Փաստ ինֆո

Պետք է հասկանանք, որ այն, ինչը կատարվում է Հայաստան-Ադրբեջան գծի վրա՝ ոչ միայն այս երկու երկրների հետ է կապված, այլ նաև՝ Իրանի և Ռուսաստանի հետ։ Այսինքն, ոչ թե այդ երկրների գործողությունների հետ, այլ այդ երկրների դեմ։ «Փաստինֆոյի» եթերում ասել է կովկասագետ, Տարածաշրջանի հարցերի փորձագետ, «Հայկական նախագիծ» գիտակրթական ՀԿ համահիմնադիր Կարեն Իգիթյանը։

Փորձագետի խոսքերով, Իրանի դեմ հակամարտության առաջին գիծը Իսրայելն է պահում, երկրորդը՝ ԱՄՆ-ն։ Ինչ վերաբերում է Ռուսաստանին՝ արևմտյան երկրները աշխատում են տարածաշրջանում Ռուսաստանի դեմ և դա ուղիղ ասում են։ Հետաքրքիր էր Կանադայի հայտարարությունը, որ պատրաստվում է Հայաստանում դեսպանատուն բացել ոչ թե նրա համար, որ հայ-կանադական հարաբերությունները զարգացնի, այլ նրա համար, որ Ռուսաստանի ազդեցությունը նվազեցնի։

«Եթե հիշենք Ջ․ Բոլթոնի այցը Հայաստան 2018 թ․՝ նա մի քանի հայտարարություն արեց, որոնցից մեկը այն էր, որ ԱՄՆ-ն մաքսիմալ ճնշելու է Իրանին։ Այսինքն, տարածաշրջանի երկրներին ասում էր, որ պետք է պատրաստ լինեք նաև նրան, որ պետք է սահման չունենաք Իրանի հետ։ Շատերը ճիշտ չհասկացան, թե նա ինչ նկատի ուներ, բայց հետո մենք տեսանք, որ ադրբեջանական զորքերը եկան և անցան այդ հարավային ճանապարհով, հասան մինչև Մեղրի, և հիմա ընդամենը 40 կմ է հայ-իրանական սահմանը, և այն ճանապարհը, որը մինչև այդ աշխատում էր և կապում էր Հայաստանը Իրանի հետ՝ հանձնվել է Ադրբեջանին։ Այն, ինչը Բոլթոնը ասում էր 2018 թ․՝ 2020թ․ իրականություն դարձավ»,- նշում է Կ․ Իգիթյանը։

Բանախոսի դիտարկմամբ, Ադրբեջանի և Իրանի լարված իրավիճակը միայն Բաքվում և Թեհրանում չի որոշվել։ Ադրբեջանի դերը այս էսկալյացիայում նախատեսված է այսպես՝ Ադրբեջանը պետք է հողի վրա կռվի, իսկ արդեն օդուժով կամ այլ ձևով Իսրայելը և ԱՄՆ-ն կաջակցեն։ Բայց սա շատ վտանգավոր է, որովհետև եթե նրանք հաջողության չհասան՝ ոչ թե ադրբեջանական դրոշն է լինելու Թավրիզում, այլ իրանական դրոշը՝ Բաքվում։

Անդրադառնալով 3+3 ձևաչափի վերաբերյալ Ս․ Լավրովի հայտարարությանը, բանախոսը նշեց, որ դա Հայաստանին ձեռնտու ֆորմատ չէ։ Ռուսաստանը տեսնում է Հայաստանի դե ֆակտո իշխանությունների փորձը՝ ներգրավվել Արևմուտքը, և Ռուսաստանը ակնհայտ ասում է, որ Արևմուտքը ցանկանում է մտնել այս տարածաշրջան, ոչ թե որ տարածաշրջանային երկրներին լավ լինի, այլ հանդես գան Ռուսաստանի և Իրանի դեմ։ Կովկասագետի խոսքերով, ՀԱՊԿ-ը Հայաստանից դուրս չի գալիս՝ ՀԱՊԿ-ին դուրս են մղում։ Հետ վերադառնալով Բոլթոնի այցին՝ նա ասաց, որ Հայաստանում իրեն լավ է զգում այնպես, ինչպես 1997թ․, այսինքն Փաշինյանի և Տեր-Պետրոսյանի իշխանությունը նույնականացրեց։

«Հայաստանի վարչապետը պատրաստվում է Ադրբեջանի հետ փաստաթուղթ ստորագրել, որը Հայաստանին ձեռնտու չէ՝ հերթական կապիտուլյացիան է։ Նա ներքին դաշտին համոզում է, որ չունենք դաշնակից, բանակ, Ադրբեջանը ցանկանում է ցեղասպանություն իրականացնել։ Սակայն այդ փաստաթուղթ ևս ավարտվելու է հերթական ռազմական ագրեսիայով»,- եզրափակեց Կ․ Իգիթյանը։
Մանրամասները՝ տեսանյութում։

Աղբյուր` Փաստինֆո