Փաստ ինֆո

Օգոստոսի 3-ին իրավիճակը կտրուկ սրվեց Ամուլսարի շուրջ։ «Լիդիան Արմենիա»-ը հայտարարեց, որ իր օրինական տարածքից հեռացրել է ապօրինի վագոն-տնակները, ինչի դեմ բողոքեցին բնապահպան-ակտիվիստները՝ կոչ անելով հավաքվել ու գնալ դեպի իրենց պահակակետեր։ Ուշ երեկոյան իրավիճակը կտրուկ լարվեց, փակվեցին ճանապարհները, սկսվեց հրմշտոց,բերման ենթարկվեցին մի շարք քաղաքացիներ։ «Փաստինֆո»-ի հարցերին է պատասխանում Լիդիան Արմենիայի իրավաբանական գծով ղեկավար Խորեն Նասիբյանը։

- Պարոն Նասիբյան, «Լիդիան Արմենիա»-ն հայտարարել է, որ նախաձեռնել է իր օրինական տարածքում ապօրինի գտնվող վագոն-տնակների հեռացումը։ Քանի տնակ է հեռացվել եւ կոնկրետ որ տարածքից, որտեղ են տեղափոխվել դրանք եւ արդյոք դրանց սեփականատերերի գույքային իրավունքը հարգվել է։

- Անկեղծ ասած, ինձ համար սա զարմանալի հարց է։ Եթե մեկը գա ձեր տան միջանցքում տեղավորի իր լվացքի մեքենան, ու չթողնի ձեզ մտնել ձեր տուն, դուք այն հեռացնելուց հարգելու ե՞ք գույքի տիրոջ իրավունքները։ Լիդիանը իր օրինական տարածք արդեն երկու տարի մուտք չի կարողանում գործել։ Մենք ամբողջ երկրով պետք է ամաչենք, որ մի երկրում ենք ապրում վերջին երկու տարում, որտեղ երկրի խոշորագույն ներդրողի տարածք ներխուժել են մի խումբ անձինք իրենց գույքով, ու պետությունը, ոստիկանությունը ոչինչ չի արել արդեն երկու տարի այս խայտառակությունը վերացնելու ուղղությամբ։ Մենք ստիպված էինք եւ օրենքով լիազորված էինք վերացնելու մեր տարածք կատարած ներխուժումը։ Հեռացվել է երկու վագոն-տնակ, որոնք արդեն երկու տարի, չնայած դատարանի որոշմանը ոստիկանությունը չէր հեռացնում մեր տարածքից։

- Չեք կարծում, որ առանց նախազգուշացնելու վագոն-տնակների հեռացումը կարող է գնահատվել գույքի ոչնչացում։

- Ոչ։ Նախ՝ ապօրինություն իրականացնողները բազմիցս զգուշացվել են, որ վերացնեն ներխուժումը, երկրորդ՝ ներխուժումը վերացնելու նպատակով օրինական տիրապետողն ունի խելամիտ պաշտպանության միջոցներ ձեռնարկելու, այդ թվում ներխուժման հետեւանքին համարժեք ուժ գործադրելու իրավունք, եթե ոչ ուժային միջոցները չեն կարող վերացնել ներխուժումը։ Սա օրենքից մեջբերում է։ Իսկ տրամաբանության շրջանակներում եւս մեկ օրինակ բերեմ։ Եթե հարեւանը ձեր տան դուռը իր կահույքով փակի, երկար ե՞ք հանդուրժելու՞, եւ շատ եք մտահոգվելու իր գույքը վնասելուց։ Մենք երկու տարի համբերատար սպասել ենք, դիմելով բոլոր ոչ ուժային միջոցներին։

- Մինչ սեփական նախաձեռնությամբ դրանք հեռացնելը արդյոք դիմել էիք ոստիկանություն՝ ինչպես ընկերությունն է նշել իր օրինական տարածքում այլ անձանց կողմից տեղադրված տնակները հեռացնելու պահանջով։ Եթե այո, ապա որն է եղել ոստիկանության արձագանքը, եթե ոչ՝ ինչու։

