Փաստ ինֆո

«Ազատ դեմոկրատներ» կուսակցության նախագահ Խաչատուր Քոքոբելյանի հոր առևանգման գործով պաշտպանության կողմը մանիպուլացնում է, ինչ-որ կեղծ սցենարով, իրականության հետ չկապված հայտարարություններ անում՝ փորձելով շեղել պրոցեսից։ Գործով ապացույցները, որոնք ամբողջովին հիմնավորում են Սուրեն Մանուկյանի և նրա հանցակիցների մեղքը, ներկայացված են դատարանին, հասանելի։ Այս մասին «Փաստինֆո»-ի հետ զրույցում ասաց Խաչատուր Քոքոբելյանի հոր՝ Գրիշա Քոքոբելյանի ներկայացուցիչ, փաստաբան Տիգրան Գալստյանը։

Ինչպես արդեն տեղեկացրել ենք՝ դատական նախորդ նիստի ընթացքում Խաչատուր Քոքոբելյանի հոր առևանգման գործով մեղադրյալ, ՀՅԴ գործիչ Սուրեն Մանուկյանը պնդել է, որ առևանգում և շորթում առհասարակ տեղի չի ունեցել, ինչի վերաբերյալ ծանրակշիռ փաստեր ունի։ Մանուկյանը հայտնել էր, որ մոտ վեց ամիս առաջ իրեն են փոխանցել ծանրակշիռ փաստեր, համաձայն որի՝ Խաչատուր Քոքոբելյանի՝ բջջային հեռախոսին «whatsapp» հավելվածի միջոցով ստացած հաղորդագրությունները դրանից մի քանի րոպե առաջ՝ նույն բովանդակությամբ և նույն տեքստով՝ ելք են արվել Խաչատուր Քոքոբելյանի եղբոր՝ Վաչիկ Քոքոբելյանի հեռախոսահամարից, իսկ թե ում է պատկանել միջնորդ հեռախոսը՝ Մանուկյանը խոստացավ հայտնել առավել ուշ։

«Գոնե հիմա բոլորիս համար ավելի քան ակնհայտ է դառնում, որ իրականում որևէ շորթում և առևանգում տեղի չի ունեցել, այլ՝ տեղի է ունեցել սեփական հոր առևանգման բեմականացում և շորթում»,- դատական նիստում հայտարարել էր Մանուկյանը։
Նշված փաստաթղթերը կցվել են գործին, որի թույլատրելիության հարցը կբարձրացվի արդեն ապացույցների հետազոտման փուլում։ Ներկայացված փաստաթղթերը, սակայն, տուժող կողմն արժանահավատ չի համարում, կարծում է՝ դրանք կարող են կեղծված լինել։ Տիգրան Գալստյանը մեզ հետ զրույցում նշեց, որ այն, ինչ Սուրեն Մանուկյանի կողմից ներկայացվել է՝ պատճենի ձևով, ինչ-որ հեռախոսից, իբրև սքրինշոթ էր, փնթի ձևով փաստաթուղթ էր և երևում էր, որ կեղծված է։

«Առաջին հայացքից, երբ նայում եք սքրինշոթից, վերևում երևում է Վաչիկ Քոքոբելյանի հեռախոսահամարը, իբրև, դա այն հեռախոսից էր արված, որով նամակագրություն է եղել, բայց ակնհայտ է, որ այդ հեռախոսահամարը գրանցված է որպես անուն։ Այսինքն, երբ սքրինշոթին նայում եք, երևում է, որ, պետք է գրված լիներ, օրինակ, Տիգրան, բայց դրա փոխարեն գրանցված են թվերը»,- նշեց փաստաբանը՝ հավելելով, որ շատ փնթի արված փաստաթուղթ էր, որը դեռևս փորձաքննության չի ենթարկվել և առնվազն իր և մեղադրողի համար ակնհայտ էր, որ նորմալ փաստաթուղթ չէ։ Բացի այդ, տուժողի ներկայացուցիչը նշեց, որ այդպես էլ չի բացահայտվել ծագման աղբյուրը, թե ում հեռախոսից է վերացված։

