Փաստ ինֆո

Վերջին երկու տարում Հայաստանի գահավիժումը դեպի անունդ և որպես պետականության կորուստ՝ աննախադեպ տեմպերով է զարգանում: Պարզվեց, որ այս իշխանությունները բանավոր պայմանավորվածություն ունեն այն հատվածներում, որոնք հիմա ադրբեջանցին զավթել է և ստացվում է, որ այն ագրեսիան, որը տեղի ունեցավ օրերս՝ ինչ-որ ձևով Ադրբեջանի կողմից լեգիտիմացված գործողություն էր: «ՓաստԻնֆոյի» եթերում ասել է Ադրբեջանի հարցերով փորձագետ Գառնիկ Դավթյանը:

Փորձագետի կարծիքով, ադրբեջանցիները հիբրիդային պատերազմի տեսքով մի քանի նպատակ ունեն: Առաջինը, ադրբեջանական կողմի փոքր հարվածները ՀՀ տարածքին, բանակին՝ նպատակ ունեն Հայաստանի հանրության մոտ վախի մթնոլորտը խորացնելուն: Երկրորդ, թշնամու նման առաջխաղացումը նպատակ ունի խոցելու այն սպառազինությունը, որը Հայաստանը կուտակել է մինչև 44-օրյա պատերազմը: «Եվ Ադրբեջանը, նման գործողություններով մի ինչ-որ իքս ժամանակ, երբ Հարավային Կովկասում աշխարհաքաղաքական շահերը կդասավորվեն ի օգուտ իրենց՝ մեծ ռազմական գործողություններ կսկսի. մենք այդ ժամանակ չենք ունենա նորմալ սպառազինություն, հասարակության վերաբերմունքը բանակի նկատմամբ բավական թույլ կլինի»,- նշեց Գ. Դավթյանը:

Բանախոսի խոսքերով, Եվրոպան պարզ ու անկեղծ ասում է՝ մենք ձեզ չենք օգնելու նյութապես, բարոյական կաջակցենք: Իրենք առաջնորդվում են զենքով և մարդով: Մարդը՝ կռվելու համար է, զենքը՝ երկիրը պաշտպանելու: Այս պարագայում Հայաստանը փորձում են վերածել փոքր Ուկրաինայի կամ Սիրիայի:

Անդրադառնալով ադրբեջանցիների ներթափանցմանը Հայաստան, ադրբեջանագետը մտահոգություն հայտնեց, որ նման ներհոսքը Հայաստանում կարող է ոչ միայն ներքաղաքական ճնշման օղակ լինել, այլ նաև ահաբեկչություն իրականացնեն՝ Հայաստանի տարբեր համայնքներում: Նման տարօրինակ ներթափանցումները Հայաստանում 2020թ.-ից հետո շատացել են, և մտավախություն կա, որ նման ներթափանցմամբ, գուցե ինչ-որ գյուղական համայնքում քարի կամ ծառի տակ զենք թաքցնեն, և ինչ-որ 5 տարի հետո, երբ որ այսպես կոչված սահմանների բացում լինի Հայաստանի, Ադրբեջանի և Թուրքիայի միջև, որևէ ձևով հային ատող ադրբեջանցին այդ զենքով փոքր ահաբեկչություն իրականացնի:

Անդրադառնալով Հայաստանի տարածքում ԵՄ առաքելությանը, բանախոսը նշեց, որ առաքելությունը ի սկզբանե իրեն սպառել էր: Այն առաքելությունը, որը զենք չունի և կոնկրետ հանձնարարականներ չունի ՀՀ տարածքի ներսում բացի այն, որ դրսից իրենց ղեկավարների կողմից ինչ որ հանձնարարություններ ունի՝ այդ առաքելությունը ի սկզբանե ձախողված էր: «Հասարակության մոտ իշխանական քարոզչական թևը հետևյալ կերպ է աշխատում՝ քանի ԵՄ առաքելությունը Հայաստանում է՝ պատերազմ չի լինի, բայց ԵՄ դիտորդները զենք չունեն, միայն հեռադիտակ ունեն: 90-ականներից սկսված՝ ամերիկական կողմի ներգրավվումը եղել է հետևյալ տրամաբանությամբ՝ ամեն գնով Հայաստանին և Թուրքիային հաշտեցնենք, որպեսզի Ռուսաստանի ազդեցությունը Հարավային Կովկասում վերանա:

Եվրոպական միությունը շարժվել է՝ իրավիճակից ելնելով»,- եզրափակեց Գ. Դավթյանը:

Մանրամասները՝ տեսանյութում:

Աղբյուր` Փաստինֆո