 - Իհարկե դիմել էինք, բազմաթիվ անգամ։ Մեր պահոցում երեւի մի քանի տասնյակ պաշտոնական նամակ կա ուղղված ոստիկանությանը՝ իրենց պարտականությունները կատարելու պահանջով։ Ավելին, ոստիկանությունը նաեւ փաստացի չի կատարել դատարանի պահանջը, որով հստակ պահանջ էր դրված վերացնելու ներխուժումը։

- Վայոց Ձորի ոստիկանապետը հայտարարել է, որ Լիդիանը իր աշխատակիցների համար նոր վագոն-տնակները տեղադրել իր կողմից օրինական վարձակալված տարածքում, սակայն բուֆերային գոտու հետ կապված հարցեր կան, հարուցվել է քրեական գործ՝ ՀՀ քրօրենսգրքի 308-րդ հոդվածի հատկանիշներով։ Խնդրում ենք պարզաբանել, թե ինչ ասել է բուֆերային գոտի։ Տեղյա՞կ եք արդյոք հարուցված քրեական գործին, եւ որքանով է պաշտոնեական լիազորությունների ենթադրյալ չարաշահումը առնչվում ընկերությանը։

 -Մենք տպավորություն ունենք, որ ոստիկանապետը ամեն ինչ ասում է՝ մի քանի տասնյակ օրինազանցներին «չնեղացնելու» համար։ Այս օրերին շրջանառվող «Ավտոմոբիլային ճանապարհների մասին» ՀՀ օրենքը չունի որեւէ «բուֆերային գոտի» կամ «տարածք» սահմանում։

Տարածքը Լիդիանինն է, դա ճշտված է բազմաթիվ փորձաքննություններով, GPS կոորդինատներով։ Ինչ վերաբերվում է «պաշտպանական գոտի» սահմանմանը, ապա այդ սահմանմամբ այնտեղ պահակային տնակներ տեղադրելու արգելք չկա։ Ի դեպ, ուզում եմ ուշադրություն հրավիրել այն հանգամանքին, որ այսօր ինչ-որ բուֆերային գորտում արգելքների մասին էին խոսում մարդիկ, ովքեր երկու տարի հենց նույն վայրում, իրենց չպատկանող տարածքում ապօրինի տնակներ էին տեղադրել։ Զավեշտալի է չէ՞։
 

-Ակտիվիստները հայտարարում են, որ Լիդիանն իր վերջին գործողություններով սադրում է ու սրում իրավիճակը։ Ձեր մեկնաբանությունը։

- Ակտիվիստները ամբողջ օրը փորձել են համայնքում սադրիչ հայտարարություններ են անել եւ արդյունքում մնալով մի քանի տասնյակ հոգով, այդ թվում նրանք միացած երեւանցի ակտիվիստների հետ հրահրել են բախումներ, խախտելով հակահամաճարակային կանոնները եւ ցուցաբերելով պարզ զոռբայություն։ Այս համայնքում մոտ 5000 բնակիչ կա եւ կարծում եմ առավել քան ակնհայտ էր, որ համայնքը նրանց չի միացել, եւ առավել քան պարզ էր, ով է սադրում ու սրում իրավիճակը։

- Որոնք են լինելու Ձեր հետագա գործողությունները, եթե ակտիվիստները շարունակեն փակ պահել ճանապարհը, արդյոք կառավարության հետ քննարկում եք ստեղծված իրավիճակի լուծման ուղիները։

- Լիդիանը մշտապես գործել է օրենքի շրջանակներում, ինչը չի կարելի ասել ճանապարհը փակող խմբավորման մասին։ Ավելին, ոստիկանությունը այսօր նույնպես դրսեւորել է զարմանալի հանդուրժողականություն՝ ապօրինության հանդեպ, ինչը, կարծում եմ, թե' Հայաստանյան, թե' միջազգային օրենքի տեսանկյունից ոչ օրինաչափ

Աղբյուր` Փաստինֆո