Փաստ ինֆո

«Դիմադրության» շարժումը ցույց տվեց, որ մեր ընդդիմությունն աշխարհաքաղաքական կողմնորոշումների առումով միատարր չէ, շարժման դանդաղումը կայանում է այստեղ, հակառակ դեպքում՝ անհրաժեշտ ռեսուրս կար, չհաշված որոշ թերություններ։ մարտավարությունն էլ վատը չէր՝ իշխանափոխության հասնելու համար։ Ընդդիմությունը, աշխարհաքաղաքական տեսակետների առումով միատարր չլինելով՝ չի կարողանում փոխարինել Փաշինյանին: «Փաստինֆո»-ի հետ զրույցում հայտարարել է քաղաքագետ Լևոն Մնացականյանը:

Ըստ քաղաքագետի՝ ներքաղաքական ցանկացած գործընթաց այս պահին կախված է արտաքին զարգացումներից, ուստի միամտություն է Հայաստանի ներքաղաքական դաշտն առանձնել աշխարհաքաղաքական գործողություններից:

Փորձագետը կարծում է, որ Հայաստանում իշխանափոխության հավանականությունը մեծապես կախված է Ռուսաստան-Արևմուտք հակամարտության արդյունքից.

«Այդ ժամանակ մենք կունենանք հստակ պատկեր, ի վերջո, Փաշինյանը բերվեց իշխանության, որպեսզի հակակշռի Ռուսաստանի ազդեցության մեծացմանը տարածաշրջանում, այս գործոններն օգնեցին,որպեսզի Փաշինյանը գա իշխանության»,-ասաց նա:

Հիշեցնենք, որ «Պատիվ ունեմ» խմբակցության ղեկավար Արթուր Վանեցյանը երեկ հայտարարել է պատգամավորական մանդատը վայր դնելու մասին, դադարեցվում է նաև ՀՀԿ-ի հետ ձևավորած «Պատիվ ունեմ» դաշինքի գործունեությունը:

Ըստ Լևոն Մնացականյանի՝ սա նույնպես պետք է դիտարկել ընդդիմության՝ աշխարհաքաղաքական ուղղվածության վերաբերյալ տարբեր պատկերացումներ ունենալու շրջանակում.

«Բազմաթիվ առաջնորդներ անընդհատ պնդում են, որ Ռուսաստանը մեր ռազմավարական դաշնակիցն է, բայց, ըստ երևույթին, հայտարարություններն ու գործողությունները տարբեր բաներ են, Վանեցյանը հայտարարեց, որ խորհրդարանում այլևս անելիք չունի, իսկ խորհրդարանում անելիք չունեին դեռ վաղուց, բաց եթե մասնագիտական մոտենանք, իրականում դա խնդրի երևացող ֆոնն է, փորձը ցույց տվեց, որ որոշ ուժերի կողմնորոշումն այդքան էլ հստակ չէ, միայն Ռոբերտ Քոչարյանն է հստակ ռուսամետ գործիչ, նա, ամեն դեպքում, պարզ է խաղում»,-ասաց քաղաքագետը:

Լևոն Մնացականյանը կարծում է, որ ճիշտ չի լինի, եթե ընդդիմությունն ամբողջ կազմով վայր դնի մանդատները, քանի որ արդյունքում կլինի նույն պատկերը՝ինչ 2021թ-ին, կլինեն արտահերթ ընտրություններ.

«Ես կարծում եմ, այնուամենայնիվ, Փաշինյանի իշխանությունից հեռացնելը պետք է լինի փողոցային պայքարի միջոցով, սահմանադրական ճանապարհով Նիկոլի դեմ պայքարելը անհնար է, ինքը հակասահմանադրական ճանապարհով է զավթել իշխանությունը»,-ասաց նա:

Հարցին՝ առաջիկայում հայաստանյան քաղաքական դաշտում նոր զարգացումներ և վերադասավորումների ականատես կլինե՞նք, քաղաքագետն ասաց, որ նոր զարգացումներ և վերադասավորումներ չեն սպասվում, քանի որ, ըստ նրա. Հայաստանի քաղաքական դաշտը նոքդաունի մեջ է.

«Նոր վերադասավորումներ դժվար լինեն, քաղաքական դաշտում հստակ տեղավորվել են ուժերը և այս ֆորմատով են առաջ գնալու , նյարդերի պայքար է գնում, անգլոսաքսոնական ուժերի կողմից իշխանության բերված ուժին փորձում է հակադրվել ՌԴ-ի հետ դաշնակցային սերտ հարաբերություններ ունենալու պատկերացումներ ունեցող քաղաքական ուժը: Աշխարհում ոչ մի տեղ չի հաջողվել անգլոսաքսոններից խլել իշխանությունը, բայց տեսնենք՝ նոր իրավիճակում ինչպիսի զարգացումներ կլինեն»,-ասաց Լևոն Մնացականյանը:

Աղբյուր` Փաստինֆո