Փաստ ինֆո

Հայաստանում գործող իշխանությունը, կներեք արտահայտությանս համար՝ «բռնաբարում է» իրավական դաշտն ու արդարադատությունը,-լրագրողների հետ զրույցում ասաց ԱԱԾ նախկին տնօրեն, ԱԺ «Պատիվ ունեմ» խմբակցության ղեկավար Արթուր Վանեցյանը։

Նա նշեց, թե պետք է այս հարցի շուրջ թե՛ քաղաքական, թե՛ հասարակական գործիչներն ընդվզեն ու հստակ գնահատական տան ստեղծված իրավիճակին:

«Մենք այստեղ չենք եկել պաշտպանելու կոնկրետ մի դատավորի, մենք եկել ենք պաշտպանելու արդարադատությունը, ուստի մեր բոլոր քայլերը պետք է ուղղված լինեն նրան, որ թույլ չտանք Հայաստանը վերածվի բռնապետության, իսկ մենք հակառակն ենք տեսնում, որ ՀՀ իշխանությունները հստակ քայլերով մեր երկիրը տանում են դեպի բռնապետություն»,-ասաց «Պատիվ ունեմ» խմբակցության ղեկավարը։

Արթուր Վանեցյանի խոսքով՝ այս իշխանությունն, առհասարակ, ողջ պետական համակարգը բաժանել է ցանկալիների ու ոչ ցանկալիների: Ընդհանրապես իշխանության գործելաոճն է՝ բարդ նախադասություններով մոլորեցնել մեր հասարակությանը։ Ընդդիմադիր գործիչը  նշեց, որ իրենց ամենօրյա  աշխատանքով պետք է կանխեն այս «բեսպրիդելը», որը տեղի է ունենում մեր օրերում։ 

«Հայաստանն այսօր գտնվում է ծայրահեղ ծանր վիճակում, կան չլուծված անվտանգային բազմաթիվ խնդիրներ, լուծված չէ գերիների վերադարձի հարցը, բայց իշխանության քայլերը միայն սեփական պաշտոնավարումը երկարաձգելուն են ուղղված»,-նշեց ԱԺ «Պատիվ ունեմ» խմբակցության ղեկավարը։

Նշենք, որ այս պահին Երեւանի ընդհանուր իրավասության դատարանը՝ թմբուկահար-դատավոր Դավիթ Արղամանյանի նախագահությամբ, քննարկվում է Սյունիքի մարզի ընդհանուր իրավասության դատարանի դատավոր Բորիս Բախշիյանի նկատմամբ որպես խափանման միջոց կալանավորումը կիրառելու մասին միջնորդությունը։ Վերջինս այս մականունը ստացել է այն բանի համար, որ մասնակցել է Նիկոլ Փաշինյանի քաղաքական ակցիաներին՝ որպես թմբուկահար, իսկ հիմա հանդես է գալիս որպես դատավոր։

Բորիս Բախշիյանի նկատմամբ հետապնդումն սկսվել է լեգենդար հրամանատար Աշոտ Մինասյանի խափանման միջոցը փոխելուց հետո: Ի դեպ, նրան մեղադրում են Նիկոլ Փաշինյանի աջակցին կալանավորելու համար, թեեւ նա, լինելով ամբաստանյալ, ոչ պատշաճ վարքագիծ է դրսեւորել՝ չմասնակցելով նիստերին։ Ընդ որում՝ ամբաստանյալին կալանավորելու դատարանի որոշման հետ համակարծիք է եղել նաեւ դատախազը՝ չբողոքարկելով այն, ինչից ամիսներ անց դատավորի նկատմամբ քրեական գործ է հարուցվել, իսկ ԲԴԽ-ն էլ բավարարել է դատավորին անձեռնմխելիությունից զրկելու ու որպես խափանման միջոց կալանավորումն ընտրելու մասին միջնորդությունները։

Աղբյուր` Փաստինֆո