Փաստ ինֆո

Ռուբեն Վարդանյանը մեծ համբավ ունի աշխարհում և հիմա աշխարհի ազդեցիկ մարդկանց պետք է համախմբել և տեղեկացնել, որպեսզի նրանք պահանջեն Ռուբեն Վարդանյանի անհապաղ ազատ արձակումը։ Այլ ելք՝ ստեղծված իրավիճակում չկա,- «Փաստինֆո» լրատվականի հետ զրույցում ասում է բանակցային գործի մասնագետ, բոստոնաբնակ մեր հայրենակից Արթուր Մարտիրոսյանն ու հավելում՝ Վարդանյանը ծանոթ է անգամ Մեծ Բրիտանիայի թագավորական ընտանիքի և թագավորի հետ, այլ կերպ ասած՝ կան բազմաթիվ ազդեցիկ մարդիկ, ովքեր, ընդամենը մեկ զանգով, կարող են կանխել նրա գերեվարման գործընթացը։

Արթուր Մարտիրոսյանը նկատում է՝ ադրբեջանական ԶՈւ-ի կողմից Ռուբեն Վարդանյանի գերեվարման նպատակը վերջինիս նկատմամբ հոգեբանական ճնշում գործադրելն է, ինչպես նաև՝ ցույց տալ, որ իրենք ում ուզեն, կարող են ձերբակալել. «Եկեք չմոռանանք, որ Նիկոլ Փաշինյանը ճանաչել է Ադրբեջանի տարածքային ամբողջականությունն ու Արցախն այդ կազմում, հետևաբար, իրենց տարածքում ապօրինաբար գտնված մարդկանց ադրբեջանական կողմը իրավունք ունի ձերբակալելու, ինչն էլ անում է՝ հոգեբանական ճնշումներ գործադրելու՝ ինչպես ձերբակալվածների, այնպես նաև՝ դեռևս Արցախում գտնվողների նկատմամբ»։

Եթե հայկական կամ ռուսական կողմերը չմիջամտեն, ապա ադրբեջանական կողմի վարքագիծը կարող է տարածվել նաև մեզ հայտնի այլ անձանց նկատմամբ, ովքեր այս պահի դրությամբ, դեռևս, գտնվում են Արցախի տարածքում, ասում է Արթուր Մարտիրոսյանն ու հավելում. «Այդ մարդկանցից շատերի անունները մեզ հայտնի են, դրանք այն մարդիկ են, ովքեր երբևէ մասնակցել են Արցախի ազատագրմանը, ինչպես նաև՝ պետականության կայացման գործում։ Ես վստահ եմ՝ նույն Սամվել Բաբայանին քաջ հայտնի է 200 հոգուց բաղկացած այդ մարդկանց ցուցակը։ Թե ինչպե՞ս Սամվել Բաբայանը չի հայտնվել այդ ցուցակում, կամ, եթե անգամ, իր անունը կա այդ ցուցակում, ապա ինչպե՞ս է նա հաջողացրել անվտանգ Արցախից մուտք գործել ՀՀ տարածք, սա ինձ համար անպատասխան հարց է։ Այն մեկնաբանությունը, թե իրեն, իբր, սահմանին չեն ճանաչել, կներեք՝ ծիծաղելի է։ Եթե նա Լենինի կերպարով գրիմ արած լիներ, կարող է մի կերպ հավատայինք, մնացածը լոլոներ են։ Ադրբեջանական կողմն իր վարորդին ճանաչում է, իրեն չի՞ ճանաչում։ Ասեմ ավելին՝ նրանք իրենց մոտ, նույնիսկ, Սամվել Բաբայանի ամենաթարմ ու վերջին լուսանկարն ունեն, երբ նա Շուշիում բանակցելու էր գնացել ադրբեջանցիների հետ»,- ասում է պարոն Մարտիրոսյանը։

Ամենայն հավանականությամբ, Սամվել Բաբայանին ադրբեջանական անցակետից անվնաս բաց են թողել, որովհետև շատ լավ հասկանում են, որ նա այստեղ՝ Հայաստանում, Նիկոլ Փաշինյանի հակահայկական գիծն է շարունակում և դեռ պետք կգա իրենց, - ասում է բանակցային գործի մասնագետը։

Հարցին՝ ի՞ նչ է սպասվում Արցախում մնացած խոցելի խմբի այն ներկայացուցիչների հետ, ովքեր հայտնվել էն ադրբեջանկան կողմի թիրախում, Արթուր Մարտիրոսյանը պատասխանում է՝ եթե նրանք գերեվարվեն կամ ձերբակալվեն Արցախում կամ անցակետով տեղափոխվելու պահին, ապա նրանց Ադրբեջանի կողմից սահմանված համապատասխան օրենսդրությամբ մեղադրանք է առաջադրվելու և որպես ռազմական հացագործներ Ադրբեջանում դատական պրոցեսներ են սպասվելու։ Սակայն այսքանով, խնդիրներն, ըստ Արթուր Մարտիրոսյանի չեն ավարտվելու. «Ես լուրջ մտահագություն ունեմ, որ եթե ՀՀ-ն Ադրբեջանի հետ, այսպես կոչված, Խաղաղության պայմանագիր կնքի, ապա ադրբեջանկան կողմը կարող է պահանջել նաև այստեղ՝ Հայաստանում գտնվող որոշ անձանց, նույնպես, հանձնել իրենց, որին հայկական կողմն, ի դեմս օրվա այս իշխանությունների, կարող է համաձայնություն տալ և հանձնել նրանց Ադրբեջանին»։

Աղբյուր` Փաստինֆո