Փաստ ինֆո

Շառլ Միշելը մեկ անգամ չէ, որ ասել է՝ իրենք պաշտպանում են սեփական շահերը, այդ թվում նաև՝ Հարավային Կովկասում։ Եվ քանի որ հիմա Ադրբեջանը Ռուսաստանի Դաշնության և Թուրքիայի հետ միասնական քաղաքականություն է վարում, Եվրոպան և ԱՄՆ-ն փորձում են միացյալ ուժերով ներթափանցել Հարավային Կովկաս։ Կստացվի՞ դա նրանց մոտ, թե՞ ոչ, ցույց կտա ժամանակը,- «Փաստինֆո» լրատվականի հետ զրույցում ասում է քաղաքագետ Ստեփան Դանիելյանը՝ մեկնաբանելով Եվրոպական խորհրդի ղեկավար Շառլ Միշելի վերջին հայտարարությունը։

Հիշեցնենք՝ այսօր Եվրապական խորհրդի քարտուղար Շառլ Միշելը Գրանադայում ասել է.«Երկու օր առաջ խոսել եմ նախագահ Ալիևի հետ և հստակ ասել եմ, որ նա չի կարող տարածքային պահանջներ ունենալ Հայաստանից։ Սա պետք է բարձրաձայն ասել և ապահովել, որ լինի տարածքային ամբողջականության փոխադարձ ճանաչում»։

Խոսքն այստեղ, այսպես կոչված, Զանգեզուրի միջանցքի շուրջ դեռևս կայանալիք զարգացումների մասին է, ասում է քաղաքագետն ու հավելում՝ խնդիրն այն է, թե ո՞վ պետք է այդ միջանցքը վերահսկի, իսկ Ալիևն, արդեն, սպառնում է, որ ուժով այն կբացի։ «Այսօրվա Նորաբակի ուղղությամբ արձակած կրակոցներն էլ հենց դրա վառ վկայություններն են՝ դա Ալիևի արձագանքն էր՝ Շառլ Միշելի հայտարարությանը»,- նշում է Ստեփան Դանիելյանը։

Խոսելով րոպեներ առաջ տեղի ունեցած զարգացումների մասին, ըստ որի՝ Նիկոլ Փաշինյանը Գրանադայում փաստաթուղթ է ստորագրել, որով ճանաչել է Ադրբեջանի տարածքային ամբողջականությունը՝ 86.000 քկմ, այդ թվում նաև Արցախը, ընդ որում, նա դա արել է միայնակ, առանց Ադրբեջանի նախագահի անմիջական ներկայության, որովհետև վերջինս հրաժարվել էր մեկնել Գրանադա և մասնակցել հանդիպմանը, Ստեփան Դանիելյանն արձագանքում է՝այո, պետք է փորձենք պատկերացնել, որ դա արդեն տեղի է ունեցել և սա այն պարագայում, երբ Ադրբեջանն ինքը չի ճանաչել Հայաստանի Հանրապետության տարածքային ամբողջականությունը։

Անդրադառնալով նաև Եվրախորհրդարանի կողմից այսօր ընդունված բանաձևին, որով կառույցը պահանջել է, որպեսզի Ադրբեջանը հանձնառություն ստանձնի՝ համաներում հայտարարելու մինչև 2023-ի սեպտեմբերի 19-ը և դրանից հետո ձերբակալվածների, այդ թվում՝ տարածաշրջանի նախկին պաշտոնյաների նկատմամբ, Ստեփան Դանիելյանը նկատում է՝ ԵՄ-ի բանաձևերն ու հայտարարությունները որևէ նշանակություն չունեն, դրանք կատարման ենթակա չեն, այլ կերպ ասած՝ դրանք կարող ենք ընդունել որպես միայն հայտնած կարծիք։

Աղբյուր` Փաստինֆո