Փաստ ինֆո

Ադրբեջանից և Թուրքիայից եկող հրապարակային հայտարարությունները փաստում են այն մասին, որ իրենք բնավ չեն հրաժարվել այն ծրագրերից, որոնք ունեն Հայաստանի նկատմամբ: «Փաստինֆո»-ի հետ զրույցում ասել է ադրբեջանագետ, ԱԺ նախկին պատգամավոր Տաթևիկ Հայրապետյանը:

Փորձագետը հիշեցնում է՝ մասնավորապես, հայ-թուրքական ձևաչափով վերջին հանդիպումներից հետո թուրքական կողմը կրկին հանդես եկավ հայտարարությամբ, որ ամբողջությամբ իր քաղաքականությունը համաձայնեցնելու է Բաքվի հետ, իսկ «խաղաղության պայմանագիրն» էլ դիտարկում է հարաբերությունների կարգավորման նախապայման:

Սրան զուգահեռ ադրբեջանական կողմն է շարունակում իր ճնշումները Հայաստանի վրա, մասնավորապես, ուժի սպառնալիքի ներքո ձգտում է հասնել իր համար ցանկալի զիջումների՝ Արցախի հարցում, «միջանցք» կոչվածի և այլ հարցերում.

«Որոշ շրջանակներ սիրում են ասել, երբ հաճախ են կողմերի միջև հանդիպումներ լինում, դա զսպում է ագրեսիան, բայց իրողությունն այլ է, բնականաբար, հանդիպումները և դիվանագիտություն կարևոր են, բայց առավել կարևոր է՝ ինչ օրակարգեր են դրված բանակցությունների սեղանին, հայկական կողմը, ցավոք, որևէ օրակարգ չունի, իսկ ադրբեջանական կողմը հստակ նպատակներ է դրել և փորձում է դրանց հասնել»,-ասաց նա:

Հարցին՝ ինչու՞ է ՀՀ իշխանությունն այսքան շտապում Ադրբեջանի և Թուրքիայի հետ հարաբերությունների հաստատելու հարցում՝ համաձայնվելով ցանկացած նախապայմանի և նման թույլ ռեսուրսներով երկկողմանի բարդ գործընթացի մեջ մտնելը ի՞նչ հետևանքներ կունենա Հայաստանի համար, զրուցակիցն ասաց՝ իշխանությունները գիտակցում են, որ երկարաժամկետ առումով բազմաթիվ խնդիրներ են առաջանալու, ուստի փորձում են ներքաղաքական բազմաթիվ խնդիրները ծածկել արտաքին գործընթացներով և հակառակորդների հետ հարաբերություններ կարգավորելով.

«Այսինքն՝ եթե չես աշխատում անվտանգային համակարգերի ուղղությամբ, չես կարողանում ճիշտ կերպով կազմակերպել քո պետական կառավարումը և բոլոր առումներով նահանջ ես ապրում, քո նախկին հայտարարությունները շարունակ ոտնահարում ես, նախընտրական այն ծրագրերը, որոնցով եկել ես իշխանության, մոռանում ես, արտաքին գործընթացներով փորձում ես ծածկել ներքին մեծ խնդիրները, շատ մեծ սխալ ես գործում: Իշխանությունները փնտրում են լեգիտիմություն՝ հակառակորդի հետ հարաբերությունների կարգավորման համատեքստում, բայց ազնիվ չեն հանրության հետ, քանի որ իրենք էլ շատ լավ գիտակցում են, որ իրենց հետ խաղաղության գնացող չկա, իսկ խաղաղությունը միակողմանի չի կառուցվում: Ուշագրավ է, որ Նիկոլ Փաշինյանը, երբ նշաձողի իջեցման մասին է խոսում, չի մոռանում երբեք շեշտել, որ որևէ երաշխիք չկա խաղաղության հասնելու, այսինքն՝ մենք շարունակ, զիջում ենք, հետքայլ ենք անում, բայց խաղաղության չի բերում, սա կործանարար է, որովհետև եթե մենք իրոք ցանկանայիք դիմագրավել և դրա ֆոնին բանակցային գործընթացում մեր շահերը պաշտպանել, լուրջ աշխատանք կտանեինք, երկու տարի է ՝իշխանությունը վերընտրվել են, պետք է աշխատանք տանեին բանակում և անվտանգային խնդիրների ուղղությամբ »,-ասաց ԱԺ նախկին պատգամավորը:

Զրուցակիցն ընդգծում է՝ պատերազմը կանխելու լավագույն միջոցն այն է, որ դու պատրաստ լինես պատերազմին դիմագրավելու.

«Եթե քո հակառակորդը իմանա, որ ինքը չի կարողանալու քեզ մարտի դաշտում հաղթել կամ շատ մեծ դժվարությամբ է դա անելու, ինքը միշտ կգերադասի բանակցությունները՝ հարձակվելուց, իսկ բանակցություններում էլ արդեն կարող ես քո օրակարգն առաջ տանել, ոչ թե հակառակորդի օրակարգով շարժվել »,-ասաց փորձագետը:

Անդրադառնալով վերջերս Թեհրանում Ռուսաստանի և Թուրքիայի նախագահների հետ հանդիպումների ժամանակ Իրանի գերագույն հոգևոր առաջնորդ Ալի Խամենեի հնչեցրած հայտարարությանը, որ եթե Հայաստանի հետ Իրանի սահմանները կտրելու քաղաքականություն լինի, Իրանը կկանխի դա, քանի որ այդ սահմանը տարանցիկ ուղի է արդեն մի քանի հազարամյակ, Տաթևիկ Հայրապետյանը նշեց՝այս հայտարարությունն այն մասին էր , որ Իրանը չի հանդուրժի որևէ փոփոխություն Հայաստանի հետ սահմանին, որ հայ-իրանական սահմանը իր համար կարմիր գիծ է և թույլ չի տա դրա վերահսկողությունն անցնի այլ ուժերի.

« Նման հայտարարություն հնչեցնելը ցույց է տալիս, որ Հայաստանի հետ սահմանը պետական և անվտանգային նշանակություն ունի Իրանի համար, որովհետև իրենք հասկանում են այն վտանգները, որոնք կառաջանան, եթե շրջապատված լինեն թուրքական աշխարհով:Միգուցե կան նաև գործընթացներ, քննարկումներ որոնց մասին մենք տեղյակ չենք, բայց իրանական կողմը, ունենալով իր աղբյուրները, իր պարտքն է համարել ևս մեկ անգամ զգուշացնել, որպեսզի հասկանան ճանապարհի կարևորությունը Իրանի համար և ուրիշ քայլերի չգնան այդ ուղղությամբ»,-ասաց Տաթևիկ Հայրապետյանը:

Աղբյուր` Փաստինֆո