Փաստ ինֆո

Երբ լաչինի միջանցքը փակ է, այնտեղ ռուս խաղաղապահներն են, նման դեպքում չգնալ Ռուսաստան՝ բանակցությունների, չգիտեմ՝ ի՞նչ որակեմ այս քայլը: «Փաստինֆո»-ի հետ զրույցում ասել է քաղաքագետ Ստեփան Դանիելյանը:

Ինչպես հայտնի է՝ հայկական կողմը հրաժարվել է մասնակցել Մոսկվայում նախատեսված՝ եռակողմ հանդիպմանը՝ Ռուսաստանի, Ադրբեջանի ու Հայաստանի արտգործնախարարների մասնակցությամբ։ Ինչպես պաշտոնական հաղորդագրություններից է պարզ դառնում՝ կողմերը պետք է քննարկեին խաղաղության պայմանագրին առնչվող հարցեր:

ՀՀ ԱԳՆ-ն պարզաբանել է, որ հայկական կողմը խնդրել է հետաձգել Հայաստանի, Ռուսաստանի և Ադրբեջանի ԱԳ նախարարների հանդիպումը՝ հաշվի առնելով Լաչինի միջանցքում առկա իրավիճակը:

«Փաստինֆո»-ի հետ զրույցում քաղաքագետ Ստեփան Դանիելյանը նշեց, որ իր համար անհասկանալի է հայկական կողմի այս քայլը: Այսպիսով այաստանը, ըստ նրա, սառեցնում է հարաբերությունները Ռուսաստանի հետ։

«Հիմա ամենակարևոր խնդիրը Լաչինի միջանցքի փակ լինելն է: Արցախում ռուս խաղապահներն են: Նման իրավիճակում բանակցություններին չգնալն ինձ համար որևէ կերպ ընկալելի չէ: Պետք է այլ մոտիվներ գտնել՝ ինչո՞ւ են սրում Ռուսաստանի հետ հարաբերությունները, եթե ինչ-որ հարցեր կան, որոնց հետ համաձայն չեն, կարող են գնալ այնտեղ և անհամաձայնությունը հայտնել կամ սեփական օրակարգն առաջ տանել»,-ասաց Դանիելյանը:

Քաղաքագետի դիտարկմամբ՝ ՌԴ-ի հետ շփումներից հրաժարվելը ինչ-որ այլ բան է նշանակում:

Զրուցակիցը չի բացառում նաև, որ սա Մեծ Բրիտանիայի գաղտնի հետախուզական ծառայության ղեկավար Ռիչարդ Մուրի Երևան այցի հետ կարող է կապված լինել:

«Գուցե հենց այդտեղ է պայմանավորվածություն է ձեռք բերվել, որ սառեցվի հարաբերությունները Ռուսաստանի հետ, իսկ թե դրանից հետո ինչ կլինի, կարող ենք միայն ենթադրություններ անել»,-ասաց նա:

Հարցին՝ գուցե հայկական կողմի համար խաղաղության պայմանագրին առնչվող անընդունելի հարցեր պետք է քննարկվեին, դրա համար են փորձել խուսափել կամ գոնե ժամանակ են փորձել շահել այսպիսով, քաղաքագետն արձագանքեց.

«Հայկական կողմը գոյություն չունի, կա Նիկոլ Փաշինյան անձ, որն ամեն ինչ որոշում է: Իսկ Փաշինյանը ոչ թե բանակցությունները փակուղի է մտցնում, այլ վտանգի է մատնում Արցախի բնակչությանը, որպեսզի էթնիկ զտումների ենթարկվեն նրանք: Փաշինյանը այդ քաղաքականությունն է վարում, իսկ այլ քաղաքական ինստիտուտներ չկան Հայաստանում »:

Հարցին՝ ի վերջո ի՞նչ հանգուցալուծում է տեսնում Լաչինի միջանցքում ստեղծված իրավիճակին, հնարավո՞ր համարում է, որ ինչ-որ փուլում ռուս խաղաղապահները որոշեն, ի վերջո, ուժի միջոցով հարցը լուծեն, քաղաքագետն ասաց, որ չի կարծում, թե ռուս խաղաղպահները նման քայլի կգնան.

«Այլ հարց է, որ ադրբեջանական կողմը նրանց սադրի ու նման իրավիճակում դնի, որպեսզի այլ քայլ չունենան անելու: Եթե ձեր վրա կրակում են, կամ ինքնապաշտպանության պետք է դիմեք կամ պետք է զոհվեք»,-ասաց քաղաքագետը:

Իսկ թե սա ինչ հետևանքներ կունենա, արդյո՞ք այս դեպքում արդեն Թուրքիան էլ չի միջամտի և այն տարածաշրջանային պատերազմի չի վերածվի, Դանիելյանն ասաց. «Կարող է Թուրքիան էլ միջամտել, Իրանն էլ միջամտել, կամ կարող է և չմիջամտեն, կախված է իրադարձություններից»:

Աղբյուր` Փաստինֆո