Փաստ ինֆո

Վերջին շրջանում առաջին անհրաժեշտության ապրանքների, սննդամթերքի շրջանում գնաճ է նկատվում։ 

«Փաստինֆո»-ի հետ զրույցում Սպառողների միության նախագահ Արմեն Պողոսյանն ասաց, որ ամեն օր թանկացումների վերաբերյալ ահազանգեր ու բողոքներ են ստանում։

Արմեն Պողոսյանը նշեց՝ վերջերս ԱԺ-ում հայտարարվեց, որ տարվա արդյունքներով գնաճը կազմել է 2․5 տոկոս, սակայն իրենց համար դա արժանահավատ չէ, քանի որ ավելի մեծ չափի թանկացումներ են տեսնում հենց առաջին անհրաժեշտության ապրանքների շրջանում, այդ թվում թանկացել են կաթնամթերքը, հացը, ձեթը, ծխախոտը։

«Բանն այն է, որ չկա մեթոդական մոտեցում՝ առաջնային սպառման ապրանքներն առանձին հաշվարկելու։ Պետք է առանձնացնել մոտ 15 ապրանքատեսակ և ծառայություններ ու այդ շրջանակներում հաշվարկել գնաճը։ Եթե 470 ապրանքատեսակ միջինացնելով է ստացվում գնաճը, ապա իրական պատկերը կորում է և առաջին ապրանքների գնաճի տոկոսը չի երևում այնպես, ինչպես որ կա»,-ասաց Արմեն Պողոսյանը։

Սպառողների միության նախագահը նկատեց՝ երբ դրամն արժեզրկվում է, դա նպաստում է ներմուծմանը, իսկ մեզ պետք է ճիշտ հակառակը, որ բոլոր միջոցներն արտահանմանը խթանեն։ Մասնագետի խոսքով մեզ մոտ ներմուծման ծավալները մոտ 2-3 անգամ գերազանցում են արտահանմանը, ինչն էլ բոլոր տնտեսական չարիքների հիմնական պատճառն է․ «Պետք է ձգտենք այդ տարբերությունը կրճատել։ Այսինքն` մենք կերակրում ենք Չինաստանում կամ Թուրքիայում այդ մարդկանց, եթե ուրիշ երկրի ապրանք ենք գնում, իսկ սեփական արտադրանքը վաճառելը մեզ մոտ շատ վաղուց վերացել է»,-ասաց Արմեն Պողոսյանը, ում կարծիքով թանկացումներից խուսափելու մեթոդը կարող է լինել արտահանման ծավալները մեծացնելը։

Դիտարկմանը, որ նախքան պատերազմն ու կորոնավիրուսը բնակչության սոցիալական կենսաապահովման մակարդակը ցածր էր և չէր բավարարում անգամ սպառողական զամբյուղի համար, այժմ թանկացումներին զուգահեռ իրավիճակն ավելի կվատանա, Արմեն Պողոսյանը նշեց, որ աղքատության շեմին գտնվող մարդկանց տոկոսը շատանում է․ «Վերջին շրջանում՝ ավելի քիչ, քան մեկ տարում, ընդհանուր բնակչության մեջ աղքատներն ավելացել են 20-26 տոկոսով, ինչն աղետ է։ Բնակչության գնողունակությունը պետք է բարձրացնել գոնե այն մակարդակին, որ առաջին անհրաժեշտության ապրանքները կարողանան գնել։ Մեզ մոտ բացի մի խավից, որը կազմում է 10-12 տոկոս, մնացած բոլորը գտնվում են այդ սահմանին մոտ կամ սահմանից ցածր։ Գոյություն ունի դեցիլային հետազոտություն, այսինքն իրենց վճարողունակությամբ 10 -ական տոկոսների բաժանված խավեր և եթե այդ տեսանկյունից ենք դիտարկում, ապա առաջին 10 տոկոսը եռակի ավելի շատ միրգ և մսամթերք է օգտագործում , քան վերջին դեցիլային խումբը՝ նույն 10 տոկոսը, բայց ավելի աղքատների շրջանում։ Դա աղետ է։ Եթե մարդիկ թերսնվելու են, դա սկսելու է ազդել առողջական վիճակի վրա և արտագաղթի հիմնական պատճառ է դառնալու»,-ասաց Սպառողների միության նախագահը։

Աղբյուր` Փաստինֆո