Փաստ ինֆո

Արցախցիների ցեղասպանման, հայրենազրկման աղետին զուգահեռ Հայաստանում իրավապահները լծված են բացառապես Նիկոլ Փաշինյանի իշխանությունը պահելու գործին․ռեպրեիսաների միջոցով ճնշվում են խաղաղ ակցիայի մասնակիցները, փոխարենը՝ իրավապահներն աչք են փակում խաղաղ ցուցարարների նկատմամբ ոստիկանական վայրագությունների, բռնության վրա՝ անպատժելիության մթնոլորտով «կանաչ լույս վառելով» և խրախուսելով ոստիկանների կողմից քաղաքացիների ջարդը։

Արդեն երկրորդ օրն է, ինչ համացանցը, ԶԼՄ-ները ողողված են քաղաքացիների նկատմամբ բիրտ ուժի կիրառման, խմբակային ծեծի, անգամ՝ «ոհմակով» հարձակման վերաբերյալ տեսանյութերով, որտեղ, ի դեպ, շատ հստակ երևում են առերևույթ անհամաչափ ուժ, բռնություն գործադրող ոստիկանների դեմքը։ Ձերբակալվածների առնվազն մի մասն ունեն մարմնական վնասվածքներ, ընդ որում, համացանցում տարածվել են նաև տուժած քաղաքացիների լուսանկարները, որտեղ արձանագրված են վնասվածքները, իրավապահները, սակայն չեն նկատում այս ամենը, փոխարենը, քրեական վարույթներ են նախաձեռնվում ոստիկանների գործունեությունը խոչընդոտելու հատկանիշներով կամ օպերատիվ ձերբակալում են զոհված զինծառայողի ազգականին՝ ԱԺ պատգամավոր Հովիկ Աղազարյանին «Եռաբլուրում» ապտակելու համար, «հայտնաբերում» և ձերբակալում, անգամ՝ կալանքի են տանում հուսահատության եզրին գտնվող արցախցիներին՝ ակցիաներին մասնակցելու համար, ընդ որում, կրկին չնկատելով հենց իրենց նկատմամբ կատարված հանցագործության դեպքերը, օրինակ՝ Գեղամ Մանուկյանի նկատմամբ կիրառված բռնությունը, անչափահասին բերետավորի կողմից խեղդելը, մի քանի տասնյակ ոստիկաններով քաղաքացուն շուրջկալի մեջ վերցնել ու ծեծելու դեպքերը։ Ավելին՝ իրավապահները ձերբակալել են ակցիա իրականացնող երիտասարդին՝ քաղաքացու ավտոմեքենան վնասելու համար, սակայն հանգամանքը, որ սույն ավտոմեքենայի վարորդը մեքենան վարում էր ակցիա իրականացնող երիտասարդ աղջկա ուղղությամբ, իրավապահների աչքից կրկին վրիպել է։ Իրավապահները զանգվածային ձերբակալում են հանրահավաքին հայտարարությամբ հանդես եկող անձանց՝ իբրև սահմանադրական կարգի տապալմանն ուղղված կոչերի համար, սակայն իշխանություններից սնվող և վերջիններիս պատկանող «Civic.am» և «Արարատնյուզ» կոչվող՝ իրենց լրատվամիջոց ներկայացնող հարթակների կողմից արցախցիների նկատմամբ առերևույթ ատելություն քարոզելու, խտրական մոտեցում ցուցաբերելու դեպքերին ընթացք չեն տալիս։

ՀՀ գլխավոր դատախազությունից գրավոր հարցում են պահանջել՝ պատասխանելու համար, թե արդյոք իրենք արձանագրել են ամբողջ համացանցը ողողած հրապարակումները, թե ոչ, կամ, գուցե հարթակների «պարզաբանում»-ն են որպես «գործուն զղջում» ընդունել, մինչդեռ, լուսահոգի պրոդյուսեր Արմեն Գրիգորյանը կալանավորվեց և մահացավ հենց նիստերի դահլիճում՝ շիրակցիներին, իբր, վիրավորելու համար։

