Փաստ ինֆո

«Ցավոք, մենք, հանկարծակի, հայտնվել ենք այնպիսի հանգամանքների մեջ, որտեղ ամեն ինչ խեղաթյուրված է, բոլոր արժեքները գլխիվայր շուռ են եկել։ Ստացվում է, որ կարելի է ամեն ինչ ասել։ Ինչպես իրենք են սիրում ասել՝ ինչ ուզում են, այն էլ բանակցում են։ Ահա, այս ամենի ֆոնին, այլևս, բոլորովին զարմանալի չէ, որ Աննա Հակոբյանը կարող է համարվել նաև ինքնահռչակ հերոսածին մայր»,- «Փաստինֆո» լրատվականի հետ զրույցում ասում է հոգեբան Կարինե Նալչաջյանը` արձագանքելով Փաշինյանի այսօրվա հայտարարությանը, թե ինչո՞ւ իր կինը` Աննա Հակոբյանը, չի կարող համարվել հերոսածին մայր։

Աննա Հակոբյանը ո՛չ ավել, ո՛չ պակաս, հերոսածին մա՞յր է… Մենք աբսուրդի թատրոնի մեջ ենք հայտնվել, ասում է հոգեբանը և հավելում. «Ես շատ մեծ հարգանքով եմ վերաբերում հոգեկան հիվանդներին, որովհետև ցանկացած տեսակի հիվանդի նկատմամբ պետք է հարգալից վերաբերմունք ունենալ, սակայն, չեմ համարում, որ այս պարագայում, մենք գործ ունենք հոգեխանգարմունքի դեպքի հետ։ Այստեղ խնդիրը բարոյականության տիրույթում է՝ մենք գործ ունենք զրո բարոյականության հետ։ Հոգեկան հիվանդ մարդուն, դեռ կարելի է համապատասխան ձևով օգնություն ցույց տալ՝ բժշկական, հոգեբանական միջամտություն ցուցաբերել, բայց սա այդ դեպքը չէ։ Սա բարոյական մակարդակում ունեցած լուրջ անկումային վիճակ է, որտեղ, կրկին, ի հայտ են գալիս, խեղաթյուրված պատկերացումները։ Ինչպես որ Փաշինյանը մեկնաբանում է հայրենասիրություն երևույթը, կամ, թե ինչպես է նա պատկերացնում Հայրենիք երևույթը, նույն կերպ, հավանաբար, պատկերացնում է նաև հերոս և հերոսածին մայր հասկացությունները։ Վառ օրինակ, նա ասում է՝ որտեղ դու ապրում ես, դա քո Հայրենիքն է։ Տեսեք, թե մտքի և գաղափարի ինչպիսի «խորության» հետ գործ ունենք մենք…»,- ասում է տիկին Նալչաջյանը։

Հոգեբանը նկատում է՝ եկեք խիստ կասկածենք, թե ի՞նչ պայմաններում է Աշոտիկն անցկացրել 44 օրյա պատերազմը և ինչպիսի՞ իրադարձություններ են, իրականում, իր շուրջ կատարվել. «Այս ամենի վերաբերյալ մեզ հասած ինֆորմացիան մի քիչ այլ բնույթ ունի։ Կգա ժամանակը և մենք կիմանանք, թե քանի՞ հարյուր կամ հազար զինովորական է զոհվել՝ Աշոտիկին մարտի դաշտից անվտանգ դուրս բերելու և փրկության օպերացիան իրականացնելու համար։ Փաշինյանը «հերոսաբար» Արցախը հանձնում է թուրքին, «հերոսաբար» հայտարարում է, որ Արցախն, այլևս, Ադրբեջանի կազմում է, նույն «հերոսությամբ» նա կտոր – կտոր մեր Հայրենիքը նվիրում է թշնամուն, ուրեմն, ինչո՞ւ այս մի հերոսությունը ևս չվերագրեն իրենց։ Ավելին՝ իսկ Փաշինյանը չի՞ մտածել, արդյո՞ք, որ Աննան ոչ միայն հերոսածին մայր է, այլև հերոսի կին, չէ՞ որ այսքանից հետո, Փաշինայնը, նույնպես, «հերոս» է»,- կիսահեգնական տոնով նկարագում է հոգեբանը։

Ստացվում է, որ մենք գործ ունենք «հերոսների» ընտանիքի հետ, ասում է Կարինե Նալչաջյանը. «Ամուսինը հերոս Նիկոլն է, կինը «Էռատո» ջոկատի հերոսուհի հրամանատարը, Աշոտիկն էլ՝ իրենց հերոս որդին։ Մենք ապրում ենք խեղաթյուրված և ապականված աժեքների ժամանակաշրջանում։ Ամեն քալափոխի մտքի և մտածողության խեղճության ականատեսն ենք դառնում մենք վերջին մի քանի տարիների ընթացքում։ Ուրեմն, եկեք ավելացնենք Փաշինյանի այսօրվա հայտարարությանը, որ իր կինը, նույնպես, հերոսուհի է, իսկ ինքը՝ հանկարծահաս հերոսուհու ամուսին, մանավանդ, որ Աննա Հակոբյանի «հերոսական» կերպարն անընդհատ ասպարեզում է՝ նա որդեկորույս մայրերն, օրինակ, հորդորում է վերջ տալ իրենց ողբին։ Դե բան էր՝ անցավ - գնաց։ Երեխա էր՝ զոհվեց -գնաց, ի՞նչ կարիք կա ողջ կյանքն անցկացնել՝ սգալով որդու մահը։ Չմոռանանք նաև, որ մեզ ոչնչացնել սպառնացող թշնամուն դեմ հանդիման, չվերջացող պատերազմական իրավիճակում «հերոսուհի» Աննան և իր ամուսինն անդադար խաղության կոչեր են անում, միթե՞ սա հերոսության վառ դրսևում չէ այդ ընտանիքի և ամուսինների կողմից»,- ասում է հոգեբանը։

Ամփոփելով զրույցը` Կարինե Նալչաջյանը հիշեցնում է՝ եկեք չմոռանանք նաև, թե նույն արյունալի պատերազմի օրերին, որտեղ Աշոտիկը «հերոսական» դրվագներ էր կերտում, մեզ էին հասնում բունկերներից Աննա Հակոբյանի և իր որդու անհոգ ժպտացող լուսանկարները։ Չէ՞ որ դրանք կան, դա իրողություն է, ասում է հոգեբանն ու հավելում՝ հետաքրքիր է իմանալ, թե ի՞նչ հերոսություններ էին անում Աննա Հակոբյանն ու Աշոտիկը բունկերներում պատերազմի օրերին, որտեղից դուրս էին գալիս անհոգ ժպտացող դեմքերով նրանց լուսանկարները։

Աղբյուր` Փաստինֆո