Փաստ ինֆո

Մեր տարածաշրջանում իրավիճակը գնում է դեպի սրացում, աշխարհաքաղաքական նոր սահմանագիծ է ձևավորվում: Հայաստանը չի կարող խուսափել այս գործընթացից, մենք պետք է հասկանանք՝ ի՞նչ ենք ուզում և աշխարհաքաղաքական ինչ ուղղությունով ենք գնում: «Փաստինֆո»-ի հետ զրույցում նման դիտարկում արեց ԲՀԿ-ական նախկին պատգամավոր Արման Աբովյանը՝ վերլուծելով տարածաշրջանային և աշխարհաքաղաքական վերջին իրադարձությունները:

ԱԺ նախկին պատգամավոր Արման Աբովյանի արձանագրմամբ՝ Ադրբեջանը, օգտվելով ռուս-ուկրաինական պատերազմի հետևանքով ստեղծված գերլարված իրավիճակից, սադրանքների է դիմում Հայաստանի և Արցախի սահմաններին.

«Թուրքիան և Ադրբեջանը գեներացնում են հարմար պահը՝ սահմաններին լարվածություն ստեղծելու, և ինչու ոչ, ռազմական գործողություններ սկսելու համար, հիմա Ռուսաստանը զբաղված է Ուկրաինայով, իսկ թուրք-ադրբեջանական տանդեմն էլ օգտագործում է պահը: Որքան էլ թուրքերը դիրքավորվեն չեզոք այս իրավիճակում, բայց Թուրքիան ՆԱՏՕ-ի անդամ երկրորդ պետությունն է, ոչ Թուրքիան ոչ Ադրբեջանը չեն հասել իրեն վերջնանպատակի, այսինքն՝ հայկական գործոնի տարհանումն տարածաշրջանից, սադրանքներ լինելու են , այստեղ պետք է հասկանալ դրանց լրջությունը և պատրաստ լինել ամենավատ զարգացումներ »,-նկատեց զրուցակիցը:

Ըստ Աբովյանի՝ Ադրբեջանի սադրանքները նաև Թուրքիայի և ԱՄՆ-ի համաձայնությամբ են, որոնք փորձում են Հարավային Կովկասում նույնպես պայքարի նոր ճակատ բացել Ռուսաստանի համար. «Հավաքական Արևմուտքը խնդիր ունի հնարավորինս թուլացնել Արևմուտքի դիրքերը, իսկ որտե՞ղ պետք է թուլացնի, իհարկե՝ Հարավային Կովկասում:

Գոյություն ունի նաև խնդիրների ցանկ, որը փորձում է լուծել՝ Մեծ Թուրանի շրջանակներում միավորվել Ադրբեջանի հետ, բոլոր այն մարդիկ, որոնք բղավելով Հայաստանը կանգնեցրին ոչնչացման եզրին, թող քարտեզը բացեն և նայեն, որ պետության տարածքով է նախատեսվում Ադրբեջանի և Թուրքիայի միավորումը »,-ասաց Աբովյանը:

Իսկ թե արդյո՞ք Հայաստանի իշխանությունները ադեկվատ արձագանք տալի՞ս են տարածաշրջանային այս զարգացումներին, Աբովյանը պատասխանեց.

«Ես չեմ ուզում հավատալ, որ իրենք չեն հասկանում պահի լրջությունը, դրա հետ մեկտեղ անհասկանալի «չորկողությունը»՝ թրքահաճո և ադրբեջանամետ «խաղաղության դարաշրջանի» շրջանակներում, թուլացնում է Հայաստանը և բերելու է արհավիրքի, բոլոր ջանքերն այսօր պետք է ուղղվեն Հայաստանի դիմադրողականությունը բարձրացնելուն, որքան Հայաստանի իշխանությունները խոսում են բարեկամության, դիվանագիտական հարաբերությունների մասին, այնքան պատերազմի և ոչնչացման ռիսկերն ավելանում են»,-ասաց Արման Աբովյանը:

Աղբյուր` Փաստինֆո