Փաստ ինֆո

Փետրվարի 18-ին Մյունխենում տեղի ունեցած Փաշինյան-Ալիև-Բլինկեն եռակողմ հանդիպումից կարելի է ենթադրել, որ հայկական կողմը պատրաստ է ստորագրել խաղաղության պայմանագրի արևմտյան տարբերակը: Այս մասին «Փաստինֆո»-ի տաղավարում ասաց Սթենֆորդի համալսարանի քաղաքագիտության դոկտոր Արթուր Խաչիկյանը՝ պատասխանելով հարցին, թե ինչու Հայաստանի իշխանությունը նախորդ տարեվերջին հրաժարվեց ՌԴ նախաձեռնությամբ կայանալիք Հայաստանի և Ադրբեջանի արտաքին գործերի նախարարների հանդիպումից, իսկ Բլինկենի առաջարկն ընդունեց:

«Արցախի ժողովրդի ապագան Արևմուտքին չի հետաքրքրում, էթնիկ զտումը, որը 100 տոկոս լինելու է, ևս Արևմուտքին չի հետաքրքրում, որևէ ռեալ երաշխիք Հայաստանին չեն տալիս, միայն խոսվում է ապստրակտ խաղաղության մասին, այն էլ՝ 1991 թվականի քարտեզներով, որը Արևմուտքը չունի, այդ քարտեզները Մոսկվայի Գլխավոր շտաբում են պահվում»,- նշեց նա։

Գործող իշխանությունների անտրամաբանական քայլերի ու վարած անհեռատես քաղաքականության ֆոնին, Ադրբեջանի ախորժակն օրեցօր ավելի ու ավելի է մեծանում: Բաքվի բռնապետը չի էլ թաքցնում, որ Արցախին տիրանալուց հետո Սյունիքը, Սևանն ու Վարդենիսն է պահանջելու: Իսկ ամենազավեշտալին այն է, որ թշնամին հստակ ձևակերպում է իր նպատակներն ու մեր ինքնիշխան տարածքների նկատմամբ ունեցած նկրտումները, մինչդեռ Հայաստանի իշխանությունները համառորեն լռում են:

«Նրանք ասում են՝ ինչ են ուզում, մենք ինչ ենք ասում, ես չգիտեմ: Մենք խոսում ենք ինչ-որ անվտանգության երաշխիքների մասին և մոռանում ենք, որ այդ բառերի ներքո ցեղասպանվեց արևմտահայությունը, երբ մեզ ասում են՝ անվտանգության երաշխիք ենք տալիս, դա նշանակում է, որ մեզ մորթելու են, այդպես եղավ 19-րդ դարի վերջում՝ Համիդյան ջարդերի և 1915 թվականի ցեղասպանության ժամանակ, երբ Եվրոպան երաշխիք տվել մեզ»,-ընդգծեց Խաչիկյանը:

Նրա խոսքով՝ Արցախը հանձնելուց հետո շատ կարճ ժամանակ անց նույն ճակատագիրն է սպասվում նաև Հայաստանին: Իսկ այդ ժամանակ ոչ ֆրանսիացի ժանդարմները, ոչ էլ Հայաստանում ԵՄ դիտորդական առաքելության զեկույցները չեն կարող Ադրբեջանին ու Թուրքիային հետ պահել իրենց ցեղասպան քաղաքականությունից:

«Թուրքերը մեզ կարող են փաստի առաջ կանգնեցնել Սյունիքում: Ինչ ուժեր ունի Արևմուտքը դրա դեմ՝ չգիտենք: Ինչ-որ ժանդարմներ են գալիս, եթե ինչ-որ կատակերգություն նկարվեր կհասկանայի՝ ինչու են այստեղ ժանդարմներ գալիս, ատրճանակներով և թուղթ ու գրիչով զինված մարդիկ մեզ ինչպես են պաշտպանելու ադրբեջանական բայրաքթարներից և տանկերից, այն դեպքում, երբ Ուկրաինային ռեալ զինում են, թող Ուկրաինա ժանդարմ ուղարկեն»,- ասաց նա:

Քաղաքագիտության դոկտորի կարծիքով՝ մենք շատ վտանգավոր աշխարհում ենք ապրում և նման ներկայացումների ժամանակ չունենք, բացի այդ՝ մենք մեկ անգամ արդեն տեսել ենք եվրոպական երկրների լռությունը. 2 տարի առաջ, երբ Ադրբեջանը հայկական բնակավայրերի ուղղությամբ ֆոսֆորային զենք էր կիրառում այդ նույն Եվրոպան շարունակում էր հայտարարություններով «դատապարտել» այնպես, ինչպես Բերձորի միջանցքը ապօրինի փակած Ադրբեջանին ու կեղծ բնապահպաններին, որոնց անվան տակ իրականում ադրբեջանական հատուկջոկատայիններ են թաքնված:

Հարցազրույցն ամբողջությամբ՝ տեսանյութում:

Աղբյուր` Փաստինֆո