Փաստ ինֆո

Ցավոք սրտի, կանխել արտահերթ խորհրդարանական ընտրությունները, կարծես թե չի ստացվում՝   ՀՀԿ կենտրոնական գրասենյակում կուսակցության Գերագույն մարմնի  նիստից հետո հայտարարել է ՀՀԿ փոխնախագահ Արմեն Աշոտյանը։

Ըստ նրա՝  Հանրապետականը մինչև վերջ իր գործընկերների հետ ջանքեր է գործադրել՝ առկա  հանգամանքներում ներկայացնելով իր դիրքորոշումը, այն է՝   «Մենք գալիք ընտրություններն այս ժամկետում և այս ձևով նպատակահարմար չէինք համարում: Նախ՝  երկիրն այն վիճակում չէ, որ կարողանա ընկղմվել նախընտրական տենդի մեջ, մի կողմ թողնելով բազմաթիվ` անվտանգային, քաղաքական, տնտեսական սոցիալական և այլ բնույթի մարտահրավերներ:

Երկրորդ՝ կապիտուլյանտի ղեկավարությամբ և կապիտուլյանտի  օրոք  գնալ ընտրությունների, նշանակում է  առնվազն բարոյական տեսակետից քաղաքական շղարշով մաքրազերծման շանս տալ նրան: Մենք շատ լավ պատկերացնում ենք, որ այս դավադիր, կապիտուլյանտ իշխանությունների գործելաոճը չի նպաստելու ընտրությունների մաքսիմալ ներառական, հավասար պայմանների՝  անաչառ, իրավական գործընթացի վերածվելուն»։

ՀՀԿ փոխնախագահը թվարկում է   վերջին ժամանակահատվածում կապիտուլյանտ իշխանությունների իրականացրած մի շարք հակասահմանադրական և հակաիրավական գործողություններ, որոնց թվում է վարչապետի պաշտոնը զբաղեցրած անձի հրաժարականից հետո նույն անձի՝ տվյալ պաշտոնում  ժամանակավոր պաշտոնակատար ինքնահռչակվելը : Այդ համատեքստում է նաև Ընտրական օրենսգրքի միահեծան փոփոխությունները, որոնք թեպետ Վենիտիկի հանձնաժողովի կողմից մասամբ որակվել են որպես քաղաքական կոնսենսուսով լայն քննարկումների արդյունքում իրականացված փոփոխություններ, այնուհանդերձ, բանախոսի  պնդմամբ՝  այդպիսիք չեն եղել: «Քանզի՝ խորհրդարանական խմբակցություններից մեկը բոյկոտել է քվեարկությունը,  մյուսն՝ անողոք քննադատության է արժանացրել ներկայացված ընտրական օրենսգրքի փոփոխությունների փաթեթը: Իսկ արտախորհրդարանական հիմնական ուժերը, հատկապես՝ Հանրապետականը, դեռ  ընտրություններից մի քանի ամիս առաջ են դեմ արտահայտվել նման լրջագույն փոփոխություններին» ,- շեշտել է  Աշոտյանը՝ հայտարարելով, որ այս ամենն արդեն իսկ անխուսափելի են դարձնում արտահերթ ընտրությունների անցկացումը։

Ի լրումն վերը թվարկածի, նախկին ԿԳ նախարարի ու ՀՀԿ փոխնախագահի թվարկած մեկ այլ կարևոր փաստարկ է կրթական համակարգից ստացվող տասնյակ ահազանգերն առ այն,  որ իրավապահ համակարգի տարբեր մարմիններ և օղակներ իրենց մոտ են հրավիրում և այսպես ասած՝ քննչական գործողություններ  նախաձեռնում հարյուրավոր տնօրենների և կրթական համակարգի այլ ներկայացուցիչների նկատմամբ, ինչն, Արմեն Աշոտյանը «ներկա  իշխանությունների օրոք՝ ընտրությունների տակ դրված է լրջագույն ական» է համարում՝ պարզվում է՝  շատ հաճախ այս մարդկանց հարցաքննությունները տևում են մինչև ուշ գիշեր:

«Ելնելով դավադիր կապիտուլյանտի դեմ միասնական, համայն քաղաքական ուժերի հետ ներդաշնակությամբ պայքարի հրամայականից, մենք որոշում ենք կայացրել մասնակցել այս քաղաքական գործընթացին, քանզի իրական ընդդիմադիր ուժերը վերահաստատել են իրենց մասնակցությունն առաջիկա  ընտրություններում և միայն հանրապետականն էր մնացել, որի մասնակցության որոշումը արդեն  կայացված է՝ ՀՀԿ-ն մասնակցելու է այս ընտրությանը։

Թեպետ՝ կապիտուլյանտի օրոք և նրա մասնակցությամբ․․․

Աղբյուր` Փաստինֆո