Փաստ ինֆո

Սա քաղաքացիների գրպանին կպնելու հերթական աբսուրդային նախագիծն է, ու խնդիրը ոչ այնքան այն է, որ կայանման վճարը ավելի քան 10 անգամ թանկանում է՝ 12 հազար դրամից դառնալով 160 հազար դրամ, որքան այն մոդելը, թե քաղաքապետարանը ոնց է պատկերացնում Կենտրոնի բեռնաթափումը։ Այս մասին «Փաստինֆոյի» հետ զրույցում ասաց «Վարորդի ընկեր» ՀԿ նախագահ Տիգրան Քեյանը։

Հիշեցնենք, որ ըստ առաջարկվող տարբերակի,Երեւանի փոքր կենտրոնում նախատեսվում է յուրաքանչյուր 1 ժամվա համար սահմանել 300 դրամ վճար, 1 օրվա համար՝ 2000 դրամ, մեկ շաբաթվա համար՝ 5000 դրամ, մեկ ամսվա համար՝ 18000 դրամ, մեկ տարվա համար՝ 160 000 դրամ վճար։

Քեյանն ընդգծեց, որ այստեղ խնդիրն այն է, թե քաղաքային բնակիչներն ինչ մոտեցում ունեն Ա գոտում բնակվող բնակիչներին նկատմամբ։
«Կենտրոնը բեռնաթափելու, թեթևացնելու ավելի լայն միջոցառումներ պետք է մշակենք ու հստակ ծրագիր ունենանք։ Սա քաղաքացիների գրպանին կպնելու հերթական նախագիծն է։

Ինչու են Կենտրոնում ապրող բնակիչների համար լրացուցիչ բեռ ստեղծում, ինչու են լրացուցիչ ծախս փաթաթում այդ մարդկանց վզին։ Այդտեղի բնակիչը չի կարող տուն չգնալ, որտե՞ղ կայանի իր մեքենան, նա այլընտրանք չունի։ Նա չի կարող իր մեքենան կայանել օրինակ, «Բարեկամության», մետրոյի հարակից տարածքում, այնտեղից հասնի տուն։ Այս տեսանկյունից այս որոշումն աբսուրդ է»,- նշել է մեր զրուցակիցը։

Քեյանի դիտարկմամբ՝ մինչև նման նախագիծ ներկայացնելը՝ ճիշտ կլիներ, որ քաղաքային իշխանությունները զարգացած մի շարք երկրների փորձն ուսումնասիրեին և հասկանան, թե այդ երկրներն ինչպես են լուծել այդ խնդիրը։ «Դա պետք է ներդնել մեկ անգամ և վերջ, ոչ թե տարին մեկ նման ապուշ որոշումներ կայացնեն։ Ընդ որում ՝ որպես կանոն նման նախագծերում տարածքի բնակիչների համար կայանատեղիներ են ստեղծվում, ընդհուպ՝ վճարովի, որտեղ երեկոյան ժամը 7-ից հետո պետք է կայանեն տեղի բնակիչները։ Մինչ այդ՝ կարող են կայանել բոլորը։

Այդ երկրներում տարեկան վճարման մոդել չկա։ Վճարում է կատարվում միայն ժամային կտրվածքով, իսկ հիմա մարդ կա՝ հարուստ է, կարող է բերել 160 000-ը վճարել ու ամիսներով իր մեքենան թողնել Կենտրոնում։ Սա եղավ հարցի լուծո՞ւմ, թեթևացվե՞ց Կենտրոնը, ոչ մի հարց էլ չլուծվեց»։

Ըստ նրա՝ այս որոշումը նաև հակասահմանադրական է, քանի որ սահմանափակվում է հասարակության որոշակի հատվածի, քաղաքացիների իրավունքը, սոցիալական խավի տարանջատում է արվում։

Նախագիծը մշակելուց հետո՝ քաղաքապետարանը որոշել է կազմակերպել, այսպես կոչված, հանրային քննարկում. նոեմբերի 30-ին շահագրգիռ անձանց հրավիրել են նախագծի շուրջ հանրային քննարկման։

Հատկանշական է, որ այն շրջանառության մեջ դրվեց Երևանի ավագանու ընտրություններից հետո։ Մեր դիտարկմանն արձագանքելով՝ մասնագետը նկատեց. «Բնականաբար, եթե ընտրություներից առաջ ՔՊ-ն նման հայտարարություն աներ, դժվար թե կարողանար հավաքել այնքան ձայն, որքան ստացել է ընտրություններին։ Առանց այն էլ քիչ ձայն են հավաքել, եթե այս մասին ընտրություններից առաջ խոսեին՝ շատ ավելի քիչ կհավաքեին»։

Աղբյուր` Փաստինֆո