Փաստ ինֆո

Գորիսի համայնքապետ Առուշ Առուշանյանն անորոշ ժամանակով կշարունակի մնալ կալանավորված։ Սյունիքի մարզի ընդհանուր իրավասության դատարանը՝ դատավոր Գնել Գասպարյանի նախագահությամբ, այսօր հետաձգել է Գորիսի համայնքապետ Առուշ Առուշանյանի խափանման միջոցի փոփոխման հարցի քննությունը։ 

«Փաստինֆո»-ի թղթակցի հաղորդմամբ՝ Սյունիքի ընդհանուր իրավասության դատարանում՝ դատավոր Գնել Գասպարյանի նախագահությամբ, այսօր կայացել է Գորիսի համայնքապետ Առուշ Առուշանյանի, Քարահունջ բնակավայրի վարչական ղեկավար Լուսինե Ավետյանի գործով դատական նիստը, որի ընթացքում ավարտվել է դատակոչված վկաների հարցաքննությունը, ինչից հետո Առուշ Առուշանյանի պաշտպանները պահանջել են, որ քննության առարկա դարձվի Առուշանյանի խափանման միջոցի հարցը։

Փաստաբան Էրիկ Ալեքսանյանը «Փաստինֆո»-ի հետ զրույցում տեղեկացրեց, որ պաշտպանների կողմից միջնորդություն է ներկայացվել՝ Առուշանյանի նկատմամբ ընտրված խափանման միջոց կալանավորումը գրավով կամ անձնական երաշխավորությամբ փոխարինելու մասին, գրավի չափ է առաջարկվել՝ սկսած 60.000.000 ՀՀ դրամից։ Դատարանը, սակայն, որոշել է հետաձգել միջնորդության քննարկումը՝ ասելով, որ խափանման միջոցի հարցին կանդրադառնա վերջնական դատական ակտով, ընդ որում, սա այն պարագայում, երբ խափանման միջոցի հարցը քննվում է անհապաղ, դրա քննարկումը հետաձգելու ընթացակարգ չկա։ Դատարանը պատճառաբանել է, որ պետք է գնահատի կալանավորման հիմքերից նոր հանցանք կատարելու հավանականությունը, ինչի համար անհրաժեշտ է հետազոտել ցուցմունքները և գնահատել, սակայն դա կարող է անել բացառապես խորհրդակցական սենյակում։

Նշենք, որ դեռևս ամիսներ առաջ դատարանը որոշել էր պետական բյուջե բռնագանձել Առուշ Առուշանյանի նկատմամբ ավելի վաղ քննվող քրեական գործով 2 մլն դրամի չափով գրավի գումարը։ Գումարը պետական բյուջե գանձելու միջնորդությունը ներկայացրել էր դատախազությունը՝ հիմքում դնելով Առուշանյանի կողմից ենթադրաբար նոր հանցանք կատարելու հանգամանքը, մասնավորապես, Լուսինե Ավետյանի և իր վերաբերյալ քրեական գործը հարուցվել էր, երբ Առուշանյանը գտնվում էր մեկ այլ գործով մեղադրյալի կարգավիճակում։ Թեև այս հանգամանքը, ինչպես հայտնում է փաստաբան Էրիկ Ալեքսանյանը, չի դրվել ավելի վաղ դատարանի կողմից Առուշանյանի նկատմամբ գրավ կիրառելու միջնորդությունը մերժելու հիմքում, այս անգամ դատարանը որոշել է անդրադառնալ դրան։

Փաստաբանը գտնում է, որ արհեստական հիմքեր են ստեղծվում՝ Առուշանյանին կալանքից չազատելու համար։

«Առուշ Առուշանյանի գործով դատավարությունը քաղաքական է եւ վերջ…չկա օրենք, չկա իրավունք։Մեր դատավարությունը բառի իրական իմաստով ուղղորդվում է քաղաքական իշխանության կողմից»,- հայտարարել է փաստաբան Ալեքսանյանը։

Դատավոր Գնել Գասպարյանի գործուղման ժամկետը՝ Սյունիքի մարզի ընդհանուր իրավասության դատարան շուտով կավարտվի, ապրիլի 4-ին Գասպարյանը կվերադառնա Երևանի ընդհանուր իրավասության դատարան։ Չի բացառվում, որ քաղաքականապես զգայուն քրեական գործով վերջնական դատական ակտը կկայացվի մինչև այդ ժամկետը։

Հիշեցնենք, որ ի սկզբանե դատավոր Գնել Գասպարյանի վարույթում է եղել արտահերթ խորհրդարանական ընտրությունների ավարտից հետո հարուցված քրեական գործը՝ «Հայաստան» դաշինքի օգտին քվեարկելու համար ընտրակաշառք տալու վերաբերյալ, ընդ որում, ըստ ՀՔԾ-ի, որպես ընտրակաշառք է ներկայացվել դրամական աջակցությունը։ Սույն գործի շրջանակներում հուլիսի 5-ին ձերբակալվել էր Գորիս համայնքի Քարահունջ բնակավայրի վարչական ղեկավար Լուսինե Ավետյանը՝ ՀՀ քրեական օրենսգրքի 149-րդ հոդվածի 2-րդ մասի 2-րդ և 4-րդ կետերով, 149.1-րդ հոդվածի 2-րդ մասի 2-րդ կետով, 154.2-րդ հոդվածի 2-րդ մասով և 154.2-րդ հոդվածի 3-րդ մասով նախատեսված արարք կատարելու հատկանիշներով, ապա կալանավորվել, իսկ օրեր անց՝ դատախազի որոշմամբ գրավի դիմաց ազատ արձակվել։ Ավետյանի ցուցմունքի հիման վրա Առուշ Առուշանյանին մեղադրանք է առաջադրվել ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետի, 38-149-րդ հոդվածի 2-րդ մասի 4-րդ կետի և 38-154.2-րդ հոդվածի 3-րդ մասի (քվեարկության գաղտնիությունը խախտելը, ընտրական իրավունքի իրականացմանը խոչընդոտելը) հատկանիշներով։

Մյուս քրեական գործը, որը միացվել է սույն վարույթին, ավելի վաղ է ուղարկվել դատարան և քննվում էր Սյունիքի մարզի ընդհանուր իրավասության դատարանի նախագահ Նապոլեոն Օհանյանի վարույթում։ Սույն գործով որպես մեղադրյալ ներգրավելու մասին որոշման համաձայն՝ Ա.Առուշանյանն իր ընտանիքին պատկանող մեկ այլ ՍՊ ընկերությունում 2020թ. հունվար-փետրվար ամիսներին կատարված գույքագրմամբ արձանագրված շուրջ 33,000,000 ՀՀ դրամ պակասորդի վերաբերյալ պարզաբանումներ ստանալու և պատճառված վնասը հատուցելուն հարկադրելու նպատակով 2020թ. փետրվարին ընկերության պահեստ է կանչել ՍՊ ընկերության աշխատակցին և վերջինիս հետ հանդիպման ընթացքում ֆիզիկական բռնություն գործադրելով և բռնություն գործադրելու սպառնալիքով, որպես պատճառված ենթադրյալ վնասի դիմաց փոխհատուցման միջոց՝ աշխատակցից պահանջել է իրեն տրամադրել նրան պատկանող «Նիսսան պայտֆայնդեր» մակնիշի ավտոմեքենան, բանկում գրավադնել կնոջ հարազատներին պատկանող բնակարանը և ստացած վարկային միջոցները տրամադրել իրեն:

Հեղինակ՝ Իզաբել Սահակյան

Աղբյուր` Փաստինֆո