Փաստ ինֆո

Վտանգված է մեր գոյությունը, ուստի հասարակությունը պետք է, ի վերջո, իր վախերը, ինքնաարդարացումները թողնի մի կողմ և կարողանա համախմբվել միակ և բացառիկ գաղափարի շուրջ։ Դա վերաբերում է հասարակության բոլոր շերտերին։ Սա արդեն ազգային-ազատագրական պայքար է։ Այդ մասին «Փաստինֆո»-ի հետ զրույցում ասաց Տավուշի թեմի առաջնորդ Բագրատ եպիսկոպոս Գալստանյանը։

«Ես խորշում եմ օտար դեսպանատների դռները բախելու, նրանց խնդրելու գաղափարից, բայց, այդուհանդերձ, այնպես է ստացվում, որ այսօր կոչված ենք այդ միջոցներին էլ դիմելու։ Ճնշումներ պետք է բանեցնել բոլոր հնարավոր միջոցներով ու ամեն տեղ։ Պետք է խոսվի այն մասին, որ հումանիտար աղետ է տեղի ունենում։ Եթե այս ծրագրին կծառայեն նաև այսօրվա իշխանությունները, իրենք էլ, ուղղակի, պարտավոր են առաջնորդելու այդ շարժումը։ Իսկ եթե չեն կարող, ապա պետք է մի կողմ քաշվեն։ Որևէ մեկի անձնական հարցերը լուծելու ո՛չ ժամանակն է, ո՛չ էլ ասպարեզը»,-ասում է Սրբազանը։

Տավուշի թեմի առաջնորդը շեշտում է՝ և՛ Հայաստանի հանրապետությունում, և՛ Արցախում ապրող մեր հայրենակիցների անվտանգության ապահովումը բացառապես ՀՀ իշխանությունների պարտականությունն է։

«Իրավիճակի լուծումը Հայաստանի Հանրապետության իշխանությունների ձեռքին է․ իրենք բացարձակ պատասխանատվություն են կրում թե՛ Հայաստանում, թե՛ Արցախում գտնվող մեր հայրենակիցների անվտանգության և խաղաղ կյանքի համար։ Առաջին և միակ պատասխանատուներն իրենք են՝ և՛ բարոյագիտական իմաստով, և՛ որպես բոլոր գործիքներին, բանակցություններին, մյուս միջոցներին տիրապետողներ»,-ընդգծում է Սրբազանն ու հավելում՝

եթե չեն կարող դա անել, ինչպես ժամանակ առ ժամանակ խոստովանում են, ուրեմն պետք է նաև բարոյականություն ունենան հեռանալու և կառավարումը փոխանցելու նրանց, ովքեր կարող են։

Տավուշի թեմի առաջնորդը շեշտում է՝ այստեղ ո՛չ իշխանության, ո՛չ էլ լծակներ ունենալու խնդիր է․ սա հայ ժողովրդի ճակատագրի խնդիրն է։ Հայրենիքին ու մեր հայրենակիցներին սպառնացող վտանգի լրջությունն է, որ, Սրբազանի համոզմամբ, պետք է ապարեզում գտնվող բոլորին ստիպի համախմբվել և գործել մեկ միասնական նպատակով։

«Մեր ուժը մենք պիտի լինենք։ Ուրիշներին խնդրելու, աղաչելու պատճառ չունենք։ Նույնիսկ երբ այսօր խոսում են ռուսական խաղաղապահների գոտում գտնվելու մասին, ես նույնիսկ դա եմ մերժում, որովհետև ի՞նչ կապ ունի այնտեղ ռուսներն են, եվրոպացիները, թե այլոք։ Մեր խնդիրները մենք պիտի լուծենք»,-նշում է Տավուշի թեմի առաջնորդը։

Որ ստեղծված ճգնաժամային իրավիճակում հասարակության համախմբումը չհաջողելու դեպքում շարժման համախմբման առանցքը կարող են դառնալ հոգևորականները, Սրբազանը չի բացառում։

Աղբյուր` Փաստինֆո