Փաստ ինֆո

Շրջակա միջավայրի նախարարության պաշտոնական ներկայացուցիչը վստահեցնում է, թե Ազգային պարկի տարածքում՝ 1901-1903 մետր բարձրության վրա, շինթույլտվության համար կա համապատասխան ՇՄԱԳ, ինչը փորձագետներն արժանահավատ չեն համարում։

«Շրջակա միջավայրի նախարարի խոսնակն ասում է, որ ՇՄԱԳ են կազմել և որևիցե վնաս չի՞ տալիս (Սևանի ջրերի մեջ կառուցվող շինությունը – խմբ.): Ու դա այն շենքն է, որը վերագրվում է Արցախի նախագահին կամ որն իրականում կադաստրով Հակոբջանյանի՞ն է պատկանում (Արցախի քաղաքաշինության նախկին նախարար Մարատ Հակոբջանյանի որդուն- խմբ.)։ Դուք պատկերացնո՞ւմ եք՝ հիմա ինչ փոխանցեցիք ինձ»։ «Փաստինֆո»-ի հետ զրույցում իր զարմանքը հայտնեց էկոլրագրող Նարինե Կիրակոսյանը, ով արդեն տևական ժամանակ է՝ պայքարում է Շողակաթ համայնք «Սևան» ազգային պարկի տարածքում իրականացվող շինարարության կառուցման դեմ։ Էկոլոգիական խնդիրներ լուսաբանող լրագրողը հիշեցրեց դեռևս 2001 թվականին ընդունված Սևանի մասին օրենքը։ Հավելեց, դրանով նախատեսվում էր ջրի մակարդակի տարեկան բարձրացում իրականացնել՝ թույլ չտալու համար Սևանա լճի արագ ծերացում՝ էվտրոֆիկացիա։

«Երեկ նորից կառավարությունն ընդունում է գերջրառի մասին օրենք, որ շրջանցի 2001 թվականին ընդունված օրենքը։ Այսինքն, բացի 150 մլն. խմ-ից, մի հատ էլ 70 մլն. խմ ջրառ է կատարվելու, որը խեղդելու է անգամ լճի բնականոն հունով մակարդակի բարձրացման հնարավորությունը։ Կառավարության որոշումով նորից ջուրն իջեցնելու են»,- հայտարարեց նա։

Այդուհանդերձ, անգամ այս պայմաններում, հենց լճի անմիջապես մեջ շինարարության իրականացման մասով տրված թույլտվության վերաբերյալ հարցին ի պատասխան Շրջակա միջավայրի նախարարությունից մեզ հայտնեցին, որ գերատեսչությունը բնական միջավայրի վրա ազդեցության գնահատում է իրականացրել։ Եզրակացություն է կազմվել, որ «Սևան» ազգային պարկի մոտ 7 հա տարածքում կառուցվող շինությունը համապատասխանում է բոլոր չափորոշիչներին, որևէ խախտում չկա։

«Այն նախագիծը, որը ներկայացվել է փորձաքննության, եղել է նիշից բարձր և համապատասխանել է բոլոր չափորոշիչներին։ Եթե Դուք ունեք փաստեր, որ այդտեղ կա խախտում, ապա պետք է դիմել կա՛մ Քաղաքաշինության կամ բնապահպանության և ընդերքի տեսչական մարմիններին, կա՛մ համայնքին։ Դա իրենց գործառույթն է՝ գնալ և տեղում տեսնել՝ նախագծին համապատասխան է շինարարությունը, թե ոչ»,- ասաց նա։

Նախարարությունից՝ ի դեմս մամուլի քարտուղար Անի Հակոբյանի, այդուհանդերձ, նաև հայտնեցին, որ տվյալ շենք- շինության կառուցման որևէ փուլում նախարարությունը տարածքում շրջակա միջավայրի վրա ազդեցությունը գնահատող որևէ ուսումնասիրություն, երբևէ չեն իրականացրել։ Այդ աշխատանքն, իրենց խոսքով, նույնպես վերապահված է ոչ թե իրենց, այլ Բնապահպանության և ընդերքի պահպանության տեսչական մարմնին։

Անդրադառնալով չափորոշիչների վերաբերյալ Անի Հակոբյանի հայտարարություններին՝ Նարինե Կիրակոսյանն ասաց, որ Շրջակա միջավայրի նախարարության խոսնակն օրենքին չի տիրապետում և սուտ է խոսում։ Իր խոսքով՝ այս ամնն ինքը կարող է ապացուցել փաստաթղթերով։

