Փաստ ինֆո

Արցախի ամենամեծ ալրաղացի էլեկտրամատակարարման համակարգում տեղի ունեցած խոշոր վթարի հետևանքով, առաջիկա օրերին կրկին հացի որոշակի սղություն է լինելու: Այս մասին «Փաստինֆո» լրատվականի հետ զրույցում ասել է Արցախի Ազգային Ժողովի ընդդիմադիր «Արդարություն» խմբակցության պատգամավոր Մետաքսե Հակոբյանը։

Հացի սղության խնդիր Արցախում, շրջափակումից ի վեր, ժամանակ առ ժամանակ եղել է, ասում է պատգամավորը և հավելում՝ այս խնդիրն արդեն հնարավոր չի դառնում վերահսկել, որովհետև այն ծանրաբեռնվածությունը, որ ունեն Արցախում այս պահին եղած ալրաղացները, նախատեսված չեն եղել նման գրաֆիկով աշխատելու համար.«Հիմա մենք քիչ թվով ալրաղացներ ունենք։ Ժամանակին բավարար չափով կային, սակայն դրանք, նույնպես, մնացել են օկուպացված տարածքներում։ Օրինակ՝ հայտնի է, որ ցորենի արտերն ու դրա մշակումը, հիմնականում, Հադրութի շրջանում էր կենտրոնացված։ Հետևաբար, հիմա չկա ո՛չ ցորենի լավ որակը, ո՛չ լավ այլյուր, իսկ այս ամենի արդյունքում՝ չի կարող լինել նաև լավ որակի հաց, եթե, ընդհանրապես, դա լինում է։ Շատ դեպքերում հացն ուղղակի փչանում է»,- ասում է պատգամավորը։

Ցորենը չի հասցնում չորանալ և աղալու ընթացքում խնդիրներ են առաջանում, ասում է Մետաքսե Հակոբյանը. «Ալյուրի պարկերի հետ կապված խնդիրներ, նույնպես կան, որոնք, արդեն չեն բավականացնում։ Թշնամական կողմը թույլ չտվեց, նույնիսկ, ալյուրի պարկեր ներկրել Արցախ, որպեսզի դրանք բավարարեին՝ ալյուրը տեղափոխելու համար»։

Ստացվել է այնպիսի մի իրավիճակ, որ բնակչության մի մասը հաց, ուղղակի, չի կարողանում գնել, ասում է պատգամավորն ու հավելում.«Այդպիսի մարդկանցից մեկն էլ այսօր ես եմ եղել, ինքս բախվել եմ այդ խնդրին՝ հաց չեմ կարողացել գնել, որովհետև չկար»,-ասում է Մետաքսե Հակոբյանը։

Աղբյուր` Փաստինֆո