Փաստ ինֆո

«Բոլոր օրենքներն ու նորմերը հիմնվում են հումանիզմի սկզբունքի վրա։ Ժամանակակից պետությունների օրենսդրություններում չկա որևէ սկզբունք, որը գերակա կլինի հումանիզմի և մարդասիրության սկզբունքին։ Երեկ պատահած դատապարտելի և ողբերգական միջադեպը, երբ վարչապետ աշխատող անձի ավտոշարասյունը մահվան ելքով վրաերթ է իրականացնում հղի կնոջ նկատմամբ և անօգնական թողնելով՝ հեռանում է դեպքի վայրից, խոսում է միայն և միայն այն մասին, որ մարդիկ վայրենանում են։ Սրան այլ մեկնաբանություն չկա, ուղղակի գոյություն չունի», -«Փաստինֆո» լրատվականի հետ զրույցում ասում է Հայաստանի Մարդու իրավունքների առաջին պաշտպան Լարիսա Ալավերդյանը։

Վերջինս հստակեցնում է՝ ստեղծված իրավիճակում, Փաշինյանին կամ նրա ավտոշարասյանը որևէ վտանգ չէր սպառնում, եթե կանգներ և առաջին օգնությունը ցուցաբերեր վթարի ենթարկված կնոջը՝ նրան անհապաղ և արագ կերպով հասցնելով մոտակա հիվանդանոց. «Անօգնական թողնելով վրաերթի ենթարկված կնոջն ու դեպքի վայրը լքելը, քրեական օրենսգրքով հետապնդելի արարք է, ի՞նչի մասին է խոսքը։ Ո՞վ կարող է ինձ ասել կամ ցույց տալ որևէ կանոնակարգ, եթե այդպիսին կա, որը կարող է հակասել քրեական օրենսգրքին։ Այնպես, որ այստեղ երկու կարծիք լինել չի կարող։ Հետևաբար, իրենց այսպիսի ցինիկ արարք թույլ տվողները հասարակությանը տանում են դեպի վայրենացում։ Կցանկանայի իմանալ նաև՝ արդյո՞ք քրեական գործ, դեպքի առնչությամբ արդեն հարուցվել է, թե՞ ոչ»,- ասում է Լարիսա Ալավերդյանը։

Եթե, անգամ, մահը վրա է հասել նույն պահին, միևնույն է՝ վրաերթ կատարած մեքենան պարտավոր էր կանգնել և առաջին անհրաժեշտության քայլեր նախաձեռներ, այսինքն՝ մահացածին տեղափոխեր Շտապ Օգնություն, ասում է ՀՀ Մարդու իրավունքների առաջին պաշտպանը։

Խոսելով այն մասին, որ ողբերգական պատահարից ի վեր՝ մինչ այս պահը, ՀՀ-ում վարչապետ աշխատող անձը որևէ հայտարարությամբ կամ պարզաբանմամբ հանդես չի եկել, Լարիսա Ալավերդյանը նկատում է՝ այդպես էլ պետք է լիներ. «Վարչապետ աշխատող անձն առաջնորդվում է թուրք – ադրբեջանական տանդեմի ցեղասպանական քաղաքականությամբ և օրակարգով, հետևաբար, հղի կնոջ մահվան առիթով նա ներողություն չի խնդրի։ Օրեր առաջ Ազգային Ժողովում նրա կատարած հայտարարությունը՝ Արցախում նահատակված հազարավոր զոհերի վերաբերյալ, որոնք, ըստ նրա, կարող էին նաև չլինել, բայց եղան, արդեն իսկ, խոսում է այդ մարդու իրական բարոյական նկարագրի մասին։ Նորից եմ կրկնում՝ այդ անձն, իր վարած քաղաքականությամբ, իր կատարած քայլերով և որդեգրած վարքով, ակնհայտ և բացահայտ կերպով սպասարկում է մեր թշնամիների՝ թուրք – ադրբեջանական տանդեմի ցեղասպանական շահերը։ Ընդ որում, նա դա անում է իր քաղաքական ողջ թիմի հետ միասին։ Ստացվում է, որ սթափ վիճակում այդ մարդն այնպիսի որոշումներ է ընդունել, ինչի արդյունքում մենք ունեցել ենք թշնամու կողմից սպանված հազարավոր երիտասարդ կյանքեր։ Ազգային Ժողովի ամբիոնից այդօրինակ ցինիկ հայտարարությունից հետո, որևէ բարոյական ակնկալիքներ ունենալ այդ մարդուց, ուղղակի միամտություն կամ ժամանակի զուր վատնում է։ Նա չի ընդունում և հաշվի չի նստում իր մարդասպան քաղաքականության հետևանքների հետ, ինչի՞ մասին է խոսքը։ Բացի այդ, չեմ էլ կարծում, թե մեր իրականության մեջ առողջ բանականությամբ օժտված որևէ անձ, այլևս այլ բան է սպասում այդ մարդուց»,- ամփոփելով զրույցն, ասում է Լարիսա Ալավերդյանը։

Աղբյուր` Փաստինֆո