Փաստ ինֆո

Հայաստանի 3-րդ Հանրապետության պատմության մեջ մենք ունենք ամենաթույլ իշխանությունը և ամենաթույլ ընդդիմությունը: Եթե հետևենք նրանց բանավեճին, կտեսնենք, որ երկկողմանի բացակայում է քաղաքական դիսկուրսը: «Փաստինֆո»-ի հետ զրույցում նման կարծիք է հայտնել «Դեմոկրատական այլընտրանք» կուսակցության նախագահ Սուրեն Սուրենյանցը՝ անդրադառնալով հայաստանյան ներքաղաքական կյանքի զարգացումներին և խորհրդարանական ընդդիմության ակցիաներին:

Բանախոսը ընդդիմադիր հարթակի գործողությունները խիստ ոչ արդյունավետ է գնահատում և վստահեցնում, որ նման քայլերով իշխանափոխության հնարավոր չէ հասնել:

Ինչ վերաբերում է ընդդիմության՝ հայ-ադրբեջանական և հայ-թուրքական հարաբերությունների վերաբերյալ նախագծին՝ Սուրեն Սուրենյանցը կարծում է, որ այս փուլում նման հայտարարություն ընդունելը կարող է հանգեցնել հայ-ադրբեջանական և հայ-թուրքական երկխոսության վիժեցմանը.

«Փաստաթղթում կան թեզեր, որոնք ՀՀ յուրաքանչյուր քաղաքացու համար ընդունելի են, բայց կան շատ «բայցեր» այս համատեքստում, ես չեմ կարծում, որ այդ հայտարարությունը նպատակահարմար է ընդունել: Ես քննարկումներին կողմ եմ, չեմ հասկանում, որ խորհրդարանական մեծամասնությունը ցանկանում է տապալել քննարկումները, սա ևս անընդունելի է, ես նպատակահարմար եմ գտնում, որ ոչ թե փողոցներում կամ հակադրության մակարդակում, այլ ինստիտուցիոնալ հարթությունում հայ-թուրքական և հայ-ադրբեջանական հարաբերությունների վերաբերյալ քննարկումներ գնան»,-ասաց Սուրենյանցը:

Նա նաև ընդգծեց, որ իր ղեկավարած «Դեմոկրատական այլընտրանք» կուսակցությունը չի միանալու խորհրդարանական ընդդիմության նախագծին.

«Մեր կուսակցությունը քննարկումներին կողմ է, մենք չենք ընդունում ՔՊ վարքագիծը, որ հայտարարել է՝ տապալելու է ԱԺ արտահերթ նիստը, բայց այս պահին նման փաստաթղթի ընդունմանը դեմ ենք»,-հավելեց զրուցակիցը:

Մեր խնդրանքով Սուրենյանցն անդրադարձավ նաև ՀՀ ԱԳՆ հայտարարությանը, թե «հրադադարի ռեժիմի խախտումները հիմնավորում են զորքերի հայելային հետքաշման և սահմանագոտում դիտորդական առաքելություն տեղակայելու անհրաժեշտությունը»:

Նրա խոսքով, առհասարակ, անհասկանալի է զորքերի հայելային հետքաշման գաղափարը, այն դեպքում, երբ գործ ունենք շուրջ 45 քառ կմ օկուպացիայի հետ.

«Ադրբեջանն արդեն իսկ Գեղարքունիքի և Սյունիքի որոշ հատվածներ օկուպացրել է, այս պայմաններում զորքերի հայելային հետքաշման մասին խոսելը այնքան էլ ադեկվատ չէ: Բրյուսելի հանդիպումից հետո ստեղծվել է դեմարկացիայի և դելիմիտացիայի միջպետական հանձնաժողով, որի մանդատի մեջ է մտնում նաև սահմանային անվտանգության խնդրի կարգավորումը, ես կարծում եմ, որ հիմա մեխանիզմ կա ստեղծված, շեշտը պետք է դնել այդ հանձնաժողովի շրջանակներում այնպիսի մեխանիզմների վրա, որպեսզի սահմանային միջադեպերը բացառվեն»,-ասաց զրուցակիցը:

Հարցին՝ արդյո՞ք մինչ դեմարկացիայի և դելիմիտացիայի գործընթաց սկսելը հայկական կողմը չպետք է պահանջի նախ, որ ադրբեջանական զորքերը դուրս բերվեն ՀՀ ինքնիշխան տարածքից, Սուրենյանցն արձագանքեց՝ ադրբեջանական զորքերը դուրսբերումը պետք է որևէ գործընթացի հետ կապված չլինի, Հայաստանը պետք է հետևողականորեն ձգտի, որ ադրբեջանական զորքերը դուրս բերվեն մեր տարածքից.

«Միևնույն ժամանակ մենք տեսնում ենք, որ Հայաստանի սուբյեկտայնությունն այնքան է նվազել, որ Հայաստանի մի շարք պահանջներ անտեսվում են Ադրբեջանի կողմից, իսկ միջազգային հանրությունը «պարիտետային» դիրքորոշում է որդեգրել, Ադրբեջանի վրա կոնսոլիդացված ճնշում չկա, այս հարցերը չեն լուծվում»,-ասաց նա:

Բանախոսը կարծում է, որ անգամ եթե մինչ գործընթացի մեկնարկը չստացվի ադրբեջանական զորքերին դուրս բերել մեր տարածքից, հայկական կողմը չպետք է հրաժարվի այդ օրակարգից և խնդիրը պետք է բարձրացնի նաև դեմարկացիայի և դելիմիտացիայի գործընթացի ժամանակ.

«Պետք է հետևողականորեն հասնել նրան, որ Սյունիքի և Գեղարքունիքի հատվածներից ադրբեջանական զորքերը դուրս գան»-հավելեց քաղաքական գործիչը:

Աղբյուր` Փաստինֆո