Փաստ ինֆո

Հանձնաժողովը յուրաքանչյուր տարվա վերջում դիմում է բոլոր հեռարձակողներին խնդրանքով՝ ներկայացնել այն բոլոր միջամտություններն ու դժգոհությունները, որ նրանք ունեն գործադիր, դատական և օրենսդիր իշխանություններից։ ԱԺ-ում այսօր հայտնեց ՀՌՀ նախագահ Տիգրան Հակոբյանը՝ նշելով, որ գանգատը եղել էր այն, որ որոշ պաշտոնատար անձինք, այդ թվում նաև  պատգամավորներ,  խտրական, անհարգալից, արհամարհական, երբեմն սպառնալիքներով համամեմված դրսևորում են ցուցաբերել լրագրողի և լրատվամիջոցների նկատմամբ: 

«Մենք իհարկե գտնում ենք, որ սա անթույլատրելի է, բայց մենք նաև համարում ենք, որ բացասական այդ երևույթները համատարած բնույթ չեն կրել և չեն վտանգել լրատվամիջողների ազատությունն ու անկախությունը»,-վստահեցրեց Տիգրան Հակոբյանը։ նա կարծում է, որ լրատվամիջոցների ազատությունն անցած տարի ավելի շատ վտանգել են համավարակն ու արցախյան պատերազմը, որովհետև, ըստ բանախոսի, լրատվամիջոցների եկամուտների կտրուկ նվազումը շատերին ֆինանսական կախվածության մեջ է դրել տարբեր քաղաքական ուժերից, որոնք չեն հաշվառվում և չեն ներկայացվում։ 

«Սակայն այդ դրական եզրակացությունը չի նշանակում, որ մեր հանձնաժողովը այս ոլորտում ազատության վիճակը գնահատում է բավարար»,-նկատեց Հակոբյանը՝ միաժամանակ հավելելով, որ հանձանժողովի սահմանափակ հնարավորությունները, տեղեկատվական հստակ քաղաքականության բացակայությունը լուրջ խոչընդոտ են հանդիսանում կայուն համակարգ ստեղծելու գործում, որ կսպասարկեր հանրային շահը։   

«Հիմնադիրների, քաղաքական ուժերի ազդեցությամբ, խմբագրական և կադրային քաղաքականության միջամտությամբ, ստվերային ֆինանսավորմամբ ևս սահմանափակվում է լրատվամիջոցների ազատությունը և անկախությունը: Ակնհայտ է, որ այդ միջամտությամբ է պայմանավորված, որ որոշակի հեռարձակողներ հաճախ անտեսում են հանրային շահը,  սպասարկում են քաղաքական ուժերի և անհատների շահերը»,- եզրափակեց նա:

Աղբյուր` Փաստինֆո