Փաստ ինֆո

Հայաստանի ռեսուրսները սպառված չեն, հայ ժողովուրդն ունի ռեսուրս՝ իր ազգային-պետական շահերն առաջ մղելու համար, ունի բավարար ներուժ՝ ոսոխին դիմակայելու համար, ինչպես Արցախյան առաջին պատերազմի տարիներին է արել, պարզապես, այս պահին Հայաստանում իշխանությունը բռնազավթել են մի խումբ անձինք, որոնք ազգային և պետական շահերի հետ որևէ կապ չունեն, նրանց համար Արցախը արժեք չէ, դրա համար էլ ձեռքերը լվացել են Արցախից և պարտվողական թեզեր են առաջ մղում հայ-հասարակության շրջանում: «Փաստինֆո»-ի հետ զրույցում հայտարարել է «Հայրենիք» կուսակցության քաղաքական խորհրդի անդամ Խաչիկ Գալստյանը՝ հակադարձելով իշխանության ներկայացուցիչների հայտարարություններին, թե ՀՀ-ն այլևս չունի ռեսուրս՝Արցախի անվտանգությունն ապահովելու համար:

Զրուցակիցը շեշտում է՝ թե՛ ռազմական, թե՛ դիվանագիտական ոլորտներում կան բավարար ռեսուրսներ՝ Հայաստանի և Արցախի անվտանգությունն ապահովելու համար, պետք է դրանք զուգահեռ կիրառել:

Խաչիկ Գալստյանի արձանագրմամբ, թեև բանակը այս իշխանության օրոք լուրջ ճեղքվածք է տվել, կազմաքնդվել է, Հայաստանի պաշտպանական ներուժը խաթարվել է, բայց մարդկանց համոզել, թե սեփական տունը չեք կարող պաշտպանել, աբսուրդ է: Զրուցակցի գնահատմամբ՝ դիվանագիտական ռեսուրսները ևս բավարար են այս պահին:

Նրա խոսքով՝ սեպտմբերի 13-ին սանձազերծած աադրբեջանական ագրեսիայի դեպքում դիվանագիտական ռեսուրսների մի մասը կիրառվել է, դրանք որոշ դեպքերում սաստող դերակատարում են ունեցել, իսկ ավելի լուրջ դիվանագիտական աշխատանքի դեպքում լուրջ հաջողությունների կարող էինք հասնել.

«Այս թեզերի վտանգավորությունը կայանում է նրանում, որ այսօր Արցախի մասին են ասում, որ չենք կարող պաշտպանել, վաղն էլ այդ թեզի հեղինակները թութակի նման կրկնելու են, թե Հայաստանը չի կարող նաև սեփական անվտանգությունն ապահովել, ու այսպես, պարտվողական տրամադրություններ սերմանելով, ժողովրդին համակերպվողականության քարոզ են անում, սա մահացու մեղք է, որն այս իշխանություններն անում են հայ-ժողովրդի նկատմամբ»,-հավելեց քաղաքական գործիչը:

Խաչիկ Գալստյանի արձանագրմամբ՝ նման հայտարարությունները վերահաստատում են, որ ՀՀ իշխանությունները այլևս ձեռքերը լվացել են Արցախից և չեն ցանկանում զբաղվել ԼՂ հարցով.

«Հիմա իշխանության երկրորդ էյշելոնի խոսափողներն են այդ մտքերը գեներացնում, բայց ուշ չէ այն օրը, որ հենց վարչապետի աթոռը զբաղեցնող Նիկոլ Փաշինյանը ԱԺ ամբիոնից իր հերթական փրփրալից ելույթի ժամանակ հայտարարի, որ այսուհետ Հայաստանն Արցախի հետ որևէ օրգանական կապ չունի »,-ասաց նա:

Իշխանության ներկայացուցիչները նաև պնդում են, թե Ադրբեջանն այլևս չի ցանկանում բանակցել Հայաստանի հետ, ուստի Արցախի ճակատագիրը մնում է Ստեփանակերտ - Բաքու բանակցությունների ձևաչափին։

Հարցին՝ այն դեպքում, երբ Արցախի միջազգայնորեն ճանաչված պետություն չէ, ի՞նչ ռեսուրսներով է Ստեփանակերտը բանակցելու Բաքվի հետ, եթե հաշվի առնենք նաև, որ Բաքուն հրաժարվում է բանակցել անգամ ՀՀ-ի հետ, ավելին՝ այդ երկրի ղեկավարը հայտարարում է, թե «Ղարաբաղի հայերը մեր քաղաքացիներն են, և մենք կորոշենք՝ երբ և ինչպես նրանց հետ խոսել»:

Խաչիկ Գալստյանը նշում է՝ Արցախն ունի պետականության ինստիտուտներ, պետականության ատրիբուտներ, ունի կարգավիճակով համարժեք այնպիսի ենթակառուցվածքներ որոնք թույլ են տալիս Ադրբեջանի հետ նստել բանակցային սեղանին, բայց այլ հարց է, որ Ադրբեջանը, եթե ՀՀ-ի հետ չի ցանկանում, ապա առավել ևս Արցախի հետ, չի ցանկանա բանակցել, այլ կփորձի ճնշել և միակողմանի պարտադրել Արցախին.

«Ադրբեջանը երբեք Արցախին, որպես ինքնուրույն միավոր կամ ինքնիշխան սուբյեկտ, իրեն հավասար չի դիտարկելու: Նա բանակցությունները պատկերացնում է հրահանգի, ճնշման միջոցով, կամ ռազմական ուժով արցախցիների նկատմամբ հոգեբանական տեռոր կիրառելով: Նախկինում Ադրբեջանը Արցախի հարցով փորձում էր միայն Հայաստանի հետ բանակցել, հիմա հրաժարվում է նույնիսկ Հայաստանի հետ բանակցել, չի բանակցելու նաև Արցախի հետ, քանի որ բանակցություններ հնարավոր են հավասար պետությունների միջև: 10 մլն-անոց Ադրբեջան և 100 հազարանոց Արցախ, իհարկե, բանակցային անհամարժեք դերակատարներ են, Ադբեջանը միակողմանի կփորձի ճնշել Արցախին» ,-ասաց Գալստյանը:

Զրուցակիցը նշում է՝քանի որ ՀՀ իշխանություններն իրենց ձեռքերը լվանում են Արցախի հարցը և արցախցիների ինքնորոշման իրավունքը միջազգային ատյաններում բարձրաձայնելուց, ապա արցախցիները պետք է ավելի կոշտացնեն իրենց դիրքորոշումը, չհամաձայնվեն ՀՀ իշխանությունների կողմից ստորագրված իրենց շահերին առնչվող որևէ փաստաթուղթ ընդունելուց, ինչը կստեղծի փակուղային իրավիճակ և կստիպի անգամ Ադրբեջանին, վաղ թե ուշ, բանակցությունների նստել արցախահայության հետ՝ որպես իրավահավասար սուբյեկտի:

Աղբյուր` Փաստինֆո