Փաստ ինֆո

2020 թվականի նոյեմբերի 9-ի հայտարարությունը հրադադարի մասին է, եւ ոչ թե Լեռնային Ղարաբաղի խնդրի լուծման։ Այսօր տեղի ունեցած մամուլի ասուլիսում հայտարարել է Լեհաստանում ՀՀ նախկին դեսպան Էդգար Ղազարյանը։

Ըստ նրա՝ ներկայումս ստեղծվել է շատ վտանգավոր իրավիճակ ու փորձում են հանձնել Արցախը։

«Այժմ ավելի խոցելի վիճակում ենք հայտնվել, հետպատերազմյան շրջանում Ադրբեջանը փորձում է խաղաղ, առանց պատերազմի, որտեղ կարիք ունի նաեւ պատերազմով , այս խնդիրները լուծել եւ հայտարարել, որ այլեւս Լեռնային Ղարաբաղի հարց գոյություն չունի»,- նշել է Ղազարյանը՝ ուշադրություն հրավիրելով Լաչինի միջանցքին որպես այլընտրանք Ադրբեջանի կողմից կառուցվող ճանապարհի վրա։

Նոյեմբերի 9-ի հայտարարության 6-րդ կետի համաձայն՝ նոր կառուցվող ճանապարհի երթուղու կառուցման պլանին նախ պետք է բոլոր կողմերը տային իրենց համաձայնությունը եւ հետո միայն տեղի ունենար կառուցումը։ «Եթե կողմերից մեկը չի տալիս իր համաձայնությունը, ապա այն չի կայանում, եւ շարունակում է գործել հին, հաստատված ճանապարհը։ Բայց, եթե կառուցվում է նոր ճանապարհը, ուրեմն Փաշինյանը տվել իր համաձայնությունը»,- հայտարարել է Ղազարյանը՝ նկատելով, որ նոր ճանապարհի շահագործման դեպքում Բերձորի հայկական մի քանի գյուղեր ուղղակի կհայաթափվեն։

Էդգար Ղազարյանի փոխանցմամբ՝ թող ոչ ոք չմտածի, թե ադրբեջանցիներն իրենց փողերով հայերի համար ճանապարհ կկառուցեն. «Իրականում իրենք իրենց համար են ճանապարհ կառուցում, որով պիտի Ղարաբաղի հարավային հատվածով, Կոռնիձորով, Սիսիանի տարածքով միանան Նախիջեւանին, որից հետո կփակեն Գորիսի Տեղ գյուղից անցնող ճանապարհը, ռուսները այնտեղ այլեւս չեն լինի, այսինքն՝ վերահսկողություն չի լինի։ Այսպիսով՝ հարվածի տակ են հայտնվում Բերձոր քաղաքի բնակիչները եւ այդ ճանապարհին գտնվող մի քանի հայկական գյուղերի բնակիչներ։ Եթե վերահսկողությունը անցնում է Ադրբեջանին, այդ մարդիկ մնում են անպաշտպան»,- հայտարարել է Ղազարյանը։

Ըստ նրա՝ միակ փրկությունը Հայաստանի համար այն է, որ պետք է հրաժարվել այդ երկրորդ ճանապարհի գաղափարը ընդհանրապես քննարկելուց, եւ շարունակի պահպանել գոյություն ունեցող ճանապարհը, որը Հայաստանը Արցախին կապող միակ թելն է։

«Հարց է առաջանում, եթե պիտի Բերձորը շրջանցող ճանապարհ լինի, ապա ինչու չի շահագործվում Վարադենիսով Քարվաճառ ճանապարհը, որը կառուցվել է մեր բյուջեի միջոցներով։ Պարզից էլ պարզ է, որ ունենա լիարժեք վերահսկողություն։ Եթե իրենք հիմա, ասենք, հուլիսի 1-ին այնտեղ դնեն մի ադրբեջանական դրոշ, պիկապ, այսինքն՝ ցույց տան, որ իրենք փակում են, ապա Բերձորը կսկսի հայաթափվել , իսկ սեպտեմբեր-հոկտեմբերին այդ նույնը կսպառնա Ստեփանակերտին»,- ասել է Ղազարյանը՝ ընդգծելով Փաշինյանին մինչեւ հուլիսի 1-ը հեռացնելու կարեւորությունը։

Մանրամասները՝ տեսանյութում։

Աղբյուր` Փաստինֆո