Փաստ ինֆո

«Երբ մեկ տարի առաջ ես ու Պավլիկ Մանուկյանը՝ հանուն Արցախի դուրս եկանք փողոց, որ այսօրվա օրը չլիներ, կեղծ ընդդիմությունը դուրս եկավ մեր դեմ պայքարելու, որպեսզի Նիկոլին պահեին աթոռին, իսկ Նիկոլը կատարեր իրենց իսկ ցանկությունը՝ վաճառեր մեր Հայրենիքը և, ահա, Արցախը վաճառվեց։ Արցախի իշխանություններն էլ, իրենց հերթին, անմասն չմնացին այս դավաճանական քայլից։ Այս ամենը կանխատեսելով, մենք դուրս եկանք փողոց, որպեսզի այն կանխենք, սակայն եղավ այն, ինչ եղավ»,- «Փաստինֆո» լրատվականի հետ զրույցում ասում է «Սև հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանն, անդրադառնալով երեկ տեղի ունեցած ռազմական գործողությանը, որով Ադրբեջանը փակեց Հայաստանն Արցախին կապող Հակարիի կամուրջը, որից հետո հայտարարեց, թե այնտեղ հսկիչ- անցագրային կետ են տեղակայել:

Մեր ժողովուրդն, ինչպես միշտ, նայեց գունավոր բեմերին, բաժանած ջրին ու մի կտոր հացին և գնաց նրանց հետևից, ովքեր տարիներ շարունակ բեմադրել էին այս կապիկությունը, ովքեր հենց իրենք իշխանության էին բերել կալանավայրից վաղաժամ համաներումով ազատ արձակված Նիկոլ Փաշինյանին, որպեսզի բեմադրեին այն, ինչ կատարվում է մեզ հետ արդեն հինգը տարի շարունակ։ Նա ուներ հովանավոր, ի դեմս՝ Սերժ Սարգսյանի, Լևոն Տեր – Պետրոսյանի, Ռոբերտ Քոչարյանի և այդպես շարունակ։ Վերջապես այս ժողովուրդը պետք է հասկանա, որ այս բոլորը՝ իրար հետ միասին, վաճառեցին չքնաղ Արցախն ու Հայաստանը, ասում է Սերոբ Գասպարյանը՝ խոսելով այն մասին, թե ինչո՞ւ չհաջողվեց տապալել օրվա կապիտուլյանտ իշխանություններին և կանխեկ Արցախի հանձնումը, որ արդեն օրախնդիր է դարձել մեզ համար։

Սա դեռ սկիզբն է ցավերի, ասում է Սերոբ Գասպարյանը և հավելում՝ Նիկոլն ու Ալիևը պասերով են աշխատում, նրանք նաև այդպես խոսում են։ Ալիևը հայտարարում է՝ կընդունե՞ք Ադրբեջանի քաղաքացիությունը, մնացեք և ապրեք, չե՞ք ցանկանում՝ հեռացեք։ Սա, ըստ բանախոսի, հստակ պայմանավորվածության արդյունք է, որ ունեն օրվա ազգադավ իշխանությունները՝ թշնամի երկրի ղեկավարի հետ։ Սակայն հույսը վերջում է մահանում, ասում է ազատամարտիկը. «Արցախն ինչպես որ՝ երբեք չի եղել Ադրբեջանի կազմում, այնպես նաև հիմա և երբեք չի լինելու և դրանում մեզ օգնության է գալու մեր հավատը։ Միաժամանակ, քանի դեռ մեր երկրում կան իրենց հողը սիրող ազնիվ հայորդիներ, քանի դեռ նրանք չեն հեռացել այս երկրից ու պատրաստ են հանուն Հայրենիքի շարունակել պայքարը, այս երկիրը չի հաջողվելու խլել մեզանից։ Ադրբեջանն, ի վերջո, կործանվելու է, իսկ Արցախը միանալու է Մայր Հայրենիքին։ Սա է լինելու մեր վերջնական հաղթանակի արդյունքը, սակայն, սրան հասնելու համար մենք պետք է կարողանանք պայքարել և անենք դա ազնիվ, առանց հայրենավաճառների հետ մեր Հայրենիքը սակարկելու»,- ամփոփելով զրույցն, ասում է «Սև հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանը։

Աղբյուր` Փաստինֆո