Փաստ ինֆո

ՌԴ-ի կողմից հետախուզվող «օրենքով գող» Արսեն Մկրտչյանին՝ «Արսեն Երևանսկուն», ՀՀ-ի կողմից հետախուզվող ԴԱՀԿ նախկին պետ Միհրան Պողոսյանի հետ փոխանակելու մասին լուրերն անհեթեթություն են։ Շատ մեծ ցանկության դեպքում էլ Արսեն Մկրտչյանին չեն կարող արտահանձնել։ Այս մասին «Փաստինֆո»-ի հետ զրույցում ասաց փաստաբան Վարդուհի Էլբակյանը։

Հիշեցնենք, որ ՀՀ ներմուծված 1 տոննա կոկաինի գործով ՀՀ իրավապահները հետախուզում են հայտարարել ԴԱՀԿ նախկին պետ, «Մրգենի» ՍՊԸ սեփականատեր Միհրան Պողոսյանի նկատմամբ։ «Կոկաինի» աղմուկից հետո ՀՀ-ում ձերբակալվել է «օրենքով գող» Արսեն Մկրտչյանը՝ ՌԴ-ին արտահանձնելու նպատակով։ Նա դեռևս չի արտահանձնվել, սակայն մամուլում շրջանառվող լուրերի համաձայն՝ ՀՀ և ՌԴ իրավապահները համաձայնության են եկել։ Մասնավորապես, ՌԴ-ն համաձայնել է ՀՀ-ին արտահանձնել Միհրան Պողոսյանին, սակայն «օրենքով գողի» փոխարեն։

Նշված լուրերը, սակայն, փաստաբան Վարդուհի Էլբակյանը անհեթեթություն է համարում եւ ընդգծում՝ Մկրտչյանին չեն կարող կարող արտահանձնել, քանի որ Մկրտչյանը ՀՀ քաղաքացի է և ունի պատիժն անազատության տեսքով կրելու հետ անհամատեղելի հիվանդություններ, որի վերաբերյալ կա եզրակացություն, նրան չեն կարող ազատությունից զրկել։

«Նման պայմաններում, թե ինչ տրամաբանությամբ կարող են նման դիրք ունենալ, նման լուր սպրդվի կամ նման բան անցկացնեն մտքների ծայրով՝ չեմ էլ կարող պատկերացնել։ Նման ապօրինությունների շրջանակներում, որ հիմա է կատարվում, ոչ մի բանի վրա այլևս չեմ զարմանում»,- նշեց նա։

Դիտարկմանը, որ Մկրտչյանը ձերբակալվել է ՌԴ արտահանձնելու նպատակով հենց այս փուլում՝ «կոկաինի» հայտնի սկանդալից հետո, եթե ավելի վաղ էր նրա նկատմամբ հետախուզում հայտարարվել, փաստաբանն արձագանքեց՝ նշելով, որ ըստ տրամադրված նյութերի՝ Մկրտչյանի նկատմամբ հետախուզում հայտարարված է եղել 2022թ ապրիլին, սակայն դրանից հետո ՀՀ-ում նրա նկատմամբ մեկ այլ վարույթ էր նախաձեռնվել, նա եղել է իրավապահների տրամադրության տակ, օգոստոս ամսին մեղադրանք էր առաջադրվել, կալանքը մերժվել էր, հետո՝ գործը կարճվել։

«Այսինքն՝ կամ մեր իրավապահները լավ չեն աշխատում, կամ լավ չեն գիտակցում, կամ էլ՝ մի հատ տարբերակ են պահում, որ երբ անհրաժեշտ լինի, տարբերակը վեր հանեն։ Ինչ է նշանակում, այսինքն՝ իրենք այդ ժամանակ չգիտեի՞ն՝ հետախուզում կա՞, թե ոչ, արտահանձնման ենթակա՞ է, թե՞ ոչ։ Հերթական շոուն են դարձրել»,- նշեց Էլբակյանը։

Նշենք, որ Արսեն Մկրտչյանը ձերբակալվել, ապա դատախազի որոշմամբ ազատ էր արձակվել՝ մինչ ձերբակալման որոշման դեմ ներկայացված բողոքի վերաբերյալ դատարանի որոշումը։ Արսեն Մկրտչյանի նկատմամբ ՌԴ-ում հարուցված քրեական գործով ևս քրեական հետապնդում է իրականացվում՝ քրեական ենթամշակույթի վերաբերյալ մեղադրանքով, ինչի համար որպես պատիժ է նախատեսված ազատազրկումը՝ մինչև 12 տարի ժամկետով։

Հեղինակ՝ Իզաբել Սահակյան

Աղբյուր` Փաստինֆո