Փաստ ինֆո

Հայաստանն այսօր և դեռ երկար ժամանակ կանգնած է լինելու լուրջ մարտահրավերների առջև, - այսօր նման հայտարարությամբ է հանդես եկել «Հանուն սոցիալական արդարության» կուսակցության նախագահ Արման Ղուկասյանը ու ավելացրել. «Սա պետք է հասկանանք, ունենանք դրա համար ավելի երկարաժամկետ տեսլական այս մարտահրավերին պատասախանելու, պատրաստ լինելու համար»:

Բանախոսն արձանագրել է, որ տարածաշրջանում լուրջ և որակապես նոր դեր է ստանձել Թուրքիան, որն ապակառուցողական է, ուղղված է` տարածաշրջանն անկայունացնելուն։

Ահաբեկիչներին ներմուծելով Հարավային Կովկաս` Ա.Ղուկասյանի կարծիքով, Թուրքիան փորձում է մեր տարածաշրջանը նմանեցնել Մերձավոր Արևելքին։

«Տարածաշրջանի բոլոր երկրները գտնվում են մեծ ռիսկերի առջև, ամեն օր տեսնում ենք ապակայունացման միտում, ինչը վերջում կարող է բերել քաոտիկ վիճակի ողջ տարածաշրջանում»,- այսօրվա ասուլիսում ասել է Արման Ղուկասյանը:

Նրա գնահատմամբ` այստեղ կարևոր է Ռուսաստանի դերը։ «Ռուսաստանը հենց այս կոնֆլիկտի պարագայում էլ ցույց տվեց, որ միակ գերտերությունն է, որ իսկապես ռեալ ջանքեր է գործադրում այս կոնֆլիկտը դադարեցնելու համար, իսկապես զսպում է Ադրբեջանին և Թուրքիային»,- ասաց նա։

Վերջինիս կարծիքով` ՌԴ Զինված ուժերի կողմից Սիրիայում թուրքամետ տարբեր ահաբեկչական օջախներին վնաս հասցնելը կապված է ղարաբաղյան կոնֆլիկտի հետ։ Ավելին` ՌԴ-ն հայտարարել է նաեւ, որ մասամբ արգելելու է թուրքական ու ադրբեջանական գյուղատնտեսական մթերքի մուտքը, ինչը, ըստ Ա. Ղուկասյանի, շատ մեծ վնաս է իրենց տնտեսությանը, ուղիղ մեսիջ է Անկարային և Բաքվին, որ իրենք պետք է դադարեցնեն կոնֆլիկտը, չգնան էլ ավելի սրմանը։

Բանախոսն ընդգծեց, որ հայ-ռուսական հարաբերությունները կարևոր բաղադրիչ ունեն Հայաստանի անվտանգության, տարածաշրջանի կայունության համար, թեև որոշ վճարվող գործիչներ ասում էին, որ Հայաստանը պետք է խզի հարաբերությունները Ռուսաստանի հետ, իսկ ՌԴ բազան պետք է դուրս գա Հայաստանից։

«Այսօր տեսնում ենք, թե ինչի համար է պետք, որ Հայաստանում լինի ռուսական բազա, որի ներկայությունն այսօր զսպում է ավելի մեծ ու լայնամասշտաբ հարձակումն արդեն անմիջապես Հայաստանի վրա»,- ասաց գործիչը։

Նրա կարծիքով, վերջին 2-2,5 տարում հայ-ռուսական հարաբերությունները որոշակի անկում են ապրել, այժմ արդեն նպատակ պետք է դնել դրանք բարձրացնել նոր մակարդակի, որ երկարաժամկետ առումով հայ-ռուսական հարաբերությունները լինեն ամուր, կայուն։

«Հայաստանը դեռ երկար ժամանակ և երկար տարիներ ունենալու է մարտահրավերներ, հայ-ռուսական հարաբերություններն այն երաշխիքն են, որոնք մեզ թույլ կտան այդ մարտահրավերներին արձագանքել ավելի կայուն, ավելի սահուն անցնել այդ գործընթացների միջոցով»,- հայտարարեց Ա. Ղուկասյանը։

Աղբյուր` Փաստինֆո