Փաստ ինֆո

Երևանի քաղաքապետ Հրաչյա Սարգսյանը արտահերթ գործակարգավարական նիստում հայտարարեց իր հրաժարականի մասին։ Դիմելով քաղաքապետարանի աշխատակազմին և երևանցիներին Սարգսյանը նշեց.

«2021 թ-ի վերջին Երևանի ավագանու որոշումով ստանձնեցի մայրաքաղաք Երևանի քաղաքապետի պաշտոնը։ Դա տեղի ունեցավ համայնքի համար կառավարման բարդ ժամանակաշրջանում, բարդ էր նաև այդ ժամանակաշրջանում ընդհանուր քաղաքական վիճակը, կային քաղաքային խնդիրներ նույնպես։

2018-ին «Իմ քայլը» դաշինքի նախընտրական ծրագրում մենք ունեինք հրապարակված նպատակներ, որոնք պետք է իրագործեինք և ես պատասխանատվություն ստանձնեցի, որ շարունակենք այդ ծրագրի իրականացման աշխատանքները, Իհարկե, այդ ծրագրերը շարունակելու համար 2 անհրաժեշտ կոմպոնենտ կար, որն ապահովված չէր՝ առաջինը՝ կառավարության և Երևան քաղաքի միջև համագործակցությունն էր, որը որպես այդպիսին խզվել էր, և երկրորդը՝ արդեն նշեցի, որ 2018 թվականի «Իմ քայլը» դաշինքի ծրագրերն էին, որ պետք է իրականցվեին։

Եվ հիմա, երբ ավագանու ընտրությունները բավականին մոտ են, իսկ քաղաքակապետարանի և կառավարության միջև համագործակցությունը կարող եմ ասել, որ բավականին լավ է և ոչ մի խոչընդոտ չունենք, ես ուզում եմ հայտնել իմ հրաժարականի մասին՝ միևնույն ժամանակ հայտնելով, որ շարունակելու եմ աշխատել քաղաքական թիմի հետ, շարունակելու եմ աշխատել մեր պետության կայունության և զարգացման ուղղությամբ։ Բոլորիդ հայտնի է, որ ՔՊ կուսակցության Երևանի քաղաքապետի թեկնածուն պարոն Տիգրան Ավինյանն էր և ցուցակը գլխավորելու է պարոն Ավինյանը։

Հույս ունեմ, որ ՔՊ-ն կստանա երևանցու վստահության քվեն և հնարավորություն կունենանք շարունակել մեր համայնքի համար գերակա կարևոր ծրագրերը, որը սկսել ենք համատեղ՝ դեռ 2018-ից։ Յուրաքանչյուրս մեր տեղում կատարել ենք աշխատանք և թողնում ենք հաջորդին, որ հաջորդը շարունակի այդ աշխատանքը։ Քաղաքաների, պետությունների հաջողությունը կայանում է նրանում, որ յուրաքանչյուր իշխանություն իրականացնում է ինչ-որ աշխատանք և հերթափոխով տալիս է մյուսին, որպեսզի շարունակի այդ աշխատանքը, որը կատարվել է։ Կարծում եմ՝ այս 4.5 տարվա ընթացքում, մենք՝ «Իմ քայլը» դաշինքի ծրագրի բավականին մեծ մասն իրականացրել ենք, իհարկե, տարբեր խոչընդոտներ են ի հայտ եկել իրականացման փուլում, բայց ակնհայտ է, որ կան փոփոխություններ և այդ փոփոխություններն օր օրի ավելի տեսանելի են լինելու, սկսած՝ տրանսպորտի ոլորտից, որն ամենակարևոր հարցն է Երևանում, կանաչապատման ոլորտում, սոցիալական, իրավական, քաղաքաշինական ոլորտներում։ Այո՛, կան բացթողումներ, բայց ես ուրախ եմ, որ եթե մենք համեմատում ենք 2018-ից հետո, տեսնում ենք, որ արդեն քաղաքացիների ակնկալիքները քաղաքային իշխանություններից այլ հարցադրումների ներքո են և դա գոհացուցիչ է։ Կարծում եմ՝ երևանցիները պետք է լինեն նույն պահանջատիրությամբ, որպեսզի մենք կարողանանք այն ծրագրերը, որոնք ունենք, իրականացնել»,- նշեց քաղաքապետը։

Մանրամասները՝ տեսանյութում։

Աղբյուր` Փաստինֆո