Փաստ ինֆո

Ադրբեջանցիները շարունակում են իրենց քաղաքականությունը՝ անդադար առաջ գալու, հայկական կողմը և պաշտպանական գերատեսչությունը ոչ միայն ոչինչ չի անում դա թույլ չտալու համար, այլև՝ փաստն արձանագրելուց հետո ասում է՝ ոչինչ անել չեն կարող։ Այս մասին լրագրողների հետ զրույցում ասաց «Հայաստան» խմբակցության պատգամավոր Աննա Գրիգորյանը։ 

Հիշեցնենք, որ ՊՆ-ն իբրև հերքել էր Ներքին Հանդում ադրբեջանցիների կողմից մարտ ամսին առաջանալու մասին լուրը, միևնույն ժամանակ հաստատել, որ ադրբեջանցիներն առաջացել են, սակայն նշել, թե դա նոր տեղի չի ունեցել, պարզապես վերջիններս նոր են վերադառնում դիրքեր։

Լրագրողների հետ զրույցում Աննա Գրիգորյանը փաստեց, որ պաշտոնական հաղորդագրությունները դարձել են ոչ արժանահավատ։

«Ասում է՝ այն դիրքերը, որտեղ այս պահին տեղակայված են ադրբեջանցիները, ոչ թե՝ հենց հիմա են եկել, այլ՝ որոշ ժամանակ առաջ։ Այսինքն, ասում են, այո, եկել են ՀՀ սուվերեն տարածք, բայց ժողովուրդ ջան, մի խառնվեք, դա եղել է ոչ թե հիմա, այլ՝ որոշ ժամանակ առաջ։ ՊՆ-ն ոնց կարող է նման հաղորդագրություն տարածել։ Եթե որոշ ժամանակ առաջ եկել էին, դուք դա նկատել էիք, ինչու չեք այդ դիրքերը զբաղեցրել և նրանց դուրս շպրտել։ Աբսուրդ է»,- նշեց Գրիգորյանը՝ արձանագրելով, որ դա առնվազն անգործություն է. «Այսինքն, պաշտպանական գերատեսչությունը, որի հիմնական գործառույթը պետք է լինի ՀՀ տարածքային ամբողջականությունը պաշտպանելը, հայտարարում է, որ ադրբեջանական զորքերը եկել են ՀՀ սուվերեն տարածքում կանգնել են, դա եղել է ոչ թե հիմա, այլ՝ նախկինում, բայց մենք ոչինչ չենք արել, սպասել ենք, որ գան ավելի հարմար դիրքավորվեն, վրաններն էլ՝ ավելացնեն»։

Դիտարկմանը, որ, հնարավոր է, փորձում են ասել, որ Սուրեն Պապիկյանը կապ չունի՝ Գրիգորյանն արձանագրեց՝ Ներքին Հանդում բնակչի համար նշանակություն չունի՝ դա տեղի է ունեցել Սուրեն Պապիկյանի ժամանակ, թե դրանից առաջ, այս իշխանությունների օրոք տեղի է ունենում ադրբեջանցիների շարունակական առաջխաղացում և ՀՀ սուվերեն տարածքների օկուպացում։

«Ներքին Հանդի բնակչի համար, որ ամեն օր ստիպված է տեսնել ադրբեջանցի զինվորի, բացարձակ կարևոր չէ՝ ով է ՊՆ նախարարը, իր համար կարևոր է՝ ֆիզիկական անվտանգության ապահովումը»,- նշեց Գրիգորյանը։

Աղբյուր` Փաստինֆո