Փաստ ինֆո

«Ասում են՝ հասարակության ներսում մտավախություններ կան, թե ընդդիմության հերթական հավաքը կարող է հիասթափության մեծ ալիք բարձրացնել, եթե մոտ ապագայում իշխանափոխություն տեղի չունենա։ Պետք է իրատեսորեն ասեմ, որ այդպիսի հիասթափություններ դեռ շատ կլինեն։ Իրականում դա չէ էականը։ Նույն Նիկոլ Փաշինյանը, մինչև իշխանության գալը 70 անգամ փորձեց և միայն 71-րդ անգամը հաջողեց՝ գալ իշխանության։ Սա քաղաքականության չգրված օրենքն է»,- «Փաստինֆո» լրատվականին հետ զրույցում ասել է քաղտեխնոլոգ Կարեն Քոչարյանը։

Հիշեցնենք որ նախօրեին Ազգային ժողովի նախագահի տեղակալ Իշխան Սաղաթելյանը կոչ էր արել քաղաքացիներին ապրիլի 5-ին՝ ժամը 18:30-ին գալ Ազատության հրապարակ և միասին քննարկել Հայաստանի և Արցախի անվտանգային հարցերը: Ընդդիմության կողմից նախաձեռնված այս հավաքը հակասական քննարկումների և վերլուծությունների առիթ էր տվել։

Կարեն Քոչարյանը նկատում է՝ իշխանափոխության կոմպոնենտներն, առհասարակ, իսկ այսօրվա Հայաստանում՝ մասնավորապես, կախված չէ բացառապես և միայն ընդդիմության գործադրած ջանքերից.«Ցավոք, մեր երկրում ստեղծված իրավիճակը խոսում է այն մասին, որ իշխանափոխություն իրականացնելու համար միայն ընդդիմության ներդրած ջանքերն, այլևս բավարար չեն։ Այստեղ, այլևս, մեծ դեր և նշանակություն ունի արտաքին գործոնների ազդեցությունը, մասնավորապես՝ Արևմուտքն, իսկ ավելի մեծ դեր վերապահված է Ռուսաստանի Դաշնությանը։ Հայաստանը, ցավոք սրտի, այնքան է թուլացել, որ կախումները մի քանի ազդեցություններից, շատ ակտուալ են դարձել»։

Նկատառմանը, թե հասարակության ներսում առկա մտավախությունները մեծապես պայմանավորված են նաև երկու պետությունների՝ Հայաստանի և Արցախի շուրջ ստեղծված օրհասական խնդիրներով, Կարեն Քոչարյանը պատասխանում է՝ այո, խնդիրը երկու պետությունների լինելիության մեջ է.«Այսպիսի իրավիճակում մեր գործունեության մեխանիզմները պետք է լինեին մարտունակ բանակը, ճկուն դիվանագիտությունը, քաղաքական գործոնները, սակայն թվարկածս բոլոր օղակներն, ուղղակիորեն, փլուզված են, դրանք չեն գործում։ Հետևաբար, օբյեկտիվորեն վերլուծելու համար պետք է նկատենք, որ մեր շանսերը շատ քիչ են։ Սա է իրականությունը, որը որևէ կերպ շրջանցել մենք չենք կարող»։

Հարցին՝ արդյո՞ք դիվանագիտական ճանապարհով հնարավոր է ստեղծված իրավիճակում առավել արդյունավետ ելքեր փնտրել, Կարեն Քոչարյանը պատասխանում է՝ վաղուց էր պետք վերանայել մեր հարաբերությունները՝ ինչպես հավաքական Արևմուտքի, այնպես նաև Ռուսաստանի Դաշնության և Իրանի Իսլամական Հանրապետության հետ. «Այն, որ մեր դիվանագիտական հարաբերությունները, առհասարակ, բոլոր երկրների հետ, մեծ ճեղքվածք են տվել, սա, կարծեմ, ոչ մեկի համար գաղտնիք չէ։ Մեր հարաբերությունների օրինաչափությունը խախտված է թե՛ Ռուսաստանի Դաշնության, թե՛ Իրանի, թե՛ Վրաստանի, թե՛ Արևմուտքի հետ։ Այն տպավորությունը, թե օրվա իշխանությունները ձգտում են, գոնե, դրական դիվանագիտական հարաբերություններ պահպանել Արևմուտքի հետ, ևս խաբկանք է, որովհետև իրենց ձգտումներով հանդերձ, սրանք արդյունավետ հարաբերություններ կառուցել, պարզապես, չեն կարողանում, անգամ Արևմուտքի հետ, որոնց հետ, թվում է՝ իրենք շահերի որոշակի համընկնումներ ունեն։ Այլ կերպ ասած՝ Արևմուտքի հետ հարաբերություններն, այսօրվա դրությամբ, ևս լավ վիճակում չեն, հավատացեք»։

Ամփոփելով զրույցը՝ քաղտեխնոլոգ Կարեն Քոչարյանը նկատում է՝ այն իրավիճակը, որում հայտնվել են Հայաստանն ու Արցախն այսօր, 30- ամյա սխալ վարված քաղաքականության հետևանք է, որի պտուղները քաղում ենք այսօր. «Իհարկե, որպես շարքային քաղաքացի, ես վաղը ներկա եմ լինելու Ազատության հրապարակում, որովհետև, որպես ադեկվատ մտածող մարդ, ով ցանկանում է իր ընտանիքի հետ միասին շարունակել ապրել այս երկրում, մտահոգված եմ մեր հայրենիքի վիճակով և ապագայով։ Բոլոր այն մարդիկ, ովքեր դեռ քննարկում են՝ գնա՞լ, թե՞ չգնալ վաղվա հանրահավաքին, թող շարունակեն ապրել Նիկոլ Փաշինյանի կերտած Հայաստանում։

Հասարակության ներսում առկա այս բևեռացման խնդիրն, իհարկե, տարիների, ես կասեի՝ տասնամյակների պատմություն ունի։ Սա կապված է Հայաստանի Հանրապետության բոլոր ժամանակների իշխանությունների, նրանց վարած քաղաքականության, կրթական ցենզի և մակարդակի, պետական պրոպագանդայի, մեդիա աղբի տարածման և բազմաթիվ այլ գործոնների հետ, որոնց մասին, նույնիսկ, մի նոր Վիքիպեդիա կարելի է գրել։ Օրվա իշխանությունների բերանի ծամոն՝ թալան կոչվածն, իհարկե, բոլոր ժամանակներում է եղել, սակայն, այսպիսի անգրագիտությամբ, այսպիսի ծավալներով և մեթոդներով, որ կատարվում է սրանց կողմից, երբեք, կրկնում եմ ՝ երբեք չի եղել։ Ինչ վերաբերում է ընդդիմության հրավիրած վաղվա հանրահավաքի ակնկալիքներին, ապա, անձամբ ես, առավել հակված եմ օպերատիվ գործողությունների և դրանցից բխող քայլերի տրամաբանությամբ առաջնորդվել», -ասել է քաղտեխնոլոգ Կարեն Քոչարյանը։

Աղբյուր` Փաստինֆո