«Ընդամենը դատական պրոցեսը մանիպուլացնելու, հասարակությանը շեղելու համար ինչ-որ կեղծ սցենարով՝ ընդհանրապես իրականության հետ կապ չունեցող, ոչ մի տրամաբանության մեջ չմտնող ինչ-որ հայտարարություններ են անում։ Հիմնական ապացույցները, որոնք ամբողջովին հիմնավորում են Սուրեն Մանուկյանի և մյուս հանցակիցների մեղքը, արդեն դատարանում կա, հասանելի է, ցանկացած մարդ կարող է ծանոթանալ։ Ծանոթանալու դեպքում կտեսնեք, որ այնքան բավարար ապացույցներ կան, որ դրանց մասին ընդհանրապես խոսք չի կարող լինել։ Պարզապես Սուրեն Մանուկյանն ինքը հենց իր կուսակցության համար փորձում է ամեն բան անել, որ հանկարծ չմտածեն, որ ինքն այս ամենի մեջ թաթախված է, որովհետև կուսակցական հովանավորչությունից էլ կզրկվի այդ դեպքում և ամեն կերպ փորձում են ձգձգել դատական պրոցեսը։ Իրենք էլ չեն ուզում, որ գործի քննությունն ընթանա, իրենք էլ են հասկանում, որ դատարանում ապացույցների հետազոտումից հետո իր երկրպագուների բանակը պակասելու է»,- նշեց Գալստյանը։

Փաստաբանի փոխանցմամբ՝ ներկայացված փաստաթղթերը կցվել են գործին, մեղադրողը պետք է նաև ուսումնասիրություն իրականացնի, անհրաժեշտության դեպքում քրեական վարույթ նախաձեռնի և ուղարկի փորձաքննության։ Փորձաքննություն կպահանջի նաև տուժող կողմը՝ գտնելով, որ փաստաթուղթը կեղծ է։ Գործի նախաքննության փուլում նման տեղեկություն վարույթն իրականացնող մարմինը չի ունեցել, այդ ուղղությամբ քննություն չի կատարվել, տուժողի ներկայացուցչի դիտարկմամբ, սակայն, նախաքննությունը բազմակողմանի է իրականացվել․ «Գործի նյութերին ծանոթանալու դեպքում որևէ կասկած չի մնա, որ դա Սուրեն Մանուկյանի կազմակերպածն է դա և կոնկրետ այն մարդիկ, որոնք նստած են մի սեղանի շուրջ, այդ մարդկանց կողմից է արված, որովհետև ծանրակշիռ փաստեր կան։ Իրենք ասում են, թե ծանրակշիռ փաստեր են ներկայացնում, բայց դրա ինչն է ծանրակշիռ, հիմա ֆոտոշոփ իմացող ցանկացած մարդու 5000 դրամ տաս, նման փաստաթուղթ կսարքի»։
Իսկ թե ի վերջո ինչու՞ են առևանգել հենց Խաչատուր Քոքոբելյանի հորը, արդյո՞ք նախկինում որևէ խնդիր ունեցել են՝ տուժողի ներկայացուցիչն ասում է, որ իրեն հայտնի չէ․ «Մեզ համար էլ է դա անհայտ։ Գործով որևէ տվյալ չկա, նախկինում որևէ հարաբերություն չեն ունեցել, կապ չեն ունեցել»։

Հիշեցնենք, որ Սուրեն Մանուկյանը ձերբակալվել, ապա կալանավորվել է «Ազատ դեմոկրատներ» կուսակցության նախագահ Խաչատուր Քոքոբելյանի հոր առևանգման գործով։ Ընդ որում, ինչպես հետագայում պարզվել է, Սուրեն Մանուկյանը ձերբակալման օրը հրավիրվել էր ՀՀ քննչական կոմիտե մեկ այլ գործով որպես տուժող քննչական գործողության մասնակցելու համար, սակայն ճանապարհին, այսօրվա իրավապահ մարմիններին բնորոշ բեմականացմամբ, բռնության գործադրմամբ ձերբակալվել էր՝ անձի առևանգման կասկածանքով։ Սուրեն Մանուկյանին մեղադրանք է առաջադրվել՝ ՀՀ քրեական օրենսգրքի 191 հոդվածի 2-րդ մասի 5-րդ կետով՝ խմբի կազմում անձի առևանգման հատկանիշներով։ Նախաքննության ընթացքում Մանուկյանի մեղադրանքը լրացվել է, այժմ նրան մեղսագրվում է նաև առանձնապես խոշոր չափերի շորթումը:

Քրեական գործով Սուրեն Մանուկյանից բացի մեղադրյալի կարգավիճակում է ևս երեք անձ։

Հեղինակ՝ Իզաբել Սահակյան

Աղբյուր` Փաստինֆո