Փաստ ինֆո

«Այսօր տեղի ունեցած Միրզոյան – Լենցով հանդիպման ընթացքում, ամենայն հավանականությամբ, ռուսական կողմը փորձել է ճշտել, թե այդ ինչպե՞ս և ի՞նչ հանգամանքերում է եղել Հակարիի կամրջին անցակետի տեղադրման թույլտվությունը, ոովհետև այդ անցակետն, ուղղակիորեն, Ռուսաստանի խաղաղապահ զորամիավորման պատասխանատվության ներքո գտնվող տարածքում է եղել,- «Փաստինֆո» լրատվականի հետ զրույցում ասել է ռազմական փորձագետ Հայկ Նահապետյանը։

Հիշեցնենք, որ այսօր ՀՀ պաշտպանության նախարար Սուրեն Պապիկյանն ընդունել է Լեռնային Ղարաբաղում Ռուսաստանի Դաշնության խաղաղապահ ուժերի նորանշանակ հրամանատար, գեներալ-գնդապետ Ալեքսանդր Լենցովին:

Կողմերը քննարկել են Լեռնային Ղարաբաղի շուրջ և խաղաղապահ զորախմբի պատասխանատվության գոտում տիրող օպերատիվ իրավիճակն ու առկա խնդիրները, Լեռնային Ղարաբաղում իրականացվող ՌԴ խաղաղապահ առաքելության արդյունավետության բարձրացմանն ուղղված մի շարք հարցեր:

ՀՀ պաշտպանության նախարարը ընդգծել է 2020 թ. նոյեմբերի 9-ի եռակողմ հայտարարության բոլոր կետերի անշեղ կատարման անհրաժեշտությունը և կարևորել Լաչինի միջանցքի շուտափույթ ապաշրջափակմանն ուղղված ջանքերի գործադրումը:

«Թող այս իշխանությունները, ստորաբար, ռուսական կողմին թիկունքից չխբեին, երբ ադրբեջանցիների հետ պայմանավորվում էին անցակետ տեղադրելու մասին։ Թող հերքեն Ադրբեջանի Արտաքին գործերի նախարար Բայրամովի՝ երեկ Ֆրանսիայի Արտաքին գործոց նախարարի հետ ասուլիսի ընթացքում արված հայտարարությունը, թե Հակարիի կամրջի անցակետի տեղադրումը եղել է հայաստանյան օրվա իշխանությունների ուղղակի թույլտվությամբ։ Որքանով տեղյակ եմ՝ հայկական կողմը դեռևս չի հերքել այս հայտարարությունը, իսկ եթե չեն հերքում, ուրեմն դա իրականություն է՝ դրանից բխող բոլոր հետևանքներով»,- ասում է ռազմական փորձագետ Հայկ Նահապետյանը։

Անդրադառնալով այսօր տեղի ունեցած Միրզոյան – Լենցով հանդիպմանը, Նահապետյանը նկատում է. «Ենթադրում եմ, որ խաղաղապահ զորամիավորման ղեկավարի պատասխանատվության տարածքն Արցախն է, ներառյալ նաև՝ 5 կմ ձգվող Բերձորի միջանցքը։ Եթե Ալեքսանդր Լենցովը հանդիպել է Արարատ Միրզոյանի հետ, ուրեմն սա նշանակում է, որ Հայաստանը 2020 թվականի նոյեմբերի 9-ի եռակողմ հայտարարության մեջ կողմ է հանդես եկել անցակետ տեղադրելու որոշմանը, այսինքն, դա տեղի է ունեցել հայաստանյան օրվա իշխանությունների ուղղակի թողտվությամբ, ինչի մասին, կրկնում եմ՝ երեկ բարձրաձայնեց Ադրբեջանի Արտաքին գործերի նախարար Բայրամովը՝ հայտարարելով, թե կար պայմանավորվածություն երկկողմանի անցակետ տեղադրելու վերաբերյալ, պարզապես, հետո հայկական կողմը հրաժարվել է։ Եթե հայկական կողմն ասում է, թե ինքն անցակետի հետ որևէ կապ չունի, ապա ինչպե՞ս և ինչո՞ւ թույլ տվեց, որպեսզի ադրբեջանցիներն իշխեն Տեղ գյուղի մոտ գտնվող բարձունքներին, որով էլ ապահովվեց այդ անցակետի թիկունքը, որպեսզի ադրբեջանական կողմը ռազմական առումով գործողություն աներ։ Սրանից հետո միայն՝ ապրիլի 23-ին անցակետը տեղադրվեց։ Ուրեմն, կարելի է վստահ ասել, որ այդ անցակետի տեղադրման համար, ի սկզբանե, Փաշինյան Նիկոլն իր համաձայնությունը տվել է, որովհետև անցակետի վերաբերյալ որևէ հարթակով՝ լինի արտաքին, թե ներքին, օրվա իշխանութունները որևէ տեսակի հայտարարություն չեն արել։ Նորից եմ կրկնում, որ մինչ այս պահը, նույնիսկ, Բայրամովի երեկ արված հայտարարության հերքումը չկա»,- ասում է Հայկ Նահապետյանը։

Ամփոփելով զրույցը, Հայկ Նահապետյանը հորդորում է ուշադրությամբ ուսումնասիրել Լեռնային Ղարաբաղում Ռուսաստանի Դաշնության խաղաղապահ ուժերի նորանշանակ հրամանատար, գեներալ-գնդապետ Ալեքսանդր Լենցովի կենսագրությունը, որից հետո պարզ կդառնա՝ նա ոչ միայն պրոֆեսիոնալ բանակցող է, այլ նաև պրոֆեսիոնալ ռազմական գործողություններ վարող։ Սա, ըստ ռազմական փորձագետի, նշանակում է, որ Արցախում ռեալ վտանգ կա, որով պայմանավորված՝ ռուսական կողմը հենց նրան է այստեղ նշանակել։

Աղբյուր` Փաստինֆո