Փաստ ինֆո

«Ադրբեջանի ղեկավարությունը հասկացել է, որ Հայաստանի ղեկավարությունը, չափազանց ներգրավված լինելով ներքաղաքական զարգացումների մեջ, ըստ էության ժամանակ ու հնարավորություն է ընձեռել Ադրբեջանի իշխանություններին թոթափել նախկինում ձեռք բերված պարտավորությունների բեռը՝ Վիեննայի եւ Սանկտ-Պետերբուրգի եւ այո, ըստ էության նաեւ զիջել է իր դիրքերը բանակցությունների սեղանին: Հետեւաբար, այս ամենից Ադրբեջանը պետք է օգտվի ու փորձելու է շարունակել իր համար այդ առաջընթացը նաեւ իրական դաշտում ապահովել»-«Փաստինֆո»-ի հետ զրույցում նման կարծիք հայտնեց քաղաքագետ Հրանտ Մելիք-Շահնազարյանը՝ անդրադառնալով վերջին օրերին Բաքվից հնչող ռազմատենչ հայտարարություններին ու այն անվտանգային իրավիճակին, որն առկա է Արցախյան հիմնախնդրի շուրջ:

Քաղաքագետի խոսքով, Ալիեւը ցույց է տալիս, որ չկա որեւէ այլ խնդիր, որը կարող է երկրորդ պլան մղել Ղարաբաղի հարցի կարեւորությունն իրենց համար եւ անգամ համաճարակի այս իրավիճակում այդ օրակարգը ուշադրության կենտրոնում են պահում:

Հարցին, հաշվի առնելով կորոնավիրուսային ճգնաժամով պայմանավորված երկու երկրների ներքին խնդիրներն ու այն հանգամանքը , որ սահմանին մշտադիտարկում չի իրականացվում, արդյո՞ք ավելի է մեծանում հակառակորդի կողմից հնարավոր սադրանքի հավանականությունը, քաղաքագետը պատասխանեց. «Իհարկե Ադրբեջանը որպես հնարավորություն ընկալում է Հայաստանում եւ Արցախում ապակայունացնող ցանկացած գործընթաց եւ կորոնավիրուսն այդ առումով բացառություն չէ: Ես կարծում եմ, որ ենք պետք է պատրաստ լինենք նման սցենարի զարգացմանը, որովհետեւ գոնե դրա դիվանագիտական զսպման մեխանիզմները պաշտոնական Երեւանի պատճառով չկան, հետեւաբար, զսպող գործոնը միմիայն մեր կազմակերպվածությունն ու բանակի արդյունավետությունն է»:

Հրանտ Մելիք –Շահնազարյանի խոսքով, այս իրավիճակում Ադրբեջանի ՝ չհարձակվելու լավագույն երաշխիքը կազմակերպված ղեկավարումն է: «Եթե օրինակ, անվտանգության հիմնախնդիրները պատշաճ մակարդակի չեն կառավարվում, բնականաբար, Ալիեւը դա դիտարկելու է որպես հնարավորություն, ինչն էլ ըստ էության տեղի է ունենում»:

Քաղաքագետը հիշեցրեց, որ դեռ երկու ամիս առաջ անձամբ ահազանգել է այն մասին , որ ՀՀ իշխանությունը կառավարության նիստի ժամանակ բաց քննարկում էր արտակարգ դրություն հայտարարելու հարցը՝ ի ցույց դնելով իր անկազմակերպվածությունը, ինչ իհարկե, նաեւ հակառակորդ էր տեսնում:

«Հիմա, ցավոք սրտի, այդ նույն գործելաոճը շարունակվում է եւ երկու ամիս շարունակ մենք տեսնում ենք, որ կառավարումը Հայաստանում, մեղմ ասած, լավ որակի չէ: Տրամաբանական է , որ Ադրբեջանը դա դիտարկելու է որպես հնարավորություն եւ փորձելու է այդ իրավիճակից մաքսիմալ օգուտ քաղել»,-ընդգծում է Հրանտ Մելիք-Շահնազարյանը՝ հավելելով, որ երկրում ստեղծված ճգնաժամը հաղթահարելու կոնկրետ քայլերի մասին խոսելն արդեն փոքր-ինչ դժվար է:

«Պետք է պետական համակարգի կառավարումը պրոֆեսիոնալներին հանձնել, մարդկանց, ովքեր հասկանում են, թե ինչ է նշանակում պետություն ղեկավարելը, հասկանում են ընդունված որոշումների դրական կամ բացասական ազդեցությունը տարբեր ոլորտների վրա: Այս իշխանական թիմը չունի նման կադրային ռեսուրս եւ այս իշխանական թիմը կորոնավիրուսից ավելի շատ պայքարում է քաղաքական ընդդիմադիրների եւ նման ունակություններ ունեցող անձանց դեմ: Առաջին հերթին պետք է այդ պայքարից հրաժարվել՝ այն ուղղելով իրավիճակի հաղթահարմանը»:
Քաղաքագետի խոսքով, ոչ պակաս կարեւոր է ներքին միասնության մթնոլորտի ձեւավորումը, առանց որի անգամ ամենապարզ խնդիրները դժվար է լուծել եւ մարդիկ սկսում են չհավատալ ու չվստահել իշխանություններին:

«Երկու օր է Հայաստանի հիմնական քննարկման թեման այն է, թե ստո՞ւմ է արդյոք Փաշինյանը, որ վարակվել է կորոնավիրոսւսով, կամ հենց հիմա, նայում եմ Մեյմանդարի շուկայի զարգացումներին՝ մարդկանց ասում են, որ 24 ժամով շուկան փակվելու է սանիտարական միջոցառումների համար, մարդիկ չեն հավատում, որ դա 24 ժամով է լինելու, այսինքն` ամենապարզ հարցերում անգամ այդ վստահությունը երկրի ներսում չկա»-եզրափակեց քաղաքագետը:

Աղբյուր` Փաստինֆո