Փաստ ինֆո

Արցախյան երրորդ պատերազմը քննող հանձնաժողովի ստեղծման, ռազմական դրության պահպանման և պատերազմին առնչվող տարբեր հարցերի շուրջ «Փաստինֆո»-ն զրուցել է  ԱԺ «Լուսավոր Հայաստան» խմբակցության պատգամավոր Կարեն Սիմոնյանի հետ.

- Պարո՛ն Սիմոնյան պատերազմի ավարտից արդեն մոտ 4 ամիս է անցել, ՊՆ-ն հաղորդում է որ սահմանին իրավիճակը կայուն է և շփման գծի ամբողջ երկայնքով սահմանային միջադեպեր չեն արձանագրվել, սակայն Հայաստանում պահպանվում է ռազմական դրությունը: Ո՞րն է հինգ ամիս շարունակ ռազմական դրության պահպանման նպատակը, երբ Հայաստանին պատերազմ ի սկզբանե հայտարարված չի եղել ընդհանրապես։  

- Իրավաբանորեն Հայաստանը համարվում է Արցախի անվտանգության երաշխավորը, կամավորները, որոնք մեկնել են Արցախ՝ պատերազմին մասնակցելու, մեկնել են Հայաստանից: Ռազմական դրությունը իրավաբանորեն նպատակ ուներ աջակցել Արցախի մեր հայրենակիցներին: Հիմա դա ոչնչով արդարացված չէ, որովհետև պատերազմն ավարտվել է և ավարտվել է պարտությամբ:

- Իսկ ռազմական դրության չեղարկման ուղղությամբ Ձեր խմբակցությունն ի՞նչ քայլեր է ձեռնարկու:

- «Լուսավոր Հայաստանը» մի քանի անգամ նախաձեռնել է ռազմական դրության վերացմանը նվիրված արտահերթ նիստ, բայց տեսնում եք՝ անարդյունք, կառավարող մեծամասնությունը չի կարողանում կողմնորոշվել, թե իրեն ինչի՞ համար է պետք ռազմական դրությունը:

- ՀՀ երրորդ նախագահ Սերժ Սարգսյանն իր հարցազրույցում հայտարարեց, որ 2018-2024 թվականների համար սպառազինության պլան է կազմվել, որով նախատեսվում էր ավիացիոն, ՀՕՊ և անօդաչու թռչող նոր սարքեր ձեռք բերել: Սակայն իշխանափոխությունից հետո գործող իշխանությունը չեղարկել է սպառազինության այդ պլանը: Հաշվի առնելով պատերազմի ելքը և կորուստները՝ ինչպե՞ս եք գնահատում սպառազինության պլանի փոփոխության արդյունավետությունը:

- Մենք ևս մեկ անգամ փաստում ենք՝ որքան անհրաժեշտ է ունենալ պարիտետային փաստահավաք քննիչ հանձնաժողով, որը հնարավորություն կտա հավաքել բոլոր փաստերը և հետագայում այդ փաստերի հիման վրա եզրակացություն կատարել՝ արդյո՞ք ռազմական պլանի փոփոխությունը դրական էր, թե՝ բացասական և, եթե բացասական էր, ինչու՞ է դա կատարվել, ով է դրա համար պատասխանատու, և ով է մեղավոր:

- Իսկ իշխանությունն ինչու՞ է խուսափում փաստահավաք խումբ ստեղծելու գաղափարից։

- Իմ կարծիքով իշխանությունն էլ ունի մեղքի իր բաժինը և, չլինելով կանխակալ, քանի որ պետք է սպասենք փաստահավաք խմբի արդյունքներին, կարող եմ ասել, որ եթե իրենք մտածելու բան չունեն, պետք է համաձայնվեն ։

- Ձեր կարծիքով՝ գործող իշխանության օրոք որքանո՞վ արդյունավետ կլինի այդ փաստահավաք խմբի գործունեությունը :

- Եթե Սերժ Սարգսյանի օրոք կարողացել է գործել մարտի մեկի փաստահավաք խումբ, ապա Նիկոլ Փաշինյանի օրոք կարող է գործել Արցախյան պատերազմի փաստահավաք խումբ

- Ընդդիմությունն, օրինակ` պնդում է, որ այս իշխանության օրոք պատերազմի թափանցիկ քննություն չի կարող իրականացվել, սակայն Ձեր խմբակցության ղեկավարը հայտարարեց, որ եթե սպասենք իշխանափոխության, ապա փաստերը և վկայությունները կհնանան: Ձեր գնահատականը։

- Մի մոռացեք, որ դրանք հիմնականում մարդկանց հիշողություններ են, իսկ մարդու ուղեղը կատարյալ համակարգ չէ և մտապահում է ինֆորմացիան ֆրագմենտացված, այսինքն՝ որքան թարմ են հիշողությունները, այնքան շատ բան կարող են պատմել մարդիկ: Հինգ տարի հետո, այն մարդիկ, ովքեր մասնակցել են, կունենան այդ հիշողությունների ընդամենը 10 կամ 20 տոկոսը ամբողջ պատկերի: Դրա համար մենք ցանկանում ենք որքան հնարավոր է շուտ, քանի ինֆորմացիան թարմ է, , ամբողջը փաստաթղթավորել, հավաքել և ունենալ մեկ ընդհանուր զեկույցում: Կլինի դա 100 հատոր, թե՝ 1000, դա կարևոր չէ, պետք է այդ ամենն ունենանք փաստաթղթավորված, որպեսզի դրա հիման վրա կարողանան եզրակացություններ անել և՛ քննչական մարմինները և՛ պետական գործիչները, որպեսզի այն սխալները, որոնք եղել են, չկրկնվեն:

- Սերժ Սարգսյանը հայտարարեց, որ պատերազմի ժամանակ կառավարությունը, շրջանցելով ՊՆ-ին, գնել է զրահաբաճկոն 600 դոլարով, մինչդեռ զրահաբաճկոն կարելի էր ձեռք բերել մի քանի անգամ ցածր գնով: Որքա՞նով են արդարացված պատերազմական վիճակում գտնվող երկրի համար նման որոշումները:

- Ես ենթադրում եմ, որ նման հայտարարությունից հետո ԱԱԾ-ն պետք է քրեական գործ հարուցեր, և արդեն քննություն իրականացներ, որովհետև քննությունը պետք է պարզի՝ որքանով է արդարացված նման գնումները: Միգուցե դա եղել է պահանջի ազդեցության տակ,այսինքն՝ չի եղել զրահաբաճկոն և պահանջարկը գերազանցել է առաջարկին, տեղի են ունեցել սպեկուլյացիաներ: Սա կարող է լինել դիրքի չարաշահում, կարող է լինել նաև ոչ կոմպետենտ աշխատանքի արդյունք: Դրա համար այս ամենը պետք է լինի քննության առարկա և հանրությունն իմանա՝ արդյո՞ք եղել է նման բան և որքա՞նով է մեղավոր կամ անմեղ գործող իշխանությունը:

- Իմքայլական պատգամավոր Ռուբեն Ռուբինյանը, անդրադառնալով այս հարցին, նշել էր, որ պատերազմի օրերին զրահաբաճկոններ ձեռք բերելու հարցը բավականին շտապ էր և հորդորել է  դիմել ՊՆ-ին:

-  Իմ կարծիքով ԱԱԾ-ն պետք է վաղուց քրեական գործ հարուցած լիներ այդ հայտարարության հետ հաջորդ օրը։

Աղբյուր` Փաստինֆո