Փաստ ինֆո

«Մենք պետք է գիտակցենք, որ նման իրավիճակում Վրաստանը չի կարող բացահայտ պրոհայկական լինել, բայց շատ կարևոր է, որ փորձում է պահպանել չեզոքություն»,- այս մասին «Փաստինֆո»-ի հետ զրույցում ասաց վրացական հարցերով փորձագետ Ջոն Մելիքյանը:

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին ակտիվ ներգրավված են նաեւ Թուրքիան եւ միջազգային ահաբեկիչներ: Ռազմական գործողությունների առաջին իսկ օրից լուրեր շրջանառվեցին Վրաստանի օդային տարածքով Ադրբեջանի և Թուրքիայի միջև իրականացված ռազմական նշանակության բեռներ տեղափոխելու մասին, ինչպես նաև խոսվում էր այն մասին, թե ավտոբուսներով Վրաստանի տարածքով պատրաստվում են զինյալներ տեղափոխել Ադրբեջան: Վրաստանի ԱԳՆ-ն հերքեց շրջանառվող լուրերը, նշելով, որ Վրաստանը երկու հարևան պետությունների հետ չեզոք հարաբերությունների պահպանման կողմնակիցն է:

Մեզ հետ զրույցում վրացագետ Ջոն Մելիքյանը դրական գնահատեց վրացական կողմի չեզոք դիրքորոշումը և կոչ արեց չտրվել սադրանքների՝ վստահելով ոչ հավաստի աղբյուրների տարածած տեղեկություններին. «Ես ինչ-որ չափով դրական եմ գնահատում եմ Վրաստանի արձագանքը արցախաադրբեջանական կոնֆլիկտին: Դրական են թե՛ Վրաստանի նախագահի, թե՛ վարչապետի, թե՛ ԱԳՆ-ի այն հայտարարությունները, որ սա վտանգ է տարածաշրջանի համար և այս ռազմական գործողությունները ապակայունացնում են նաև ողջ տարածաշրջանը»: Վրաստանի նախագահը հայտարարեց, որ պատրաստ է միջնորդ հանդես գալ խաղաղ բանակցությունների, ըստ իս՝ իրանք էլ լավ գիտակցում են, որ նման պայմաններում խաղաղ բանակցություններ հնարավոր չէ, բայց արդեն իսկ առաջարկը գնահատելի է»:

Բանախոսի դիտարկմամբ՝ հայ-ադրբեջանական կոնֆլիկտը ունի հստակ պոտենիցալ նաև վրացական տարածք ներթափանցելու. «Կարևոր է նաև, որ վրացական կողմը կարողանա հսկել իրավիճակը իրենց երկրում, քանի որ Վրաստանում կան մեծ թվով հայեր և ադրբեջանցիներ: Պետք է կարողանան այնպես անել, որ այդ երկու համայնքները կոնֆլիկտի մաս չդառնան»:

Անդրադառնալով Վրաստանի օդային տարածքով ռազմական նշանակություն բեռներ տեղափոխելու մասին լուրերին՝ վրացագետը նշեց, որ այդ լուրերը հնարավոր է հետապնդում են հայ-վրացական հարաբերությունները լարելու նպատակ. «Շատ կարևոր է ֆիքսենք, որ քաղաքացիական ավիացիայի համար Վրաստանը ո՛չ Հայաստանի, ո՛չ Ադրբեջանի համար օդային տարածքը չի փակել:Օդուժի վերաբերյալ հիմնականում սոցցանցերում կամ միջազգային մամուլում է նման լուրեր տարածվում, պետք չէ այդ ամենը ընդունել որպես հստակ ճշմարտություն; Իմ կարծիքով՝ Հայաստանի հատուկ մարմինները տիրապետում են հստակ տեղեկատվության և լուծում են այս հարցը իրենց վրաց գործընկերների հետ: Շատ կարևոր է, որ մեր հանրությունը չգայթակղվի նման լուրերով, որոնք հատուկ նպատակ են հետապնդում՝ ապակայունացնել իրավիճակը, լարել հայ-վրացական հարաբերությունները»:

Վերջինիս խոսքով՝ նման սադրանքներին տրվելը և հարևան Վրաստանի դեմ բողոքի ալիքները թիրախավորելու են նաև Վրաստանի հայ համայնքին. «Պետք է մի բան հաշվի առնենք, որ Վրաստանի, Թուրքիայի և Ադրբեջանի միջև մեծ առևտրաշրջանառություն կա, որի մի մասն էլ Հայաստան է գալիս, հիմա ով բեռանատար նկարի, տեղադրի սոցցանցերում, նշանակում է զե՞նք է մատակարարվում»: Վրացագետը կոչ արեց հայ համայնքը զերծ մնալ բողոքի ալիքներից և Վրաստանի տարածքում միջպետական ճանապարհներ փակելուց:

Աղբյուր` Փաստինֆո