Փաստ ինֆո

2022թ թվականն աչքի է ընկել բավականին ցայտուն արտահայտված անոմալ եղանակայյին ռեժիմով, չենք ունեցել մի ամիս, երբ ջերմաստիճանն ու տեղումները լինեն նորմայի սահմաններում։ Այս մասին հրավիրված մամուլի ասուլիսին ասաց Շրջակա միջավայրի նախարարության Հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանը։

Սուրենյանը հիշեցրեց, որ ունեցել ենք շատ տաք փետրվար, որին հաջորդել է շատ ցուրտ մարտը, ինչն ուղեկցվել է ձյան տեղումներով, մասնավորապես, մարտի 20-25-ին առատ տեղումներ էին, եղել են վայրեր, երբ ձյան բարձրությունը հասել է 1-1.5 մետրի, դրան հաջորդել են տաք ապրիլ, ցուրտ մայիս, երբ մայիսի 24-25-ին ձյուն տեղաց, գրանցվեցին ցրտահարության դեպքեր, հունիս-օգոստոս ամիսներին եղել է շատ շոգ, երկու ամիս շարունակ Արարատյան դաշտավայրում գրեթե տեղումներ չեն գրանցվել, սեպտեմբերի առաջին տասնօրյակում էլ ռեկորդային բարձր ջերմաստիճան է գրանցվել, հաջորդ երեք ամիսները՝ հոկտեմբերը, նոյեմբերը, դեկտեմբերը եղել են տաք, տեղումների քանակը եղել է նորմայից պակաս։ Ընդհանուր առմամբ, ունեցել ենք տաք և սակավ տեղումներով տարի։

Ինչ վերաբերում է առաջիկա օրերի կանխատեսումներին, ապա Սուրենյանը տեղեկացրեց, որ տևական ժամանակ է, ինչ մեր երկիրը գտնվում է բավականին հզոր անտիցիկլոնային գոտում, ինչի ազդեցությունը կպահպանվի։

«Մինչև հունվարի հինգը ներառյալ մեր երկրում կպահպանվի այդ անտիցիկլոնի ազդեցությունը։ Այն բոլոր մարզերում ապահովելու է պարզ երկինք ու առանց տեղումների եղանակ։ Հունվարի 1-ին Աֆրիկայից ունենք արևադարձային օդային տաք հոսանքների բավականին բուռն ներհոսք, դրան չեն արձագանքի միայն Արարատյան դաշտն ու Երևանը, քանի որ այստեղ արդեն ունենք սառը օդի լճացում, որն արգելափակելու է այդ տաք օդային հոսանքների ներթափանցումը։ Սակայն հանրապետության մյուս շրջաններում օդի ջերմաստիճանը հունվարի 1-3-ը բարձրանալու է մոտ 5-6 աստիճանով։ Լեռնային գրեթե բոլոր մարզերում ցերեկային ժամերին կգրանցվի դրական ջերմաստիճան, որը կհասնի մինչև +6 աստիճանի, նախալեռնաին շրջաններում՝ +10 աստիճանի, Սունիքի ու Տավուշի հովտային շրջաններում կգրանցվի +16-+17 աստիճան տաքություն, որը կլիմայական նորմայից բարձր է 8-10 աստիճանով»,-ասաց Սուրենյանը։

Աղբյուր` Փաստինֆո