Փաստ ինֆո

Իրան-Ադրբեջան պաշտոնական հարաբերություններում կարծեք թե լարվածություն չկա, սակայն ռազմական ու քաղաքական ղեկավարների մակարդակով բավականին լուրջ քարոզչական պատերազմ է, ընդհուպ փոխադարձ սպառնալիքներ: «Փաստինֆո»-ի հետ զրույցի ժամանակ այս մասին ասաց իրանագետ Գարիկ Միսակյանը:

Փորձագետի խոսքով Ադրբեջանի հետ սահմանին Իրանի զորավարժությունները և զորքերի տեղաշարժն էլ տեղավորվում են այդ լարվածության համատեքստում:

Ըստ նրա՝ զորավարժությունների և զինտեխնիկայի տեղափոխման պատճառները մի քանիսն են.

«Իրանում չափազանց մեծ անհանգստություն առաջացրեցին թուրք-ադրբեջանական զորավարժությունները Կապից ծովում, ինչն Իրանը պաշտոնական կերպով դատապարտեց: Զորվարաժություններ իրականացնելով և սահմանին հարձակողական զինտեխնիկա տեղափոխելով՝ Իրանը փորձում է կողմերին իր ռազմական ուժը ցույց տալ: Տեխնիկան վկայում է, որ Իրանը կողմերին հասկացնում է՝ ի զորու է նաև հարձակողական բնույթով պաշտպանական գործողություններ իրականացնել: Այսինքն` ցանկանում են ցուցադրել թուրքական զինված ուժերում տեղ գտած տեխնիկային հակազդելու իրանական հնարավորությունները: Սա մեսիջ էր բոլոր այն կողմերին, որոնք որևէ կերպ փորձում են խաթարել կամ անհանգստացնող իրավիճակ ստեղծել Իրանի տարածաշրջանային անվտանգության համար»,-նշեց իրանագետը:

Վերջինս նկատեց, որ Իրանն այսկերպ նաև իր «ատամներն» է ցուցադրում: Ինչ վերաբերում է հարցին՝ արդյոք հնարավոր է, որ այս քայլերը վերածվեն ռազմական գործողությունների՝ Գարիկ Միսակյանի դիտարկմամբ, այս փուլում գրեթե զրոյական է դրա հնարավորությունը, քանի որ նախ Ադրբեջանն ի զորու չէ Իրանի դեմ որևէ ռազմական գործողություն իրականացնել, իսկ իրանա-թուրքական մրցակցությունը թեև տարածաշրջանում բավականին լարված է, այնուամենայնիվ լայնածավալ ռազմական գործողությունների կամ տեղային ռազմական բախումների դրանք չեն հանգեցնի:

Իրանագետը նաև նշում է, որ Իրանն անհանգստացած է հատկապես Գորիս-Կապան ճանապարհով:

«Իրանի դեսպանը նշել է, որ Հայաստանը պետք է հնարավորինս արագ ավարտի այլընտրանքային ճանապարհի շինարարությունը, քանի որ Գորիս-Կապան ճանապարհահատվածով այս պահին կարելի է ասել բնականոն ապրանքաշրջանառություն իրականացնելու հնարավորություն չկա: Եթե պաշտոնական մակարդակում այդ անհանգստությունն արտահայտվեց չեզոք հայտարարություններով, ապա ԶԼՄ-ների և փորձագիտական մակարդակում դա որակվեց որպես թուրք-ադրբեջանական տանդեմի կողմից Իրանի տարանցման ուղիների չեզոքացման քաղաքականության շարունակություն»,-նշեց Գարիկ Միսակյանը:

Վերջինս հավելեց, որ իրանական կողմը գործիքակազմ և հնարավորություն չունի մեր փոխարեն ինչ-որ խնդիր լուծելու համար, հատկապես այն դեպքում, երբ հայկական կողմից են հնչում հայտարարություններ, որ այդ տարածքներն ադրբեջանական տարածքում են գտնվում:

Աղբյուր` Փաստինֆո