Փաստ ինֆո

Հերիք է հակառուսական տրամադրություններ սերմանեն։ «Փաստինֆո»-ի հետ զրույցում ԱՀ նախագահի խորհրդական Դավիթ Բաբայանն այսպես արձագանքեց արցախցի քաղաքագետ Ալեքսանդր Քանանյանի այն գրառմանը, որ խաղաղապահները հայերին արտաքսում են իրենց տներից։

«Ես չգիտեմ նման փաստեր կան, թե ոչ։ Չեմ կարող ասել, բայց հերիք է հակառուսական տրամադրություններ սերմանեն որոշ մարդիկ։ Զզվել ենք արդեն։ Հատկապես էս օրհասական պահերին։ Ո՞նց կարող է ռուս ժողովուրդը մեր դեմ լինի»,-նշեց Դավիթ Բաբայանը։

Հարցին՝ Արցախում ստեղծվե՞լ է աշխատանքային խումբ, որը վերահսկելու է այդ ամբողջ գործընթացը, Դավիթ Բաբայանն արձագանքեց. «Չեմ կարող այդ պատասխանը տալ։ Կարծում եմ՝ տրամաբանությունն այնպիսին է, որ պետք է լինի նման աշխատանքային խումբ, բայց չգիտեմ՝ դա ինչքանով է ստացվելու։ Այդ հարցերով պետք է համապատասխան մարմիններին դիմեք»,-հավելեց Դավիթ Բաբայանը։

Նշենք, որ ժամեր առաջ արցախցի քաղաքագետ Ալեքսանդր Քանանյանը գրել էր, որ խաղաղապահները սկսել են բռնություն գործադրել հայ բնակչության նկատմամբ. «Արտաքսում են տներից և թույլ չեն տալիս առաջին անհրաժեշտության իրեր հանել»,-գրել է քաղաքագետը։

Հիշեցնենք, որ նոյեմբերի 10- ին, Ադրբեջանի նախագահի, Հայաստանի վարչապետի և Ռուսաստանի նախագահի միջև հայտարարություն է ստորագրվել, որով հայտարարվել է հրադադար և ռազմական բոլոր գործողությունների դադարեցում 2020 թվականի նոյեմբերի 10-ից: Ադրբեջանի Հանրապետությունը և Հայաստանի Հանրապետությունը կանգ են առնում իրենց կողմից զբաղեցրած դիրքերում։ Ռազմավարական նշանակության մի շարք տարածքներ, այդ թվում` Քաշաթաղը, պատմական Դադիվանքը հանձնվելու է թշնամուն:

Լեռնային Ղարաբաղում՝ շփման գծում, ինչպես նաև Լեռնային Ղարաբաղը Հայաստանի Հանրապետությանը կապող միջացքների երկայնքով տեղակայվում են Ռուսաստանի դաշնության խաղաղապահ ուժեր։ Արդեն մի շարք բնակիչներ Արցախում լքում են իրենց տները:

Վերլուծաբան Տիգրան Աբրահամյանը ֆեյսբուքյան էջում գրել էր. «Կրկին Արցախ եմ գնում... Ճանապարհին Դեր զորի պատկերն է դիմացս, վեշերը բեռնատարներով, ֆորդերով հանող արցախցիներ, հայրենազրկված մարդիկ, որոնցից շատերը իմ ընկերներն են»։

Աղբյուր` Փաստինֆո