Փաստ ինֆո

«Դիմադրություն» շարժումը հանդիպումներ է ունեցել տարբեր կառույցների, կազմակերպությունների և մի շարք ՀԿ-ների, 20-ից ավել արտախորհրդարանական ուժերի ղեկավարների հետ և փորձել պարզել բոլորի դիրքորոշումը՝ շարժման հեղինակած Արցախի և Հայաստանի վերաբերյալ նախագծի մասին:

«Փաստինֆո»-հետ զրույցում «Հայաստան» խմբակցության պատգամավոր Վահե Հակոբյանը նշեց, որ նրանց մեծ մասը միանում է նախագծին. «Հիմնական ուժերը միանում են նախագծին, կիսում են մեր մոտեցումները: Այսօր, ով կարողանում է մտածել, ժողովրդի գիտակից շերտը տագնապի զգացում ունի»,-ասաց Հակոբյանը:

ԱԺ երկու խմբակցությունների՝ «Հայաստան» եւ «Պատիվ ունեմ», նախաձեռնությամբ հունիսի 3-ին ԱԺ արտահերթ նիստ է հրավիրվել, որի օրակարգում հայ-թուրքական և հայ-ադրբեջանական հարաբերությունների մասին հայտարարության նախագիծն է: Խորհրդարանական մեծամասնությունը՝ ՔՊ խմբակցությունը, հայտարարել է, որ չի մասնակցելու նիստին:

Մեզ հետ զրույցում Վահե Հակոբյանը հայտնեց, որ ընդդիմադիր երկու խմբակցություններն, ամեն դեպքում, վաղը գնալու են խորհրդարան:Իսկ թե ի՞նչ է սպասվում հունիսի 3-ի «ջրբաժանից» հետո, Հակոբյանը չցանկացավ փակագծեր բացել, բայց վստահեցրեց, որ կա գործողությունների ծրագիր։

Արձագանքելով իշխանության ներկայացուցիչների հայտարարություններին, թե «Դիմադրության» շարժումն այլևս սպառել է իրեն, իսկ հիմա էլ խորհրդարան վերադառնալու ելքեր է փնտրում, Վահե Հակոբյանը հակադարձեց.

««Դիմադրության» շարժումը ո՛չ իրեն սպառել է, ո՛չ էլ խորհրդարան հետ վերադառնալու ուղիներ է փնտրում, մեր պայքարը շարունակական է, ոչինչ չի կարող կանգնեցնել մեզ:

«Վաղը ժամը 16.00-ին տեսնենք որքան մարդ է հավաքվում Ֆրանսիայի հրապարակում, նոր կորոշենք՝ փակուղի մտե՞լ է,թե՞ ոչ »,-ասաց պատգամավորը:

Հստակեցնող հարցին՝ բացառո՞ւմ է, որ ընդդիմադիր երկու խմբակցություններն այս ընթացքում կվերադառնան խորհրդարան, ընդդիմադիր պատգամավորն արձագանքեց.

«Մենք խորհրդարան կգնանք մեր օրակարգով, ինչն անելու ենք վաղը»:

Մեկնաբանելով ՔՊ-ի վաղվա արտահերթ նիստը տապալելու որոշումը՝ զրուցակիցը նշեց.

«Ո՞նց կարող էին իրենք գալ, գալու դեպքում մեր հայտարարությանը պետք է ասեին ՝ «այո» կամ «ոչ», բայց «այո» չեն կարող ասել, քանի որ իրենք քշվում են մեկ մարդու քմահաճույքով, որը մեր երկրի դավաճանն է, ո՞նց կարող էին գալ ԱԺ և վերահաստատել իրենց դավաճանական ուղին։ Իրենց համար ավելի հեշտ տարբերակ էր չգալը և նիստը տապալելը »,-ասաց Հակոբյանը:

Իշխող ուժը խորհրդարանում ձախողում է քննարկումները, թեեւ գործադիրը՝ ի դեմս արտաքին գործերի նախարարության, ընդունում է, որ հակառակորդի գործողություններն ապակայունացնում է իրավիճակը։ Միաժամանակ հայտարարել էր, թե «հրադադարի ռեժիմի խախտումները հիմնավորում են զորքերի հայելային հետքաշման և սահմանագոտում դիտորդական առաքելություն տեղակայելու անհրաժեշտությունը», ինչին արձագանքելով ընդդիմադիր պատգամավորն արձանագրել է, որ մեր ԱԳՆ ներկայացուցիչները շատ վատ են պատկերացնում Հայաստանի աշխարհաքաղաքական դիրքը և մեր սահմանների վիճակը.

«Մեր սահմանների մեծ մասն արդեն մոտեցել է բնակելի քաղաքներին, օրինակ՝ ադրբեջանական զինուժը հիմա տեղակայված է անմիջապես Կապան քաղաքի ծայրամասում, հիմա իրենք ո՞նց են պատկերացնում, որ նույն Սյունիքում զորքերը հայելաձև հետ քաշվեն սահմանից, ադրբեջանցիները նման խնդիր չունեն, քանի որ իրենց մեջքի հետևում 40 կմ-ից ավել տարածք կա, իրենք կարող են հետ քաշվել, բայց մեր դեպքում չեզոք գոտին արդեն կընկնի քաղաքների մեջ։ Հիմա հերթական զիջո՞ւմն ենք իրենց առաջարկում, ոչ՛, մենք համաձայն չենք դրա հետ, ի՞նչ հայելային հետնահանջ, սա հերթական զիջումը կլինի, խորհուրդ կտամ մեր ԱԳՆ ներկայացուցիչներին աշխարհագրություն սովորել»,-եզրափակել է Վահե Հակոբյանը:

Աղբյուր` Փաստինֆո