Փաստ ինֆո

«Հիմա արդեն Արցախի անվտանգության միակ երաշխավորն, ավաղ, այլևս Հայկական բանակը չէ, այլ Ռուսաստանը։ Հետևաբար, որքան որ հարմար կգտնի ռուսական շահն, այնքան էլ կերաշխավորի Արցախից մնացած այս փոքրածավալ կրճոնի գոյությունը,- ասում է գրող, հրապարակախոս Լևոն Ջավախյանը, «Փաստինֆո»-ի հետ զրույցում վերլուծելով հայկական վերահսկողության տակ մնացած Արցախի տարածքային անվտագության թեման և հավելում, -դաշնակցական Լիլիթ Գալստյանը շատ լավ էր նկարագրել այս ամենի հեղինակի՝ Նիկոլ Փաշինյանի ներկա հոգեվիճակը՝ վիզը ծուռ, ձայնը նստած, տխրամած դեմքով, խեղճ ու անվստահ... Նման վիճակում գտնվող վարչապետը այլևս ի զորու չէ պետական նշանակության հարցեր լուծել։ Նրա այդօրինակ կերպարը, թերևս, ձեռք տա Ռուսաստանին, ով այլևս գործ ունի, փաստորեն, քաղաքական դիակի հետ, ով ոչնչով ի զորու չէ ռուսական կայսրեպաշտական նկրտումներին»։ 

Հարցին՝ ի՞նչ հրատապ քայլեր է պետք ձեռք առնել այսպիսի իրավիճակում առավել ցավալի և մեծ կորուստներ կամ նույնիսկ՝ պետականության կորուստ չունենալու համար, գրող, հրապարակախոսը պատասխանում է՝ պետք է գտնել, թերևս, կրկին ռուսահպատակ հայ պետական գործչի, ով կընդունի վարչապետական պոստը և ի վիճակի կլինի փրկել դեռևս պետական կարևորություն ունեցող գործոններ, որոնք իսպառ կորսված չեն. «Այս ասելով նկատի ունեմ առաջին հերթին՝ Ադրբեջանին Մեղրու վրայով խայտառակ ճանապարհի տրամադրման խոչընդոտմանը կամ Սյունիքի վրա Դամոկլյան սրի նման կախված թուրքական վտանգը։ Դա կարող է կանխել միայն չկոտրված մարդը։ Նիկոլ Փաշինյանը միանգամայն վերջացած մարդ և քաղաքական գործիչ է, ով այլևս իր փրկությունը գտնում է միայն ամենօրյա խումհարներում ։

Դա թերևս թեթևացնում է իր անձնական բեռը, սակայն ավելի ու ավելի է ծանրացնում մեր խարխուլ պետականության բեռը։ Պետությունն այսօր առաջ է շարժվում ինքնահոսի սկզբունքով, այն այլևս դուրս է վարչապետի վերահսկողությունից։ Ակնհայտորեն երկրի ներսում կառավարման ճգնաժամ է, իսկ պերմանենտ նախարարափոփոխություններ չեն կարող լուծել այս խնդիրը։ Օրվա հրամայական է դարձել՝ խեղճ ու անօգնական վարչապետի հրաժարականը»։

Գրող, հրապարակախոս Լևոն Ջավախյանը, սակայն շարունակում է լավատես մնալ՝ ստեղծված իրավիճակից դուրս գալու համար անհրաժեշտ է առաջ գնալ, իսկ առաջ գնալու համար առաջ գնալու տեղ է պետք, ասում է բանախոսը «Փաստինֆո»-ի հետ զրույցում և հավելում.« Ներկա կառավարությունը՝ Նիկոլի գլխավորությամբ խցանում է ելք տանող բոլոր ճանապարհները։ Նոր ուժեր են պետք, որոնց նկատմամբ ժողովուրդը կոմպրոմատներ չունի և, որոնց քաղաքական հասունությանը կհավատա ազգայի սերուցքը։ Անհրաժեշտ է արագ կերպով ստեղծել արժանավորների իշխանություն, մերիտոկրատիայ, որոնք զերծ կլինեն դեմոկրատական խաբկանքից և արևմտյան ազատամտական հռետորաբանությունից ու հորջորջումներից։ Լինելով ռուսական ազդեցության ոլորտում և ունենալով Ռուսաստանի անվերապահ աջակցությունը, նրանք պետք է կարողանան դնել ազգային ամուր պետականություն ունեցող երկրի երկաթյա հիմքերը: Ռուսաստանի շահը պետք է որ հետապնդի Կովկասի հարավում ունենալ ռազմական հզոր դաշնակից՝ ուժեղ Հայաստան։

Դրա համար Ռուսաստանի հետ անդուլ աշխատանք պետք է տարվի՝ հարավային Կովկասում, հանձինս Հայաստանի, Իսրայելի նման ռազմական հզոր պոտենցիալով Հայաստանի ստեղծում ապահովելու համար: Սրան հասնելու համար, անշուշտ, պետք է վայելել Ռուսաստանի անվերապահ վստահությունը, ոչ թե կրկին ստեղծել սորոսական մի բաստիոն, այս անգամ արդեն նախկինի ավերակների վրա։ Մեր ունեցած դառը փորձը պետք է, որ մեզ սովորեցրած և դաստիարակած լինի։ Բոլոր գունավոր հեղափոխություններ ապրած երկրները՝ Վրաստանը, Ուկրաինան, Հայաստանը այդ պայքարից դուրս եկան բզկտված և տանուլ տված։ Ռուսական խաղաղապահ զորքերն այլևս հանգրվանել են Հարավային Կովկասում։

Հետևաբար, հանուն իր ռեգիոնալ և քաղաքական շահի, Ռուսաստանը կրկին փրկության օղակ կլինի հայ ժողովրդի համար։ Մեզ մնում է այլևս չուտել արևմտյան կուտը և մեր պետականության ամրապնդման շահը ոչ մի պարագայում բաց չթողնել մեր ձեռքից։ Այո, հանձինս Հարավային Կովկասում Հայաստանի ռազմականապես հզոր նոր պետականության ստեղծման՝ ի հեճուկս Թուրքիայի և ի հզորացումն Հայոց գալիք ապագայի…»,- եզրափակում է զրույցը գրող Լևոն Ջավախյանը:

Աղբյուր` Փաստինֆո