Փաստ ինֆո

Առաջարկվող փոփոխությունները կարող են հանգեցնել դրամային վարկավորման տոկոսադրույքների բարձրացմանը, էական ազդեցություն կունենա ոչ միայն ֆինանսական համակարգի, այլ նաև տնտեսության իրական հատվածի վրա  Նման տեսակետ է հայտնել բանկերի միության ներկայացուցիչը։  «Փաստինֆո»-ն հարցում էր ուղարկել Հայաստանի բանկերի միությանը՝ արտարժույթով տրամադրվող վարկերի արգելքի նախագծի վերաբերյալ ՀԲՄ դիրքորոշումը պարզելու համար: Մեր հարցերին պատասխանել է ՀԲՄ գործադիր տնօրենի տեղակալ Արման Սարգսյանը:

-Պարոն Սարգսյան, երեկ ԱԺ ֆինանսավարկային և բյուջետային հանձնաժողովը հավանության արժանացրեց Գևորգ Պապոյանի, Արուսյակ Մանավազյանի ու Նարեկ Գրիգորյանի հեղինակած «Արժութային կարգավորման և արժութային վերահսկողության մասին» օրենքում փոփոխություններ կատարելու մասին օրենքի նախագիծը։ Այդ նախագծի վերաբերյալ քննարկում եղե՞լ է Հայաստանի բանկերի միության ղեկավար կազմի հետ, ի՞նչ ձևաչափով:

-Նախագծով նախատեսվող փոփոխությունների վերաբերյալ հարցերը քննարկվել են, և Հայաստանի բանկերի միության դիրքորոշումը ներկայացվել է Կենտրոնական բանկ։

-Ձեր կողմից ի՞նչ փոփոխություններ և առաջարկություններ են ներկայացվել:

-Պետք է նկատել, որ արտարժութային վարկավորման դեպքում ՀՀ կենտրոնական բանկի կողմից արդեն իսկ ներդրված են զսպող նորմատիվներ։

Ունենալով հստակ անհամաձայնություն նախագծով առաջարկվող փոփոխություններին՝ մեր կողմից եղել է առաջարկ, որ եթե այնուամենայնիվ նախագիծն ընդունվի, ապա հաշվի առնվեն ներկայացված նվազագույն ներքոհիշյալ փոփոխությունները․

•  Չսահմանափակվի անհատ ձեռնարկատերերի արտարժութային հիփոթեքային վարկավորումը  (առաջարկն ընդունվել է)։

•  Չարգելվի ոչ ռեզիդենտներին արտարժութային հիփոթեքային կրեդիտի տրամադրումը (առաջարկն ընդունվել է)։

•  Հիմնավորված արտարժութային եկամուտ ունեցող ռեզիդենտների համար  չարգելվի արտարժութային հիփոթեքային վարկավորումը։

•  Նախագծով առաջարկվող կարգավորումներն իրականացնել փուլային եղանակով՝ ըստ որոշակի երկարաժամկետ ժամանակացույցի, սահուն անցում կատարելու նպատակով։

-Ինչպիսի՞ն է Ձեր դիրքորոշումը այս փոփոխության վերաբերյալ, ինչպես այն կանդրադառնա ՀՀ քաղաքացիների, տնտեսվարողների և մասնավորապես բանկային համակարգի վրա:

-Նախագծով առաջարկվող փոփոխությունները ֆինանսական կառույցներում հնարավոր է հանգեցնեն ռիսկերի մեծացման՝ պայմանավորված ներգրավված և տրամադրված միջոցների արտարժութային անհամապատասխանությամբ, ինչն իր հերթին կարող է հանգեցնել դրամային վարկավորման տոկոսադրույքների բարձրացմանը և որպես հետևանք հնարավոր է նաև հիպոթեքային վարկավորման հասանելիության նվազում։

Նախագծով կտրուկ ու իմպերատիվ արգելափակումը սահմանափակում է այն ռեզիդենտ քաղաքացիների հիպոթեքային վարկ ստանալու հնարավորությունը, ովքեր իրենց եկամուտը ստանում են արտարժույթով  (որի տոկոսադրույքն ավելի ցածր է)։

Դիտարկվող փոփոխությունները կարող են էական ազդեցություն ունենալ ոչ միայն ֆինանսական համակարգի, այլ նաև տնտեսության իրական հատվածի վրա։ 

Պետք է ընդգծեմ այն փաստը, որ բանկերը մշտապես իրականացնում են իրենց գործունեության ռազմավարական ու մարտավարական պլանավորում, որը հիմնարար կարևորություն ունի բանկային համակարգի կայունության ապահովման համար։ Այս հարցի համատեքստում ակնհայտ է, որ վարկավորում իրականացնելուց առաջ բանկերը վերլուծում են ոչ միայն անձի վարկունակությունը, այլև արտարժութային փոփոխությունների հնարավոր ազդեցությունը հաճախորդի վարկունակության վրա։ Արդյունքում՝ եթե բանկի գնահատմամբ արտարժութային որոշակի փոփոխությունները հետագայում էապես կարող են ազդել հաճախորդի կողմից վարկի հետագա սպասարկման վրա, ապա բանկն ինքը մերժում է վարկավորումը կամ առաջարկում դրամային վարկավորում։

Աղբյուր` Փաստինֆո