Փաստ ինֆո

Հյուսիսային Օսիայի երթևեկության կառավարման կենտրոնի կայքի տարածած տեղեկատվության համաձայն՝ ներկայում 2 669 բեռնատար ավտոմեքենա սպասում է Վերին Լարսի ճանապարհով երթևեկության թույլտվության համար։

«Փաստինֆոյի» հետ զրույցում ֆերմեր Հարություն Մնացականյանը հայտնեց, որ Վերին Լարսից բազմաթիվ մեքենաներ վերադարձել են, որոնք բեռնված են եղել ձկնամթերքով, ծաղիկներով, ելակով, խնձորով, անգամ շան կերով։

«Հետաքրքիր է, որ, օրինակ, որոշ քանակությամբ ապրանքներ թույլ են տվել անցնի, խոսքը հատկապես ձկնամթերքի մասին է»,- նշել է Մնացականյանը։

Անդրադառնալով Արային Հարությունյանի հայտարարությանը, թե չափազանց կարևոր է, որ հայերը՝ Հայաստանում և Սփյուռքում գնեն բացառապես հայկական արտադրության ապրանքներ և, որ որևէ Լարսի անցակետ փակելը մեր վրա չի ազդի՝ Մնացականյանն ասաց, որ շոկի մեջ է այդ հայտարարությունից։

«Մարդու ուղեղի մեջ չի տեղավորվում, ո՞նց կարող է նորմալ պաշտոնյան նման միտք արտահայտնի։ Ինչպես կարող է պաշտոնյան նման դիլետանտ հայտարարություն անի, կամ գուցե լավ էլ կանխամտածված է նման բան ասում։ Ասում է՝ հորդորում եմ գնել հայկականը, այս հայտարարությունը վկայում է, որ իրենք պատկերացնում չունեն ո՛չ տնտեսությունից, ո՛չ արտահանումից։ Արտահանվող ապրանք նշանակում է, որ տեղական շուկայում պահանջարկը բավարարել են, մնացածն արտահանում են, ինչպե՞ս են պատկերացնում այդ դեպքում 2 մլն տոննայի արտահանումը։

Հայաստանի գյուղմթերքի արտահանման ավելի քան 95 տոկոսն արտահանվում է հենց Ռուսաստան, մնացած շուկաներ արտահանելու հնարավորություն պարզապես չկա, որովհետև որակի խնդիր ունեն, մասշտաբի խնդիր ունեն։ Հենց սրանում է խնդիրը, նախ պայմաններ ստեղծեք, հետո ասեք, թե ով, ումից՝ ինչ գնի։

Այս իշխանությունը պետք է հասկանա, որ բիզնեսն է պահում իրենց ու, եթե իրենք բիզնեսները շարքից հանեն, որտեղի՞ց են պարգևավճար ստանալու»,- ասել է Մնացականյանը։

Աղբյուր` Փաստինֆո