Իրավապահների կողմից ցուցաբերվող երկակի ստանդարտների, քաղաքացիների նկատմամբ բռնության վերաբերյալ ոստիկանության գործողությունների շուրջ «Փաստինֆո»-ն զրուցել է փաստաբան Արսեն Բաբայանի հետ, ում գնահատմամբ՝ ոստիկանության գործողությունները բացահայտորեն ապացույցն են, որ ՀՀ-ում զանգվածային քաղաքական հետապնդումներ են իրականացվում։

«Ոստիկանների նկատմամբ, որոնք կիրառում են ծայրահեղ ծանր բռնություններ, ոչ թե կարգապահական վարույթներ են իրականացվում, գոնե, այլ՝ ծեծված քաղաքացիներին տանում են՝ քրեական հոդվածներով կալանավորում են։ Սա խոսում է հենց բացահայտ, զանգվածային քաղաքական հալածանքների մասին՝ քրեական օրենսգրքի քողի ներքո։ Նման ծայրահեղ ծանր բռնություններ ՀՀ-ում, առնվազն վերջին 30 տարում ես չեմ հիշում, չի եղել, առավել ևս՝ հետապնդումների որակական հատկանիշների փոփոխությունը, որ սկսել են համատարած քրեական վարույթներ նախաձեռնել կամ մեկ-երկու քրեական վարույթի շրջանակներում համատարած ձերբակալություններ։ Ընդ որում, իմ տեղեկություններով իշխանության ամենաբարձր վերնախավի կողմից հանձնարարված է՝ բոլոր անձանց տանել կալանավորման»,- նշեց փաստաբանը՝ ներկայացնելով նաև իր վստահորդի՝ 18-ամյա արցախցու կալանավորման դեպքը։

Նախաքննության գաղտնիությամբ և երիտասարդին՝ չնույնականացնելու ցանկությամբ պայմանավորված փաստաբանը զերծ մնաց մանրամասներ հայտնելուց, միայն արձանագրեց, որ երիտասարդի ձերբակալությունը ոտքից գլուխ անօրինական էր․»Ականատես վկայի մատնացույցով անձին ձերբակալում են, բայց պարզվում է, որ այդ ականատես վկան ընդհանրապես ականատես չի եղել դեպքին, ինչը դատարանում հաստատում եմ, բայց, այնուամենայնիվ, դատավոր Կարեն Ֆարխոյանն այս ամենը լսելուց հետո կալանավորման որոշում կայացրեց»։

Արսեն Բաբայանի դիտարկմամբ՝ տոտալ հետապնդումներ, տոտալ հանձնարարականներ են՝ իրավապահ և դատական համակարգի ներկայացուցիչներին, որոնք էլ իրականացնում են այս ամենը․ «Զանգվածային հանցագործություններ՝ ոստիկանների, քննչական մարմինների, դատախազության, դատական իշխանության կողմից։ Քննիչերի հետ խոսում ենք՝ ասում ենք՝ անձի նկատմամբ խափանման միջոց ընտրելու հարց կա, ասում են՝ դեռ չգիտենք։ Միակ իմացողը, որ պետք է իմանան, քննիչներն են, ոնց չգիտեն։ Պարզ է, չէ՞, ինչի մասին է խոսքը՝ հանձնարարական պարզապես չկար, բայց երեկ երեկոյան արդեն հանձնարարությունը տրված էր և բոլորին անխտիր տանում են կալանքի»։

Փաստաբան Արսեն Բաբայանն այս պահին իրականացնում է 6 ձերբակալվածի պաշտպանություն, որից մեկն արդեն կալանավորվել է, երեքի նկատմամբ քրեական հետապնդում հարուցելու որոշում կա, մյուսների մասով՝ դեռևս սպասում են։ Ընդհանուր առմամբ փաստաբանն ունի տեղեկություններ մոտ 70 անձի մասին, որոնց նկատմամբ քրեա-քաղաքական հետապնդում է իրականացվում։

Հեղինակ՝ Իզաբել Սահակյան

Աղբյուր` Փաստինֆո