վիզաները և հյուրանոցի վաուչերները: Հայկ Խաչատրյանը, քաջատեղյակ լինելով վարույթն իրականացնող մարմնի կողմից իր ՀՀ տարածքը լքելու սահմանված արգելքի մասին, իր համաձայնությունն է տվել Էլիզա Բայրամյանից հափշտակված գումարով Սուսաննա Սարգսյանի կողմից իր անվամբ ավիատոմս գնելուն:

Դրանից հետո, Սուսաննա Սարգսյանը 2023 թվականի մարտի 10-ին Էլիզա Բայրամյանի հետ մեկնել է Դուբայ քաղաք, որտեղ շարունակել է վերջինիս վստահեցնել, թե իբրև ինչ-որ մարդիկ զբաղվում են նրա դստեր հարցերով, որ վերջինս գտնվում է Դուբայ քաղաքում, այնինչ՝ Էլիզա Բայրամյանի կողմից պարզվել է, որ դուստրը 2022 թվականի մայիս ամսին մեկնել է Դուբայ քաղաքից Թուրքիայի հանրապետություն, ինչից հետո մարտի 14-ին վերադարձել են ՀՀ, այդպես էլ չկատարելով դստերը Էլիզա Բայրամյանին վերադարձնելու ստանձնած կեղծ խոստումները: Հետագայում Արտակ Գալստյանը Էլիզա Բայրամյանին տվել է իրենց կողմից հափշտակած գումարի մի մասը վերադարձնելու կեղծ խոստումներ, այդպիսով իրենց համար անցանկանալի հետևանքներից՝ Էլիզա Բայրամյանի կողմից իրավապահ մարմիններին դիմելու վտանգը չեզոքացնելու համար:

Քրեական գործով մեկ այլ դրվագ էլ վերաբերում է Վարդան Ղուկասյանի քրոջ անձնական կյանքին, որը չենք հրապարակում, քանի որ վերաբերում է ինտիմ կյանքին։

Քրեական գործն այժմ Հակակոռուպցիոն դատարանում է՝ դատավոր Արամ Գրիգորյանի վարությում։

Հեղինակ՝ Իզաբել Սահակյան

Աղբյուր` Փաստինֆո