Փաստ ինֆո

Սյունիքի մարզի Ներքին Խնձորեսկ գյուղի բնակիչ 30-ամյա Նարեկ Սարդարյանի գործով ՄԻԵԴ գանգատ է ներկայացվել։ Այս մասին «Փաստինֆո»-ի հետ զրույցում ասաց Նարեկ Սարդարյանի ընտանիքի անդամների ներկայացուցիչ Արա Ղազարյանը՝ նշելով, որ գանգատը ներկայացվել է օգոստոսի 20-ին։

Փաստաբանի փոխանցմամբ՝ գանգատը ներկայացվել է Կոնվենցիայի 2-րդ, 3-րդ, 5-րդ, 8-րդ 13-րդ և 14-րդ հոդվածների խախտման հիմքով, մասնավորապես՝ նրա կյանքը պոտենցիալ վտանգի տակ է, առկա է վատ վերաբերմունքի ենթարկվելու պոտենցիալ վտանգ, ինչպես նաև խախտվել է անձնական կյանքի հարգման իրավունքը՝ տարածելով տեսանյութ, որտեղ նա ներկայացվել է խոցելի վիճակում։ Բացի այդ՝ թեև պնդում են, որ Նարեկ Սարդարյանը գտնվում է ազատության մեջ, գանգատը ներկայացվել է նաև անօրինական ձերբակալման, պաշտպանության միջոցների բացակայության և խտրականության հիմքերով։

Արա Ղազարյանն արձանագրեց՝ Ն.Սարդարյանի նկատմամբ Ադրբեջանի կողմից իրականացվող գործողությունների դրդապատճառը ռասիզմն է։ Ավելին՝ հայտնեց, որ նրա հետ կապ հաստատելու հնարավորություն չի եղել։ Անդրադառնալով Ադրբեջանի ձեռագրին՝ Ղազարյանը նշեց, որ ուղենիշը տրված է Մանվել Սարիբեկյանի գործով և նախ և առաջ՝ նրանք պարտավոր են համագործակցել Հայաստանի հետ, ինչը չի արվում, իսկ Հայաստանն էլ պարտավոր է դիմելու նրանց համագործակցության համար, քանի որ ՀՀ քաղաքացու կյանքը վտանգի տակ է։

«Պարտավոր են պրոակտիվ քայլեր ձեռնարկելու՝ անկախ նրանից, թե դիմացինն ինչ արձագանք կտա։ Այժմ նա միջազգային մարմնի պաշտպանության տակ է և ադրբեջանցիները դա շատ լավ հասկանում են, այսինքն՝ իրենց թևերին այդքան ազատություն չեն տա, որքան Սարիբեկյանի գործով։ Մտածում են՝ իրավիճակից ինչ ելք փնտրեն»,- ասաց Ղազարյանը։

Ավելի վաղ հայտնել ենք, որ հուլիսի 8-ին Ներքին Խնձորեսկ գյուղի բնակիչ, 30-ամյա Նարեկ Սարդարյանը Սպանդարյան ջրամբարի մոտակայքում գտնվող արոտավայրում ձիով գնացել էր անասունների հոտի ուղղությամբ և չէր վերադարձել։ Օրեր շարունակ իրականացված որոնողական աշխատանքներն արդյունք չէին տվել, ինչից հետո հուլիսի 15-ին համացանցում տարածվել էր Նախիջևանում տեսագրված տեսանյութ, որտեղ Նարեկ Սարդարյանը կադրի հետևից իրեն ուղղված հարցերին ի պատասխան՝ պատմում է, թե սպիտակ կտոր ծածանելով հանձնվել Ադրբեջանի զինվորականներին ու, որ ինքն Ադրբեջանի իշխանություններից քաղաքական ապաստան է խնդրում կամ հանձնել երրորդ երկրի։ Սարդարյանի՝ Ադրբեջանում հայտնվելու դեպքի առթիվ ԱԱԾ-ում հարուցվել էր քրեական գործ՝ ՀՀ քրեական օրենսգրքի 131-րդ հոդվածի և 329-րդ հոդվածի ՝ մարդուն առևանգելու և պետական սահմանն ապօրինի հատելու հատկանիշներով։

Սարդարյանի կնոջ, ծնողների, քրոջ անունից փաստաբանները հուլիսի 17-ին ՄԻԵԴ դիմում են ներկայացրել՝ Ադրբեջանի հանրապետությունում անազատության մեջ գտնվող ՀՀ քաղաքացի Նարեկ Սարդարյանի գործով հրատապ միջոց կիրառելու մասին։ Հուլիսի 22-ին ՄԻԵԴ-ը բավարարել է հրատապ միջոց կիրառելու մասին դիմումը՝ պարտավորեցնելով Ադրբեջանին տրամադրել տեղեկություն Նարեկ Սարդարյանի գտնվելու վայրի ու պայմանների մասին, տրամադրել տեղեկություն նրա առողջական վիճակի մասին (հաստատված բժշկական տեղեկանքով (տեղեկանքներով), եթե այդպիսիք կան) և արդյոք բժշկական հետազոտությունը իրականացվել է անկա՞խ մասնագետի կողմից, հարուցվե՞լ է արդյոք նրա նկատմամբ քրեական գործ, և եթե հարուցվել է, տրամադրել բոլոր համապատասխան մանրամասները և փաստաթղթերը, ներառյալ նրա դեմ առաջադրված ցանկացած մեղադրանքի մասին,նշանակվե՞լ է արդյոք փաստաբան, արդյոք նա հնարավորություն ունի՞ լիարժեքորեն շփվել իր հարազատների և Հայաստանի իշխանության հետ։

Հեղինակ՝ Իզաբել Սահակյան

Աղբյուր` Փաստինֆո