Փաստ ինֆո

Նիկոլ Փաշինյանը Հայաստանից փորձում է ձուլել Հյուսիսային Կորեա: Այս մասին «Փաստինֆո»-ի հետ զրույցում ասել է ԲՀԿ խմբակցության պատգամավոր Նաիրա Զոհրաբյանը՝ անդրադառնալով «Զանգվածային լրատվության  մասին» ՀՀ օրենքում իշխանության նախաձեռնած փոփոխություններին։ Դրանով նախատեսվում է արգելել անանուն աղբյուրներին հղում անելը։ 

Մասնավորապես՝ շրջանառության մեջ դրված նախագծով առաջարկվում է «ԶԼՄ մասին» օրենքի 3-րդ հոդվածը լրացնել նոր դրույթներով, որոնց համաձայն արգելվում է հղում կատարել այն աղբյուրներին, որոնցում ներառված չեն «Զանգվածային լրատվության մասին» օրենքով նախատեսված տվյալները, կամ անանուն են:

Նաիրա Զոհրաբյանը տեղեկացրեց, որ իշխանությունը նախագիծը շրջանառության մեջ է դրել երեկ՝ օրվա երկրորդ կեսին։

«Այն ինչ արվել է 2.5 տարի, մեկ նպատակ է հետապնդում՝ Հայաստանը դարձնել տոտալ բռնապետություն: Ի ՞նչ է նշանակում՝ եթե լրատվամիջոցը որևէ ֆեյսբուքյան գրառում դնի, անպայմանորեն պետք է աղբյուրը նշվի, բա այդ դեպքում, իրենք իրենց ֆեյքերով, որ ամբողջ երկիրը ապականում են, հետո իրենց ֆեյքերից վերցնում են ՊՈԱԿ-ներում բուծված լրատվամիջոցներով տարածում են, դրա մասին չե ՞ն մտածում»,-ասաց Զոհրաբյանը:

Պատգամավորը նկատում է, որ այս նախագծով իշխանությունը փորձում է լռեցնել իրենց անհաճո լրատվամիջոցիներին.

«Սա անթույլատրելի է, ես արդեն խոսել եմ Վենետիկի հանձնաժողովի իմ գործընկերների հետ, ներկայացրել եմ իմ մտահոգությունները՝ ԶԼՄ-ների մասին օրենքում սպասվող այս խայտառակ փոփոխությունների հետ կապված, ես կարծում եմ, սա այն դեպքն է, երբ լրատվամիջոցները պետք է մի կողմ դնեն իրենց քաղաքական նախապատվությունները և բոլորը միասին պայքարեն։ Ես միանալու եմ լրատվամիջոցների ցանկացած պայքարին, պետք է թույլ չտանք, որ մարդ, որը եղել է նախկին լրագրող ով խոսում և խոսել է բացառապես ազատ խոսքից։ Փորձի լռեցնել լրատվամիջոցներին, սա ազատ խոսքը ճնշելու միջոց է, որ պետք է կանխվի»,-ասաց նա:

Զոհրաբյանը լրատվամիջոցներին հորդորում է օգտագործել ցանկացած միջոց՝ իրենց իրավունքները պաշտպանելու համար.

«Հիշում եք՝ երբ Փաշինյանին պարբերաբար փորձում էին կալանավորել, քրեական գործեր հարուցել, Հայաստանի բոլոր լրատվամիջոցները, անկախ քաղաքական նախապատվությունից, ամիսներով նախագահականի դիմաց ցույց էին անում: Մենք բերաններս սև լենտով կանգնում էինք, և ասում, որ թույլ չէինք տա լռեցնել լրատվամիջոցներին

Հիմա ես պատրաստ եմ նույն ակցիան անել լրագրողների հետ, քանի որ որևէ մեկը չի կարող լռեցնել ազատ խոսքը Հայաստանում»,-մեզ հետ զրույցում ասաց Նաիրա Զոհրաբյանը:

Աղբյուր` Փաստինֆո