Փաստ ինֆո

Ընդդիմության՝ Ֆրանսիայի հրապարակում տեղադրված վրանները հանելու որոշումը ռեալ քայլ էր: «Փաստինֆո»-ի հետ զրույցում ասել է քաղտեխնոլոգ Կարեն Քոչարյանը:
Հիշեցնենք, որ երեկ ընդդիմությունը Ֆրանսիայի հրապարակից հեռացրել է դեռևս մայիսի 1-ին տեղադրած պայքարի վրանները:

Քաղտեխնոլոգ Կարեն Քոչարյանը կարծում է, որ այդ վրանները թեև վերջնական նպատակին չհասան, բայց մի շարք կարևոր հարցեր լուծեցին: Նախ՝ ֆիքսվեց, որ երկրում լուրջ ճգնաժամ կա, երկրորդ՝ կա ստաբիլ մի զանգված, որը յուրաքանչյուր պահի, անկախ իրավիճակից, ժամից ու եղանակից պատրաստ է դուրս գալ պայքարի և ամենակարևորը՝ կանխեց Արցախի շուրջ բանակցություններում նշաձողի իջեցումը.

« Ի վերջո, այդ վրանները տեղադրվել էին Նիկոլ Փաշինյանի հայտարարությունից հետո, որ միջազգային հանրությունը պահանջում է Արցախի կարգավիճակի նշաձող իջեցնել»,-նկատում է զրուցակիցը:

Մեր դիտարկմանը, որ վրանները հեռացնելուց հետո պայքարի մասնակիցների մեծ մասի մոտ հիասթափություն նկատվեց, շատերի մոտ անգամ դա ընկալվեց որպես պայքարի ավարտ, քաղտեխնոլոգն արձագանքեց.

«Այդ նույն հատվածը պայքարի ավարտ էր համարում 2020թ-ի հունվարը, 2021թ-ի ընտրությունները, սակայն հետո կրկին այդ նույն մարդիկ փողոց են դուրս գալիս: Սա գալիս է նրանից, որ մարդիկ ծայրահեղ մոտեցումներ ունեն, դա հայերին շատ բնորոշ է, մենք կա՛մ ծայրահեղ կոնսերվատիվ ենք, կա՛մ ծայրահեղ լիբերալ, կա՛մ ծայրահեղ սիրում ենք, կա՛մ ծայրահեղ ատում ենք, կա՛մ ծայրահեղ պայքարում, կամ հիասթափվում, դրանից է այս ամենը գալիս»,-ասաց նա:

Նշենք, որ «Դիմադրություն» շարժումը երեկ հայտարարեց պայքարի նոր փուլի և մարտավարական մի շարք փոփոխությունների մասին: Մասնավորապես հայտարարվեց, որ ընդդիմությունն առաջիկայում հայտարարելու է ժամանակավոր կառավարության ղեկավարի իր թեկնածուի անունը:

Կարեն Քոչարյանը սա դրական է համարում, ավելին՝ կարծում է, որ առաջնորդի անունը վաղուց պետք է ասեին.

«Երբ իրենք հայտարարեցին, որ 250 հոգի կա, գոնե ինչ-որ հատվածի, որպես կառավարության ժամանակավոր անդամներ, պետք է ներկայացնեին, մարդիկ պետք է իմանան՝ ում հետևից են գնում, ինչի են գնում, եթե խոսենք ազնիվ, ապա պետք է լինես «կամիկաձե», որ հիմա ցանկանաս գալ իշխանության, ով էլ որ համաձայնվի, պետք է հասկանանք՝ ինչպես է լուծելու առկա խնդիրները, Հայաստանը հիմա այնպիսի վիճակում է, որ ես չէի նախանձի նրան, ով պետք է իշխանության գա»,-ասաց Կարեն Քոչարյանը և ընդգծեց՝ պետք է լինեն ոչ միայն անուններ, այլև խնդիրները լուծման ռեալ եղանակներ.

«Մենք տեսել ենք՝ ինչ է նշանակում խոսք տալ ու չկարողանալ անել»,-ասաց նա:

Քաղտեխնոլոգն ամեն դեպքում, կարծում է , որ ընդդիմությունը դեռևս ռեսուրս ունի՝ իշխանափոխության հասնելու համար:

Աղբյուր` Փաստինֆո