Փաստ ինֆո

Անկախ նրանից, թե Գրանադայում, ինչ պայմանավորվածություններ են ձեռք բերվել, դրանց բովանդակությանն անգամ չարժե անդրադառնալ, քանի որ դրանք Ադրբեջանը չի ստանձնել։ Այս մասին «Փաստինֆոյի» հետ զրույցում ասաց քաղաքագետ Սուրեն Սուրենյանցն՝ անդրադառնալով ՀՀ արտգործնախարար Արարատ Միրզոյանի հայտարարությանը։

Հիշեցնենք, որ այսօր Ազգային Ժողովում Արարատ Միրզոյանի հայտարարել է, թե Գրանադայում ձեռք բերված պայմանավորվածությունները մեզ համար արժանապատիվ խաղաղության ուղենիշներն են։ Մինչդեռ այդ հայտարարությունը Հայաստանը ստորագրել է Ֆրանսիայի նախագահի, Գերմանիայի կանցլերի, ԵԽ նախագահի հետ, իսկ Ադրբեջանը դրան չի միացել։ Որքանով հայտնի է՝ Հայաստանը խաղաղության պայմանագիր է նախատեսում ստորագրել Ադրբեջանի ու ոչ թե Ֆրանսիայի կամ Գերմանիայի հետ։

«Ադրբեջանի նախագահը չի ստանձնել այդ պարտավորությունները։ Գրանադայի պայմանավորվածությունը արժեք կունենար, եթե Ադրբեջանը դրան մասնակից լիներ, բայց Ադրբեջանը դրան մասնակից չէ։ Ենթադրվում է, որ Գրանադային փաստաթղթով գոնե Հայաստանը պետք է անվտանգության երաշխիքներ ստանար այն ստորագրող մյուս կողմերից։ Բայց նման բան նույնպես չենք տեսնում այդ փաստաթղթում»,- նշել է Սուրենյանցը։

Անդրադառնալով «արժանապատիվ խաղաղություն» ձևակերպմանը՝ քաղաքագետն ընդգծեց, որ արժանապատվությունը չպետք է այդքան էժան կերպով շահարկել։ «Իրականում, պարտված կողմը չի կարող արժանապատվության դիրքերից խաղաղություն կնքել, որովհետև իրեն ինչ-որ բան պարտադրում են, իր խնդիրը պետք է լիներ ռիսկերը հնարավորինս կառավարելը։ Սակայն տեսնում ենք, որ ՀՀ իշխանությունները չեն կարողանում այդ ռիսկերը կառավարել, եթե կարողանային՝ ՀՀ 200 քառակուսի կիլոմետր տարածքը չէր լինի օկուպացված»։

«Առհասարակ, ինչպես կարելի է խոսել արժանապատիվ խաղաղության մասին, եթե ադրբեջանական կողմը Հայաստանի 200 քկմ տարածքն օկուպացված է պահում։ Սա մեկ։ Երկրորդ, ունենք լրիվ հայաթափված Արցախ։ Կարող ենք էլի գործոններ նշել»,- արձանագրել է Սուրենյանցը։

Ինչ վերաբերում է «Խաղաղության խաչմերուկին»՝ Սուրենյանցն ընդգծեց, որ կարևոր չէ այն հանգամանքը, թե ինչ ես առաջարկում, այլ կարևոր է, որ քո օրակարգը մյուսներն էլ ընդունեն. «Արդեն մոտավորապես 15 օր է «Խաղաղության խաչմերուկի» մասին խոսում է Նիկոլ Փաշինյանը, բայց արտաքին որևէ գործընկեր դրան առհասարակ չի արձագանքում։ Այսպես կարելի է 100 հատ ծրագիր ունենալ, լավ կամ վատ բովանդակությամբ, հարուստ կամ աղքատ, ու անընդհատ դնել ու քննարկել, բայց շատ էական է ունենալ այնպիսի օրակարգ, այնպիսի արտաքին քաղաքականություն վարել, որ այդ օրակարգի շուրջ կոնսենսուս լինի, որ գործընկերները դա ընդունեն, զարգացնեն, փոխլրացնող առաջարկություններ անեն»։

«Մենք տեսանք, որ երբ Թբիլիսիում Նիկոլ Փաշինյանը ներկայացնում էր խաղաղության խաչմերուկը՝ ոչ Վրաստանի վարչապետին, որ Ադրբեջանի վարչապետին, ընդհանրապես որեւէ մեկին դա հետաքրքիր չէր, որևէ մեկը դրանց չարձագանքեց։

Փաշինյանը սիրում է սիրուն կարգախոսներ հեղինակել՝ «Խաղաղության դարաշրջան», «Խաղաղության խաչմերուկ», շատ լավ է, բոլորս ձգտում ենք խաղաղության, բայց ցանկացած առաջարկ, եթե տակը չունի բովանդակություն, կոնկրետ ծրագիր, քաղաքական պայմանավորվածություններ՝ դա մնալու է որպես գեղեցիկ վերնագիր, գեղեցիկ կարգախոս»։

Աղբյուր` Փաստինֆո