Փաստ ինֆո

Ստեղծված իրավիճակի միակ հեղինակը, պատասխանատուն ու մեղավորը այս իշխանություններն են, իսկ ելքը մեր համերաշխության և մեկ նպատակի շուրջ համախմբվելու մեջ է, բայց պետք է լինենք միասանական ոչ թե այս «դեկորատիվ» իշխանության շուրջ, այլ միասնական՝ ընդհանուր նպատակի՝ հայրենիքի փրկության շուրջ, իսկ երբ ասում են հայրենիքի փրկություն, ես 29.800 ք/կմ միայն նկատի չունեմ, ինչպես ոմանք: «Փաստինֆո»-ի հետ զրույցում նման դիտարկում է արել Շիրակի թեմի առաջնորդ Միքայել արքեպիսկոպոս Աջապահյանը:

Միքայել Սրբազանը շեշտում է՝ պետք է բոլոր ուղղություններով աշխատենք մեր դաշնակիցների հետ, բայց մեր հույսը միայն մեզ վրա պետք է դնենք ու պայքարենք.

«Հայ զինվորը ուժեղ է, պայքարող, բայց միայն զինվորով չի կարող խնդիրը լուծվել, ընդհանուր պետության և բանակի հզորությամբ պետք է հարցը որոշվի, միայն հայ զինվորի հերոսությամբ պետություն փրկել հնարավոր չէ»,-ասաց Շիրակի թեմի առաջնորդը:

Իսկ թե ինչպե՞ս է վերաբերվում իշխանության՝ ամեն գնով թշնամու հետ խաղաղության գնալու կոչերին՝ Սրբազանը շեշտում է՝ այս պայմաններում խաղաղության գնալը նշանակում է ստորացում, նվաստացում և պետականության կորուստ.

«Պետականության կորստի գնով խաղաղությունն արդյո՞ք խաղաղություն է, նվաստացման, ստորացման գնով խաղաղությունն արդյո՞ք խաղաղություն է՝ ոչ, դա խաղաղություն չէ, այլ պատրանք է:

Սխալը մեր սերնդինն է, որ այս հարցը չլուծեցինք վերջնականապես, որպեսզի այս սերնդի վրա չկոտրվի խնդիրը, դեռ 90-ականներին պետք էր հարցը վերջնականապես լուծել, Ադրբեջանի ողնաշարը այն ժամանակ պետք էր ջարդել, ինչպես հիմա իրենք են փորձում մերը ջարդել, ոչ թե միջազգային հանրություն խաղացնեինք, այս սերունդը հիմա ձերբազատված կլիներ այդ խնդրից, 30 տարի շարունակաբար եթե մենք հզորանայինք և հզորացնեինք մեր բանակը, այսօրվա սերնդին շատ բան կխնայվեր»,-ասաց նա:

Միքայել Սրբազանը նկատում է՝ հասարակության մի զգալի մասն այսօր խուճապային տրամադրության մեջ է, «պատրաստ է ցանկացած զիջման միայն թե իր ու իր զավակի կաշին փրկի՝ներառյալ այսօր իշխանության մեջ հայտնվածները». «Կաշի փրկելը ժամանակավոր է, պետք է հայրենիքը փրկել, սրա շուրջ պետք է համախմբվել: Հասարակության մի մասը չի գիտակցում՝ ինչ վիճակում է երկիրը, որ գիտակցեին, այս օրվան չէինք հասնի, այս իշխանությունը վաղուց փոխված կլիներ ու կգար մի իշխանություն, որը պարտվողական տրամադրվածություն չունի, խուճապային տրամադրություն չունի, քայլերից ու գործողություններից է երևում մարդկանց գիտակցութունը»,-ասաց Սրբազանը:

Զրույցի վերջում Միքայել Սրբազանը մեր խնդրանքով անդրադարձավ նաև երեկ Եռաբլուրում տեղի ունեցած միջադեպին, երբ «կարմիր բերետավորները», բռնի ուժ գործադրելով, բերման էին ենթարկում զոհված զինվորների ծնողներին, որոնք փորձում էին խոչընդոտել Փաշինյանի և իշխանության ներկայացուցիչների մուտքը Եռաբլուր.

«Ամոթ է, կանանց նկատմամբ նման վերաբերմունքը ցանկացած տղամարդու համար անպատվաբեր է, իրավունք չունեն կանանց, մայրերի, առավել ևս զովածի մոր հետ նման ձև վարվեն, այդ մարդիկ պետք է ամաչեն, որ տղամարդ են ծնվել, հրաման տվողն էլ, հրաման կատարողն էլ պետք է գետինը մտնեն »,-ասաց նա:

Աղբյուր` Փաստինֆո