«Ե՛վ կադաստրի թղթերն ունենք, և՛ նաև տարածքում համատիրության ղեկավարի սուտն ենք հայտնաբերել։ Կադաստրից մեր ստացած փաստաթղթերը շղթայով ցույց են տալիս, թե երբ ինչ է եղել։ 2021 թվականին, Շողակաթ խոշորացված համայնքի ղեկավար Սուլիկո Շուշանյանը, թույլ տալով շինարարությունը, շրջանցել է օրենքը, քանի որ դա «Սևան» ազգային պարկի տարածքում է, որտեղ կա գոտիավորում։ Նույնիսկ տեղացիներն էին զարմացած։ Ասում էին՝ գնում- գալիս էինք, չգիտեինք՝ ինչ էին կառուցում երկու տարվա մեջ։ Ահռելի մի դղյակ է, հենց ջրի մեջ»,- ասաց նա։

Նարինե Կիրակոսյանը հայտնեց, որ շենքը կառուցվել է նաև անթույլատրելի մակարդակում։ Ըստ օրենքի՝ կառուցապատում առհասարակ չի թույլատրվում 1905 մետրից ցածր հատվածում, այնինչ իրենց հենց Շրջակա միջավայրի նախարարության մոնիթորինգի կենտրոնից են հայտնել, որ լճի բարձրությունն այժմ 1901 մետր է։ Փաստինֆո-ի զրուցակիցը նաև տեսակետ հայտնեց, որ անցած տարիներին թափած ջանքերի արդյունքում հնարավոր էր եղել որոշակի չափով բարձրացնել լճի մակարդակը։ Վերջին 2 տարում, սակայն, նորից հետընթաց է գրանցվել՝ հասնելով 2011 թվականի մակարդակին։ Այս բոլոր հարցերն, ըստ Կիրակոսյանի, պետք է մեկնաբանի նաև Սևանի խորհուրդը, որը նախարարության կողմից բացարձակ անտեսվում է։

«Եթե մինչև այդ, վերջին իշխանությունները հայտարարում էին, որ գերջրառն իրականացվում էր ոռոգման կարիքները հոգալու համար, ապա, իր խոսքով, լրագրողների ճնշման արդյունքում, հիմա մեկ այլ պատճառաբանություն են գտել՝ հայտարարելով, թե էլեկտրաէներգիա ստանալու նպատակով է դա իրականացվում։ Հիմա այսպիսի շինությունների կառուցումն անհնարին է դարձնում ջրի մակարդակի բարձրացումը, քանի որ այդ դեպքում կառույցը պարզապես մնալու են ջրի տակ»,- ասաց նա։

Այս առումով, Կիրակոսյանը հիշեց դեռևս տարիներ առաջ Նիկոլ Փաշինյանի հայտարարությունները, թե ապամոնտաժվելու են Սևանի ափին կառուցված բոլոր ցանցերն ու կառույցները։ Այժմ, սակայն, «Սևան» ազգային պարկից ներկայացուցիչներն իրենց հայտնել են, որ այս պահի դրությամբ Սևանի ափին շարունակում է մնալ մի քանի հազար ապամոնտաժման ենթակա շինություն։

«Մեր հարցին, թե դրանք ինչու չեն ապամոնտաժվել՝ (իշխանությունները- խմբ.) պատճառաբանեցին, թե պատերազմից հետո ժամանակ չեն ունեցել, դրա համար միայն ջրի տակ մնացած ծառերն են հեռացվել, ինչը նույնպես չի արվել։ Հատկացումներն, այդուհանդերձ, լինում են։ Սա նույնպես բյուջեի գումարները մսխելու ձև է։ Մի բան էլ կա։ Ուր որ գնում էինք՝ բոլորն ասում էին Սարգսյան Հայկը՝ «Շիշ բռնողը», տարածքին հետևում է, հանկարծ իրենց բան չասեք, ինքը շատ լավ տղա է, բոլորին թողնում է աշխատել։ Սա զազրելի երևույթ է պարզապես։ ՄԵնք պետությո՞ւն ենք, թե՞ ինչ...»,- ասաց նա։

Որպես եզրափակում, մեր զրուցակիցը նաև հայտնեց, որ «Սևան» ազգային պարկի տարածքում կառուցվող շենքի հարակից տարածքում նաև ավազի հանք է բացվել, ինչն, իր խոսքով, պարզապես անթույլատրելի է։

Աղբյուր` Փաստինֆո