Փաստ ինֆո

ԵԽ հունվարի 16-19-ը տեղի ունեցած լիագումար նստաշրջանում (հունվարի 18-ին) ընդունվել է «Ընդհանուր արտաքին և անվտանգային քաղաքականության իրականացում» 2022 թվականի տարեկան զեկույցը, որը զեկուցել է արտաքին հարաբերությունների հանձնաժողովի նախագահ Դեյվիդ Մքալիստը: Այս մասին կառավարության նիստում հայտարարեց ՀՀ վարչապետ Նիկոլ Փաշինյանը:

Նա նշեց, որ ընդունված փաստաթղթում չափազանց կարևոր արձանագրումներ կան մեր տարածաշրջանի և ՀՀ մասին:

«Զեկույցը խստորեն դատապարտում է Հայաստանի ինքնիշխան տարածքի նկատմամբ Ադրբեջանի՝ 2022 թվականի սեպտեմբերի ագրեսիան, որը գնահատել է որպես զինադադարի խախտում և բացասական հետևանքներ ունեցող խաղաղության գործընթացի համար ակցիա: Այն վերահաստատել է, որ Հայաստանի տարածքային ամբողջականությունը պետք է լիարժեքորեն հարգվի և կոչ է արել ադրբեջանական իշխանություններին անմիջապես դուրս բերել զորքերը Հայաստանի բոլոր տարածքներից»,- նշել է ՀՀ վարչապետը:

Փաստաթղթում ասվում է, որ ռազմական միջոցներով Հայաստանի և Ադրբեջանի միջև կայուն խաղաղության հասնել հնարավոր չէ և, որ դա պահանջում է համապարփակ քաղաքական կարգավորում, միջազգային իրավունքին համապատասխան՝ ներառյալ ՄԱԿ-ի կանոնադրությունը, ԵԱՀԿ 1975 թվականի Հելսինկյան եզրափակիչ ակտը, ինչպես նաև ԵԱՀԿ Մինսկի խմբի 2009 թվականի հիմնարար, տարածքային ամբողջականության, ինքնորոշման և ուժի չկիրառման սկզբունքները:

Հրապարակված զեկույցում խոսվում է նաև Ադրբեջանի ԶՈՒ կողմից հայ ռազմագերիների ու քաղաքացիական անձանց պատերազմական գործողությունների մասին և ընդգծվում, որ Հայաստանի և Ադրբեջանի միջև համապարփակ խաղաղության պայմանագիրը պետք է հասցեագրի հակամարտության արմատական պատճառները, ներառյալ ԼՂ-ում ապրող հայ բնակչության իրավունքներն ու անվտանգությունը, տեղահանված անձանց ու փախստականների վերադարձը մշակութային, կրոնական ու պատմական ժառանգության պաշտպանությունն ու պահպանումը, ինչպես նաև տարածքային ամբողջականությունը:

Եմ պատգամավորները զեկույցում ողջունում են Ադրբեջանի հետ սահմանին ԵՄ քաղաքացիական առաքելության տեղակայումը և ԵՄ խորհրդին կոչ անում՝ ընդլայնել տեղակայված փորձագետների բանակը, ավելացնել առաքելության կարողությունները, ամրապնդել ներկայությունը տարածաշրջանում:

«Այն խստորեն դատապարտում է Ադրբեջանի կողմից Լաչինի միջանցքի ապօրինի շրջափակումը, որը 2020 թվականի նոյեմբերի 9-ի եռակողմ հայտարարության խախտում է, քանի որ այն կարող է ստեղծել կանխամտածված մարդասիրական ճգնաժամ համապատասխան ԼՂ ժողովրդի համար, պահանջում է Ադրբեջանի իշխանություններից անհապաղ վերականգնել Լաչինի միջանցքով ազատ տեղաշարժը, հիշեցնում է, որ միայն դիվանագիտական միջոցներով է հնարավոր հասնել խնդրի կարգավորման՝ հօգուտ Հայաստանի և Ադրբեջանի բնակչության»,- մեջբերեց Փաշինյանը:

Զեկույցն ընդունվել է 407 կողմ, 92 դեմ, 142 ձեռնպահ ձայների հարաբերակցությամբ:

Աղբյուր` Փաստինֆո